ޢީދަށް މިފަހަރު ދާންވީ ދަނގެއްޗަށް؛ ތަފާތު ވާނެ، އެހާމެ އުފާވެރި ވާނެ!

ބަރަކާތްތެރި އަޟުޙާ ޢީދު ބޯމަތިވެފައިވާއިރު، ގިނަ ބައެއްގެ ސަމާލުކަން މިހާރު ހުއްޓިފައިވަނީ ޢީދު ބަންދުގައި އާއިލާއާއެކު އުފާވެރި ވަގުތުކޮޅެއް ހޭދަކޮށްލުމަށް ދާނެ ރަށަކާމެދުގައެވެ. ސަރުކާރު ބަންދާއެކު ލިބޭ މި ދިގު ޗުއްޓީއަކީ އާއިލާގެ ކުދިބޮޑު އެންމެން އެކުގައި ހިތްހަމަޖެހުމާއި އުފާވެރިކަން ހޯދުމަށް ލިބޭ ރަނގަޅު ފުރުސަތެކެވެ. މި ފުރުސަތުގެ ބޭނުން އެންމެ ފުރިހަމަ ގޮތުގައި ހިފޭނީ، އެންމެން ބައިވެރިވާ ތަފާތު ގިނަ ހަރަކާތްތަކެއް ރޭވިފައިވާ ރަށަކަށް ގޮސްގެންނެވެ. އެފަދަ އެއް މަންޒިލަކީ ޔަގީނުންވެސް އދ. ދަނގެއްޗެވެ.

ދަނގެތީ ޖަމިއްޔަތުލް ޤަލަމުން އިސްނަގައިގެން އެރަށުގެ މުއައްސަސާތަކާއި ޖަމިއްޔާތަކާއި ގުޅިގެން، ދީލަތުއެތައް ބައެއްގެ އެހީއާއެކު މިފަހަރުވެސް ޢީދުގައި ގިނަ ކުރިވަރުތަކެއް ކުރިއަށް ގެންދިޔުމަށް ވަނީ ރާވާފައެވެ.

ޢީދު ދުވަހުގެ ހާއްސަ ހަރަކާތްތައް

ދަނގެތީގައި ޢީދުގެ ހަރަކާތްތައް ފެށިގެންދާނީ ޢީދު ނަމާދަށްފަހު ކުރިއަށްދާ އުޟުހިޔާ ކަތިލުމުގެ މުހިންމު ހަރަކާތުންނެވެ. ދަނގެތީގެ  އުޟުހިޔާ ކަތިލަން ބޭނުންވާ ފަރާތްތަކުން ބަކަރީގެ އަގު ދެއްކުމުން، އެއްވެސް ފީއަކާ ނުލައި ބަކަރި ގެނެސްދިނުމާއި، ބެލެހެއްޓުމާއި، ކަތިލުން އަދި ބެހެނިވެރިންނަށް މަސް ބެހުމުގެ އެންމެހާ ކަންކަން ޖަމިއްޔަތުލް ޤަލަމުން ކޮށްދެއެވެ.

ޢީދު ދުވަހުގެ ހަވީރު އޮންނާނީ އާއިލީ ހަވީރެވެ. މި ހަވީރަށް އަންނަ ހުރިހާ ކުޑަކުދިންނަށް ހަދިޔާ ދިނުމާއި، ތަފާތު ސްޓޯލްތަކުން ހަދިޔާ ލިބުމުގެ އިތުރުން ސްޓޭޖް އައިޓަމްތައް ހުށަހަޅައިދޭނެއެވެ. އަދި ހަވީރުގެ ބައިވެރިންގެ މެދުގައި ގުރުނަގައި، ކުޑަކުދިންނާއި ބޮޑެތި މީހުންނަށްވެސް އަގުހުރި ހަދިޔާތަކެއް ދޫކޮށްލާނެއެވެ.

ރޭގަނޑުގެ ވަގުތަކީ ދަނގެތީގައި "ބޮޑުމަސް ޝޯވް" އޮންނަ ވަގުތެވެ. މިފަހަރުވެސް ބޮޑުމަސް ޝޯވް ކުރިއަށްދާނީ ވަރަށް ތަފާތުކޮށް، މަޖާ ގޮތްތަކެއް ހިމަނައިގެންނެވެ.

މީގެ އިތުރުން، މި އަހަރު އަލަށް ތައާރަފުކުރާ "ގަދަ ފަހުލަވާނުން" މުބާރާތްވެސް އެ ރޭ އޮންނާނެއެވެ. މި މުބާރާތުން ރަށުގެ އެންމެ ވަރުގަދަ ފަހުލަވާނު ހޮވިގެންދާނެއެވެ.

