ސިފައިންނާއި ފުލުހުންނާއި ފަނޑިޔާރުންނަށް ހިލޭ ބޯހިޔާވަހިކަން ދޭނަން: ޤާސިމް
މި އަހަރުގެ ރިޔާސީ އިންތިޚާބުގައި ޖުމްހޫރީ ޕާޓީން އެކުލަވާލާފައިވާ ބޯހިޔާވަހިކަމުގެ ސިޔާސަތުގެ ތެރެއިން ސިފައިންނާއި ފުލުހުންނާއި ފަނޑިޔާރުންނަށް ހިލޭ ބޯހިޔާވަހިކަން ފޯރުކޮށްދެއްވާނެ ކަމަށް ޖޭޕީގެ ރިޔާސީ ކެންޑިޑޭޓު ޤާސިމް އިބްރާހިމް އިއުލާނުކުރައްވައިފި އެވެ.
މާމިގިލީގައި ބޭއްވި ޤާސިމް އިބްރާހިމްގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ޤާސިމް ވިދާޅުވީ ސިފައިންނާއި ފުލުހުންގެ ބޯހިޔާވަހިކަމަށް ކުރީ ސަރުކާރުތަކުން ވަނީ ވަރަށް ބޮޑަށް އިހުމާލުވެފައި ކަމަށެވެ.
އެގޮތުން ސިފައިންނާއި ފުލުހުންނަށް ޚާއްސަކޮށްގެން އަޅާ ފްލެޓުތަކުގެ މަސައްކަތްތައް ނުނިމި ދިގުލައިގެންދާއިރު، އެކަމުގެ ސަބަބުން އެ ފަރާތްތަކުން ބޮޑެތި ތަކުލީފުތަކެއް އުފުލަމުންދާކަން އެގިލައްވާކަމަށް ޤާސިމް ވިދާޅުވި އެވެ. އެކަން ފާހަގަކުރައްވާ ޤާސިމް ވިދާޅުވީ ޖޭޕީގެ ބޯހިޔާވަހިކަމުގެ ސިޔާސަތު އެކުލަވާލާފައިވާނީ ސިފައިންނާއި ފުލުހުންގެ އެ މައްސަލައަށް ދާއިމީ ޙައްލު ލިބިގެންދާނެ ގޮތަށް ވިސްނައިގެން ކަމަށެވެ.
އެގޮތުން ސިފައިންނާއި ފުލުހުންގެ ޚިދުމަތުގައި ތިއްބަވާ ބޭފުޅުންނަށް ޚާއްސަކޮށްގެން ޒަމާނީ ފެންވަރުގެ އެކޮމޮޑޭޝަން ބްލޮކެއް ބަންޑާރަކޮށީގައި އަޅުއްވާދެއްވާނެކަމަށް ޤާސިމް ވިދާޅުވި އެވެ. އަދި އެކަން ކުރައްވާނެ ގޮތުގެ ތަފްސީލުތައް ވެސް ޤާސިމް ވަނީ ހިއްސާކުރައްވާފަ އެވެ.
"އެކަން ކުރާނެ ގޮތަކީ، މިހާރު އޮތް ބަންޑާރަކޮށި އެއްބައި ހުސްކޮށްފައި އެތަން ބައިބަޔަށް ބަހާލާއިގެން އިމާރާތް ކުރުމުގެ މަސައްކަތް ކުރިއަށް ގެންދާނީ. ގެންގޮސްފަ އެބޭފުޅަކަށް ދިރިއުޅުމުގެ ކަންތައްތައް ހަމަޖައްސަން ދަތިވެފައިވާ ސިފައިންގެ ތެރޭގައި ގެދޮރުގެ ދަތިކަން އެއްވެސް އެހީތެރިކަމެއް ބޯހިޔާވަހިކަމެއް ނެތް ފަރާތްތަކަށް ދައުލަތުން ކުއްޔަކާއި ނުލާ ދޭނެކަމަށް، ސިފައިންނެކޭ އެއްގޮތަށް ފުލުހުންނަށް ވެސް އެ ޚިދުމަތް ދޭނަން"
ޖޭޕީގެ ލީޑަރު ޤާސިމް އިބްރާހިމް
ޤާސިމް ވިދާޅުވީ އެފަދަ އިމާރާތްތައް ޚާއްސަކުރާނީ ހަމައެކަނި މާލެއަށް ނޫން ކަމަށެވެ. އެގޮތުން ސިފައިންނާއި ފުލުހުން ޚިދުމަތުގައި ތިބި ސަރަހައްދުތަކުން ބޯހިޔާވަހިކަން ލިބޭނެ އިންތިޒާމުތައް ހަމަޖައްސާދެއްވާނެ ކަމަށާއި، އަދި ސިފައިންނާއި ފުލުހުންނަށް ބޯހިޔާވަހިކަން ފޯރުކޮށްދޭނީ މުޅިން ހިލޭކަމަށް ޤާސިމް ވިދާޅުވި އެވެ.
ޤާސިމް އިތުރަށް ވިދާޅުވީ ސިފައިންނާއި ފުލުހުންގެ އިތުރުން ފަނޑިޔާރުންނަށް ވެސް ހިލޭ ބޯހިޔާވަހިކަން ފޯރުކޮށްދެއްވާނެ ކަމުގެ ޔަގީންކަން ދެއްވާކަމަށެވެ.
ޖުމްހޫރީ ޕާޓީގެ ބޯހިޔާވަހިކަމުގެ ސިޔާސަތުގައި ހުރި ކަންކަމަށް ބަލާއިރު، ހިޔާ ފްލެޓުތަކުގެ ކުލި މާފުކޮށްދިނުން ވެސް ހިމެނެއެވެ. އަދި ރާއްޖޭގެ ރައްޔިތުންނަށް އެފޯޑަބަލް ހައުސިން ކަށަވަރުކޮށްދިނުމަށް ތަފާތު މަޝްރޫއުތައް ވެސް ހިންގުން ޕްލޭނުގައި ވަނީ ހިމަނާފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
