2025 ގެ ނިޔަލަށް ތިލަމާލެ ބްރިޖަށް 3 ބިލިއަން ޚަރަދުވާނެ ކަމަށް ލަފާކޮށްފި!
ރައީސް އިބްރާހިމް މުޙައްމަދު ޞާލިހުގެ ސަރުކާރުން އިއުލާނުކުރި އެންމެ ބޮޑު މަޝްރޫއުކަމަށްވާ ތިލަމާލެ ކަނެކްޓިވިޓީ މަޝްރޫއުއަށް 2025 ގެ ނިޔަލަށް ތިން ބިލިއަން ރުފިޔާއަށްވުރެ ގިނައިން ޚަރަދުވާނެކަމަށް ސަރުކާރުގެ ރަސްމީ ހިސާބުތަކުން ދައްކައިފި އެވެ.
ފިނޭންސް މިނިސްޓްރީން އާންމުކޮށްފައިވާ ހިސާބުތަކަށް ބަލާއިރު، ކުރިއަށް އޮތް ދެ އަހަރަށް ސަރުކާރުން ހިންގަން ރާވާފައިވާ 5 މަޝްރޫއަކަށް ބަޖެޓުން ޚަރަދުކުރުމަށް ވަނީ ނިންމާފައެވެ. މި މަޝްރޫއުތަކުގެ ތެރެއިން އެންމެ ބޮޑު ޚަރަދެއްކުރަން ކަނޑައަޅާފައިވަނީ ތިލަމާލެ ބްރިޖަށެވެ.
އެގޮތުން 2023 ވަނަ އަހަރުގެ ބަޖެޓުގައި ތިލަމާލެ ބްރިޖަށް 543.8 މިލިއަން ރުފިޔާ ހޭދަކޮށްފައިވާއިރު، 2024 ވަަނަ އަހަރަށް 1181.7 ބިލިއަން ރުފިޔާ އަދި 2025 ގައި 2358.9 ބިލިއަން ރުފިޔާ ޚަރަދުކުރުމަށް ވަނީ ބަޖެޓުކުރެވިފަ އެވެ.
ތިލަމާލެ ބްރިޖުގެ މަޝްރޫއަކީ އިންޑިއާއިން 500 މިލިއަން ޑޮލަރުގެ ލޯނެއް ނަގައިގެން އަދި ދައުލަތުގެ ބަޖެޓުންވެސް ބޮޑު ޚަރަދެއްކޮށްގެން ކުރިއަށް ގެންދާ މަޝްރޫއެކެވެ. މީ ރައީސް ޞާލިހުގެ ވެރިކަމުގެ ފުރަތަމަ ފަސް އަހަރު ނިންމާނެކަމަށް ވައުދުވި މަޝްރޫއެކެވެ.
އެހެން ނަމަވެސް އެ މަޝްރޫއު ނިންމާލެވިފައި ނުވާއިރު، އެކަށީގެންވާ ހަލުވި މިނުގައި މަޝްރޫއު ކުރިއަށް ނުދާތީ ގިނަ ފާޑުކިޔުންތަކެއް ވެސް ރައީސް ޞާލިހަށް ވަނީ އަމާޒުވެގެން ގޮސްފައެވެ.
ބަޖެޓުން ބޮޑު ޚަރަދެއް ކުރުމަށް ނިންމާފައިވާ މަޝްރޫއުތަކުގެ ތެރޭގައި:
1- އެރައިސް ޕްރޮޖެކްޓް
2- ވީއައިއޭ ޓާމިނަލް މަޝްރޫއު
3- ފެނާއި ނަރުދަމާގެ ޕްރޮޖެކްޓު
ތިލަމާލެ ބްރިޖުގެ މަސައްކަތް ކުރަނީ އިންޑިއާގެ އެފްކޯންސް އިންފްރާސްޓްރަކްޗާ ކުންފުންޏާއި ހަވާލުކޮށްގެން ނެވެ. ތިލަމާލެ ބްރިޖުގެ މަސައްކަތަށް ގުޅިފަޅާއި މާލޭގައި 1500 މީހުން މަސައްކަތް ކުރަމުން ދާކަމަށް ސަރުކާރުން ވަނީ ހާމަކޮށްފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
