8 ކެންޑިޑޭޓުންގެ ތެރެއިން ޑރ މުއިއްޒުހާ ކޮލެޓީ މީހަކު ނުފެނޭ: ޝިޔާމު

މި އަހަރުގެ ސެޕްޓެމްބަރު މަހުގެ 9 ގައި ބާއްވާ ރިޔާސީ އިންތިޚާބުގައި 8 ކެންޑިޑޭޓުން ވާދަކުރައްވާއިރު، އޭގެ ތެރޭގައި ޕީއެންސީގެ ރިޔާސީ ކެންޑިޑޭޓު ޑރ މުޙައްމަދު މުއިއްޒުހާ ކޮލެޓީ ބޭފުޅަކު ފެނިވަޑައިނުގަންނަވާ ކަމަށް ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ވިދާޅުވެއްޖެ އެވެ.

ޝިޔާމު މިފަދައިން ވިދާޅުވެފައި ވަނީ ރިޔާސީ އިންތިޚާބަށް ޕީޕީއެމްގެ މައި ޖަގަހަ "ދިވެހީންގެ ޖަގަހަ" ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން ނެވެ.

ޝިޔާމު ވިދާޅުވީ ޑރ މުއިއްޒަކީ ރައީސް ޔާމީންގެ ވެރިކަމުގައި، ޤައުމަށް އުމްރާނީ ތަރައްގީގެ ބޮޑެތި މަޝްރޫއުތައް ހިންގަވަމުން ގެންދެވިއިރު އެންމެ އަރިހުގައި ހުންނެވި ވަޒީރު ކަމަށެވެ.

ރައީސް ޔާމީން ޑރ މުއިއްޒު އެންޑޯސް ކުރެއްވުމުމާއެކު، އަދި ޑރ މުއިއްޒުގެ ރަނިންމޭޓަކީ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ލަތީފުކަމުގައި ކަނޑައެޅި ހިސާބުން، ރައީސް ޔާމީންގެ ތަސައްވަރާއި އެއްގޮތަށް ގައުމުގެ ކަންކަން މި ދެބޭފުޅުން ކުރިއަށް ގެންދަވާނެކަމުގެ ޔަގީންކަން ލިބިގެން ދިޔަކަމަށް ޝިޔާމު ވިދާޅުވި އެވެ.

އެކަން ފާހަގަކުރައްވާ ޝިޔާމު ވިދާޅުވީ މި ރިޔާސީ އިންތިޚާބަށް 8 ކެންޑިޑޭޓުން ނިކުމެ ތިއްބެވި ނަމަވެސް ޑރ މުއިއްޒުހާ ކޮލެޓީ ކެންޑިޑޭޓަކު ފެނިވަޑައިނުގަންނަވާ ކަމަށެވެ. އިލްމާއި ތަޖުރިބާއާއި، ސިޔާސަތުތަކާއި އަދި ކެމްޕޭނު ޓީމަށް ބަލާލުމުން ވެސް އެކަން ހާމަވެގެންދާކަމަށް ޝިޔާމު ވިދާޅުވި އެވެ.

"އަޅުގަނޑުމެންގެ މަސައްކަތްތައް ހަގީގަތުގައި ވަރަށް ފަސޭހަވެގެން މި ދިޔައީ. ޑރ މުއިއްޒާއި ސެމްބެއާއި އެކީގައި އަޅުގަނޑުމެންނަށް މި ފެށޭ މަސައްކަތުން އިރާދަކުރެއްވިއްޔާ އަޅުގަނޑުމެންގެ މަސައްކަތްތައް ފަސޭހަވެގެން ދާނެ. އެހެން މި ދަންނަވަނީ އަޅުގަނޑަކަށް ނުފެނޭ 8 ކެންޑިޑޭޓުން ޑރ މުއިއްޒާއި އެކީގައި އެބަ ވާދަކުރައްވާ. 8 ކެންޑިޑޭޓުން ތެރޭގައި އަޅުގަނޑަކަށް ނުފެނޭ މި ކޮލެޓީއެއް. އަޅުގަނޑަކަށް ނުފެނޭ މިހާ ރަނގަޅަށް އިންތިޒާމުކޮށްފައި އޮތް ރިޔާސީ ކެންޑިޑޭޓަކާއި ރަނިންމޭޓެއް"

ޕީޕީއެމްގެ ނައިބު ރައީސް ޝިޔާމު

ޝިޔާމު އިތުރަށް ވިދާޅުވީ ޑރ މުއިއްޒާއި، ރަނިންމޭޓު ހުސެއިން މުޙައްމަދު ލަތީފުގެ މެނިފެސްޓޯއަކީ ރައީސް ޔާމީންގެ މެނިފެސްޓޯކަމަށެވެ. އެ މެނިފެސްޓޯގައި ރާއްޖޭގެ ހުރިހާ ގިންތިއަކާއި މިންތިއެއްގެ ރައްޔިތުން ހިމަނުއްވާފައިވާނެ ކަމަށާއި، އެއީ އެއްވެސް ރައްޔިތަކު ބާކީ ނުވާނެގޮތަށް ސިޔާސަތުތައް އެކުލަވާލާފައިވާ މެނިފެސްޓޯއެއް ކަމަށެވެ.

އެހެންކަމުން، ޕީޕީއެމަށް އޮތް ތާއީދު އިތުރުވަމުން އަންނަ މަންޒަރު މިހާރު ވެސް ފެންނަމުންދާ ކަމަށާއި، ކުރިއަށް މިއޮތް ރިޔާސީ އިންތިޚާބު އެއްބުރުން ޕީޕީއެމް-ޕީއެންސީ ކޯލިޝަނުން ނަގާނެކަމުގެ ފުރިހަމަ ޔަގީންކަން އޮތްކަމަށް ޝިޔާމު ވިދާޅުވި އެވެ.