ސަރުކާރުގެ ރަސްމީ ދަތުރެއްގެ ތެރެއިންވެސް ކެންޕެއިންކުރެވޭނެ: އޭސީސީ

ސަރުކާރުން ކުރާ ރަސްމީ ދަތުރެއްގެ ތެރެއިން، ރަސްމީ ދަތުރުގެ ހަވާސާއިން ބޭރު، ހުސް ވަގުތުގައި ކެމްޕެއިން ހަރަކާތްތައް ހިންގިދާނެ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން ބުނެފި އެވެ.

އޭސީސީން މިހެން ބުނީ، ކުރިއަށް އޮތް ސެޕްޓެމްބަރު 9 ވަނަ ދުވަހު ބާއްވާ ރިޔާސީ އިންތިޚާބާ ގުޅޭ ކޮރަޕްޝަނުގެ ހިރާސް ކުޑަކުރުމުގެ ގޮތުން ނެރެފައިވާ އިރުޝާދުނާމާގައެވެ.

މި އިރުޝާދުނާމާގެ މަޤްސަދުތަކުގެ ގޮތުގައި އޭސީސީން ފާހަގަކޮށްފައިވަނީ، އިންތިޚާބުތަކުގައި ހިންގާ ކޮރަޕްޝަނުގެ ޢަމަލުތަކާއި ކޮރަޕްޝަނަށް ހުށަހެޅޭ ފަދަ ކަންކަން ވިޔަނުދިނުން (ކޮރަޕްޝަން ޕްރިވެންޝަން) އާއި އިންތިޚާބާ ގުޅޭ ހުރިހާ މަރުޙަލާއެއްގައިވެސް ނަޒާހަތްތެރިކަން ކަށަވަރުކުރުމަށް ޢަމަލުކުރާނޭ ގޮތުގެ އިރުޝާދު ފޯރުކޮށްދިނުމުގެ އިތުރުން ދައުލަތުގެ އިދާރާތަކާއި ކެންޑިޑޭޓުންނާއި ސިޔާސީ ޕާޓީތަކުން ދެފުށްފެންނަ ހާމަކަންބޮޑު ގޮތެއްގައި އިންތިޚާބާއި ގުޅޭ އެންމެހައި ކަންކަން ހިންގުމަށް ބާރުއަޅައި ކޮރަޕްޝަންގެ ހިރާސް ކުޑަކުރުމަށް ލަފަޔާއި އިރުޝާދުދިނުން ފަދަ ކަންކަމެވެ.

ގައިޑްލައިންގައި ހިމަނާފައިވާ ލަފާއާއި އިރުޝާދުތަކުގެ ތެރޭގައި ސިޔާސީ ޕާޓީތަކަށާއި އިންތިޚާބުތަކަށް ކުރިމަތިލާ ކެންޑިޑޭޓުން ކެމްޕޭނުކުރުމަށް ފައިސާއާއި އެހީ ހޯދުމާއި ޚަރަދުކުރާނެ ގޮތާއި، ދައުލަތުގެ މުވައްޒަފުން ކެމްޕނުތަކުގައި ހަރަކާތްތެރިވާންވީ ގޮތާއި، ދައުލަތުގެ މުދަލާއި ފައިސާ އަދި މަޤާމު ކެމްޕޭންކުރުމުގައި ބޭނުންކުރުން، އަދި ރިޝްވަތު ދިނުމާއި އިންތިޚާބާއި ގުޅިގެން ވޯޓު ގަތުމާއި ވޯޓު ވިއްކުން ފަދަ ކަންކަން ކަންކަން މަނާވުން ފަދަ ކަންކަމާއި ގުޅޭ މަޢުލޫމާތު ހިމެނެއެވެ.

އެގޮތުން އޭގައި ބުނެފައިވާ ގޮތުގައި ކެންޑިޑޭޓަކު އިންތިހާބީ ދުވަސްވަރު ކުރާ ދަތުރެއްގެ މައިގަނޑު މަގްސަދަކީ ރަސްމީ ކަމެއް ކަމުގައިވާނަމަ އެ ދަތުރެއްގެ ހަރަދު ދައުލަތުގެ ބަޖެޓުން ހަމަޖެއްސި ނަމަވެސް، އެދަތުރުގައި ކެމްޕޭނުކުރުން ނުވަތަ ސިޔާސީ ހަރަކާތް ހިންގާނަމަ އެ ޚަރަދު ހަމަޖައްސަން ޖެހޭނީ ކެމްޕޭނު ފައިސާގެ ތެރެއިން ކަމަށެވެ.

"އަދި، ރަސްމީ ބޭނުމަށް ކުރާ ރަސްމީ ދަތުރެއްގެ ހަވާސާގައި އެކަމަކުން އެ ދަތުރެއްގެ ޚަރަދަށް އެއްވެސް އަސަރެއް ނުކުރާނެ ފަދަ ސިޔާސީ ހަރަކާތެއްގައި ނުރަސްމީ ގަޑީގައި ބައިވެރިވެވިދާނެ." އިރުޝާދު ނާމާގައި ބުނެފައިވެއެވެ.

މީގެ އިތުރުން ކެންޑިޑޭޓަކު އިންތިޚާބީ ދުވަސްވަރު އެއްވެސް ކެމްޕޭނު ދަތުރެއްކުރާނަމ،ަ ދައުލަތުގެ މުދަލާއި ފައިސާ އަދި ދައުލަތް ހިއްސާވާ ކުންފުނިތަކުގެ މުދަލާއި ފައިސާ އެއްވެސް ގޮތަކަށް ބޭނުންނުކުރެވޭނެ ކަމަށް އޭގައި ބުނެފައިވެއެވެ.

އަދި މިގޮތަށް ކުރާ ދަތުރުތަކުގައި ދައުލަތުގެ މުވައްޒަފުންނާއި ދައުލަތް ހިއްސާވާ ކުންފުނިތަކުގެ މުވައްޒަފުންގެ ފަރާތުން އެއްވެސް ސިޔާސީ މަސައްކަތެއް އެމުވައްޒަފުންގެ ރަސްމީ މަސައްކަތްތަކުގެ ތެރޭގައި ހިމަނައިގެން ނުކުރުވުމަށްވެސް އެދިފައިވެއެވެ.

އޭގެ އިތުރުން އިންތިހާބާ ދީމާކޮށް ސަރުކާރުން ގިނަ އަދަކަށް މުވައްޒަފުން ނުނެގުން އަދި ވަކިނުކުރުމަށް ވެސް އިރުޝާދުނާމާގައި ވަނީ ލަފާދީފަ އެވެ.