އިޒްރާއިލްގެ ހަމަލާތަކުގައި ޣައްޒާގެ 1800އަށް ވުރެ ގިނަ މީހުން ޝަހީދުވެއްޖެ

އިޒްރާއިލްގެ ޔަހޫދީ ސިފައިން ފަލަސްޠީނުގެ ޣައްޒާއަށް ދެމުންދާ ހަމަލާތަކުގެ ސަބަބުން ޣައްޒާއިން މިހާތަނަށް 1800 އަށްވުރެ ގިނަ މީހުން ޝަހީދުވެއްޖެއެވެ.

އިޒްރާއިލްގް ހަމަލާތަކުގައި ޣައްޒާއިން ޝަހީދުވި މީހުންގެ ޢަދަދު 18272 އަކަށް އަރައިފައިވާއިރު އޭގެ ތެރޭގައި 8000 އެއްހާ ކުޑަކުދިން ހިމެނެއެވެ. އަދި 5000 އަށް ވުރެ ގިނަ އަންހެނުން ހިމެނެއެވެ.

ޣައްޒާއަށް ދެމުންދާ ހަމަލާތަކުގައި މިހާތަނަށް 49،000 އަށްވުރެ ގިނަ މީހުން ޒަޚަމްވެފައިވާއިރު އޭގެ ތެރޭގައި 8000 އަށް ވުރެ ގިނަ ކުޑަކުދިން ހިމެނެއެވެ. އަދި 6000 އަށްވުރެ ގިނަ އަންހެނުން އޭގެ ތެރޭގައި ހިމެނެއެވެ.

އަދި ޣައްޒާއިން 7780 މީހަކު ވީނުވީ އެއް ނޭނގި ގެއްލިފައިވާ ކަމަށް އަލްޖަޒީރާގައި ބުނެފައިވެއެވެ.

ޣައްޒާގެ އިތުުރުން އިޒްރާއިލް ސިފައިން ދަނީ ފަލަސްޠީނުގެ ހުޅަނގު އައްސޭރީގައިވެސް އިންސާނިއްޔަތާއި ޚިލާފު އެތައް ޖަރީމަތަކެއް ހިންގަމުންނެވެ.

އެގޮތުން ހުޅަނގު އައްސޭރީގައި 63 ކުޑަކުއްޖަކު ހިމެނޭހެން 275 މީހަކު ވަނީ ޝަހީދުކޮށްލައިފައެވެ.

މީގެއިތުރުން 3365 މީހަކު ވަނީ ޒަޚަމްވެފައެވެ.

ޣައްޒާގައި އެތައް ބަޔަކު ޝަހީދުވެގެން ގޮސްފައިވާއިރު ޢުމްރާނީ ގޮތުންވެސް ބޮޑެތި ގެއްލުންތަކެއް ވަނީ ޣައްޒާއަށް ލިބިފައެވެ.

އެގޮތުން މީހުން ދިރިއުޅޭ 305،000 ތަނެއް ވަނީ ހަލާކުވެފައެވެ. އޭގެ ތެރެއިން ގިނަ ތަންތަން ވަނީ އަލުން ބިނާ ކުރަން ޖެހޭ މިންވަރަށް ހަލާކުވެފައެވެ.

ތަޢުލީމުދޭ 339 ތަނެއް ހަލާކުވެފައިވާއިރު 26 ހާއި 35ކާއި ދެމެދުގެ ޢަދަދަކަށް ސިއްޚީ ޚިދްމަތްދޭ ތަންތަން ހަލާކުވެފައިވެއެވެ.

މީގެއިތުރުން 87 އެމްބިޔުލާންސެއް ހަލާކުވެފައިވާއިރު އަޅުކަން ކުރުމަށް ބޭނުންކުރާ 167 ތަނެއް ވަނީ ހަލާކުވެފައެވެ.