ދެވަނަ ދުވަހުގެ ކުޅިވަރުތައް

ޢީދުގެ ދެވަނަ ދުވަހުގެ ހަވީރު އޮންނާނީ ފޯރިގަދަ ވާދެމުގެ މުބާރާތެވެ. ފުރަތަމަ ޖޫނިއާ ކުދިންގެ މުބާރާތް ކުރިއަށްދާއިރު، އޭގެ ފަހުން ބޮޑެތި މީހުންގެ ވާދެމުގެ މުބާރާތް އޮންނާނެއެވެ. ވަނަވަނައަށް އަންނަ ޓީމުތަކަށް ފައިސާގެ އިނާމު ހުށަހެޅިފައިވެއެވެ.

މަސްރޭހާއި އިސްރަށްވެހިންގެ ހަވީރު

ތިން ވަނަ ދުވަހަކީވެސް ހަރަކާތްތަކުން ފުރިގެންވާ ދުވަހެކެވެ. މި ދުވަހުގެ އެންމެ ހާއްސަ ހަރަކާތަކީ "އިސްރަށްވެހިންގެ ހަވީރު" އެވެ. މި ހަވީރުގައި ރަށުގެ 70 އަހަރުން މަތީގެ އިސްރަށްވެހިންނަށް ދައުވަތު އަރުވައި، އެ ބޭފުޅުން ރަށަށާއި ގައުމަށް ކޮށްދެއްވި އަގުހުރި ހިދުމަތްތަކުގެ އަގުވަޒަން ކުރެވޭނެއެވެ. އަދި ދުނިޔެ ދޫކުރައްވާފައިވާ ހިދުމަތްތެރިންގެ ހަނދާނުގައި "ޝަޚްސުންގެ ރަންހަނދާނުގައި" ނަމުގައި ހަނދާނީ ފިލާ އެރުވުމާއި، ކުޑަކުދިންގެ ފަރާތުން އިސްރަށްވެހިންނަށް ހާއްސަ ލަވައެއް ހުށަހެޅުން އޮންނާނެއެވެ.

މީގެ އިތުރުން، އެ ދުވަހު އޮންނަ މަސްރޭހާއި، ރޭގަނޑު އޮންނަ "ރަނިރަހަ" ކެއްކުމުގެ މުބާރާތަކީ ފޯރިގަދަ ހަރަކާތްތަކެކެވެ. މި ދެ މުބާރާތުން ވަނަވަނައަށް އަންނަ ޓީމުތަކަށްވެސް ފައިސާގެ އިނާމު ދިނުމަށް ވަނީ ހަމަޖެހިފައެވެ.

ނިންމާލުން: ރައްޔިތުންގެ ބާބަކިޔު އާއި އުމްރާ ދަތުރު

ޢީދު ހަރަކާތްތައް ނިންމާލުމުގެ ގޮތުން ހޮނިހިރު ދުވަހުގެ ރޭ މުޅި ރަށުގައި ދިރިއުޅޭ ރައްޔިތުންނާއި ޒިޔާރާތްކޮށްފައިވާ ފަރާތްތަކަށް ހާއްސަ ބާބަކިޔުއެއް އޮންނާނެއެވެ. މި ރޭގެ އެންމެ އުފާވެރި ވަގުތަކީ  ޢީދުގެ އެންމެ ބޮޑު އިނާމު ކަމަށްވާ ޤިބްލަ ހައްޖު އެންޑް އުމްރާގެ ފަރާތުންދޭ "ޢުމްރާ ދަތުރު" ގެ ނަސީބުވެރިޔާ އިއުލާންކުރާ ވަގުތެވެ.

ވުމާއެކު، މި އަހަރުގެ ޢީދު އުފާވެރިކަމާއެކު ހޭދަކޮށްލަން ދަނގެތި ނޫން ދެވަނަ މަންޒިލެއް ނެތެވެ.

އިސްލާމީ ހަމަތަކާއި، އިމުގެ ތެރޭގައި، ދިވެހި ސަގާފަތާ، އާދަކާދަތަކާ އެއްގޮތަށް، އެންމެން ގުޅިގެން، ބައިވެރިކުރުވައިގެން ކުރިއަށް ގެންދާ މި ހަރަކާތްތަކުގެ މެއިން ސްޕޮންސަރަކީ ބީއެމްއެލް އިސްލާމިކްއެވެ. މީޑިއާ ޕާޓްނަރަކީ ވޮއިސް އެވެ.