އެމްޑީޕީން ޖުޑިޝަރީ އިސްލާހުކުރާ ވާހަކަ މިހާރު ދައްކަނީ ކަނޑައެޅިގެން ޖެއްސުމަށް: އާދަމް ޝަރީފް

މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) ޖުޑިޝަރީ އިސްލާހުކުރާ ވާހަކަ މިހާރު ދައްކަވަމުންދަނީ ކަނޑައެޅިގެން ޖެއްސުމަށް ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު އަދި ޕީއެންސީގެ ޕީޖީ ލީޑަރު އާދަމް ޝަރީފު އުމަރު ވިދާޅުވެއްޖެ އެވެ.

އާދަމް ޝަރީފު މިފަދައިން ވިދާޅުވެފައި ވަނީ ސަރުކާރުގެ ފަރާތުން ހިތަދޫ އުތުރުދާއިރާގެ މެމްބަރު މުހައްމަދު އަސްލަމް ހުށައަޅުއްވާފައިވާ ޖުޑިޝަލް ސާވިސްކޮމިޝަންގެ ޤާނޫނަށް އިސްލާހުގެނައުމުގެ ބިލަށް މަޖިލީހުގެ މިއަދުގެ ޖަލްސާގައި ބަހުސްކުރައްވަމުން ނެވެ.

އާދަމް ޝަރީފު ވިދާޅުވީ ޝަރުއީ ދާއިރާއަށް އޮތް ސިޔާސީ ނުފޫޒު ނައްތާލުމަށް ޖުޑިޝަލް ސާވިސް ކޮމިޝަންގެ ކޮމްޕޮސިޝަން ބަދަލުކުރުމަކީ އެމްޑީޕީން ވީ ވައުދެއް ކަމަށެވެ.

އެ ވައުދު ފުއްދުމަށް ރައްޔިތުންގެ މަޖިލީހުގެ ސުޕަމެޖޯރިޓީ ރައްޔިތުން އެމްޑީޕީއަށް ދީފައިވާ ކަމަށާއި، އަދި މިހާރުވެސް މަޖިލީހުގެ މެޖޯރިޓީ އެމްޑީޕީގެ އަތުގައި އޮތް އިރު، އެކަން ކުރުމަށް މިހާތަނަށް އެމްޑީޕީން މަސައްކަތްކޮށްފައި ނުވާކަމަށެވެ.

އެހެންކަމުން، އެމްޑީޕީގެ ސަރުކާރު ނިމުމުން، އަދި މަޖިލީހުގެ މި ދައުރު ނިމެން ކައިރިވުމުން ޖުޑިޝަރީ އިސްލާހުކުރާ ވާހަކަ މިހާރު ދައްކަވަމުން ދަނީ އެއްވެސް އިޚްލާސްތެރި ނިޔަތެއްގައި ނޫން ކަމަށާއި، އެއީ ކަނޑައެޅިގެން ޖެއްސުމަށް ދައްކަވަމުންދާ ވާހަކަތަކެއް ކަމަށް އާދަމް ޝަރީފު ވިދާޅުވި އެވެ.

"އެއްވެސް އިރެއްގައެއް އެމްޑީޕީއަކުންނެއް ޖުޑިޝަރީ އިސްލާހުކުރާކަށް މަސައްކަތެއް ނުކުރޭ. މިހާރު މިވާހަކަ ފަށައިގެން މި އުޅެނީ ކަނޑައެޅިގެން... ކަނޑައެޅިގެން ޖެއްސުމަށް"

ޕީއެންސީގެ ޕީޖީ ލީޑަރު އާދަމް ޝަރީފު

އާދަމް ޝަރީފު ވިދާޅުވީ 19 ވަނަ ރައްޔިތުންގެ މަޖިލީސް އެމްޑީޕީއަށް ދިނުމުން، ހުރިހާ ބާރެއް މުށުތެރެއަށް ލައިގެންތިބެ، ރައްޔިތުންގެ މަޖިލީހުގެ މަސައްކަތްތައް ކުރިއަށް ނުގެންދެވޭގޮތަށް މުޅި މަޖިލީސް "ޚަރާބުކުރީ" އެމްޑީޕީންކަން ރައްޔިތުންނަށް އެނގޭކަމަށެވެ. އަދި އެއީ ޖުޑިޝަރީ އިސްލާހުކުރާ ވާހަކަ ދައްކައިގެން އޮޅުވާލެވޭނެ ކަމެއް ނޫން ކަމަށެވެ.

އެމްޑީޕީގެ ވައުދު ފުއްދުމަށްޓަކައި ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު 3 ފަހަރުމަތިން ޖޭއެސްސީ އިސްލާހުކުރާ ބިލު ވަނީ މަޖިލީހަށް ހުށައަޅާފައެވެ. އެހެން ނަމަވެސް އެމްޑީޕީގެ މެޖޯރިޓީ ބޭނުންކޮށްގެން ތިން ފަހަރު ވެސް އެ ބިލު ވަނީ ބޭރުކޮށްލާފަ އެވެ. އަދި އޭރު ބުނަމުން ގޮސްފައިވަނީ ޖޭއެސްސީ އިސްލާހުކުރާ ވަގުތު އަދި ނުޖެހެނީ ކަމަށެވެ.