ޕްލާސްޓިކް ކޮތަޅުން ނަގާ ފީއިން ލިބޭ އާމްދަނީ %35 ދަށަށް
ޕްލާސްޓިކް ކޮތަޅުން ނަގާ ފީއިން ދައުލަތަށް މިދިޔަ އަހަރު ލިބުނު އާމްދަނީ %35 ދަށަށް ހިނގައްޖެއެވެ.
މޯލްޑިވްސް އިންލަންޑް ރެވެނިއު އޮތޯރިޓީ، މީރާއިން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި މިދިޔަ އަހަރު ފްލާސްޓިކް ކޮތަޅު ފީއިން ދައުލަތަށް ވަދެފައިވަނީ 5.9 މިލިއަން ރުފިޔާ އެވެ. މިއީ 2024 ވަނަ އަހަރު ޕްލާސްޓިކް ކޮތަޅުން ނަގާ ފީއިން ލިބުނު 9.2 މިލިއަން ރުފިޔާގެ އާމްދަނީއަށްވުރެ ބޮޑުތަނުން ދަށް އަދަދެކެވެ.
2023 ވަނަ އަހަރުގެ އޭޕްރީލް 18 ވަނަ ދުވަހު ރާއްޖޭގައި ވަނީ ޕްލާސްޓިކް ކޮތަޅުތަކުން 2ރ. ގެ ފީއެއް ނަގަން ފަށާފައެވެ. މިއީ އާއްމުން ޕްލާސްޓިކް ކޮތަޅު ބޭނުންކުރާ ވަރު މަދު ކުރުމުގެ ބޭނުމުގައި ސަރުކާރުން އަޅާފައިވާ މުހިންމު ފިޔަވަޅެކެވެ.
ޕްލާސްޓިކް ކޮތަޅުން އެންމެ ބޮޑު ފީއެއް ލިބިފައިވަނީ 2023 ވަނަ އަހަރު އެވެ. އެ އަހަރު 12.6 މިލިއަން ރުފިޔާ ލިބިފައިވެއެވެ. އެހެންކަމުން މި ފީ ނަގަން ފެށި އަހަރާ އަޅާބަލާ އިރު މިދިޔަ އަހަރު ވަނީ ޕްލާސްޓިކް ކޮތަޅުގެ އާމްދަނީ %53 ދަށްވެފަ އެވެ.
ކޮތަޅުން ލިބޭ ފީ ދަށްވަނީ ޖީއެސްޓީ ރަޖިސްޓާ ކޮށްފައިވާ ވިޔަފާރިތަކުން، ކޮތަޅު ވިއްކާ ވަރު ދައްވުމުންކަމަށް މީރާއިން ވަނީ ބުނެފައެވެ. ސަބަބަކީ ވިޔަފާރިތަކުން ދޫކުރާ އަދި ވިއްކާ ޕްލާސްޓިކް ކޮތަޅުން ދެ ރުފިޔާގެ ފީ ނަގަން ފެށި ނަމަވެސް މީރާ އަށް އެ ފައިސާ ދައްކަން ޖެހެނީ ހަމައެކަނި ޖީއެސްޓީ ދައްކާ ފަރާތްތަކުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
