ޤައުމަށް ގައްދާރުވާ މީހުންގެ އަދަބު ކަނޑައަޅާ ތަންފީޒުކުރާނަން: އަލީ ވަހީދު

ޖުމްހޫރީ ޕާޓީގެ ވެރިކަމެއްގައި ޤައުމަށް ގައްދާރުވާ މީހުންގެ އަދަބު ޤާނޫނުލް އުގޫބާތުގައި ލިޔެ، އެކަން ތަންފީޒު ކުރާނެކަމަށް ޖުމްހޫރީ ޕާޓީގެ ލީޑަރު އަދި އެ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމްގެ އެޑްވައިޒަރު އަދި ކުރީގެ ޓުއަރިޒަމް މިނިސްޓަރު އަލީ ވަހީދު ވިދާޅުވެއްޖެ އެވެ.

އަލީ ވަހީދު މިފަދައިން ވިދާޅުވެފައި ވަނީ މާމިނގިލީގައި ރޭ ބޭއްވި ޤާސިމްގެ ރިޔާސީ ކެމްޕޭނު ޖަލްސާގައި ވާހަކަދައްކަވަމުން ނެވެ.

އަލީ ވަހީދު ވިދާޅުވީ ދިވެހިރާއްޖޭގެ މިނިވަންކަމަށް އޮތް ގޮންޖެހުންތަކުގެ ވާހަކަދައްކާއިރު އަވައްޓެރި އެއް ގައުމުގެ ވާހަކަ އަބަދުވެސް ދެއްކޭ ކަމަށެވެ. ވަކި ނަމެއް ހާމަނުކުރެއްވި ނަމަވެސް އަލީ ވަހީދުގެ ވާހަކައިގައި އިޝާރާތްކުރެއްވީ އަވައްޓެރި އިންޑިޔާއަށެވެ.

"ކަންނަންނޫރުން، މަލާބާރުން، ހޮޅިން، މި ހުރިހާ ނަމެއް ނިސްބަތްވަނީ އެއް ދިމާލަކަށް. އަޖައިބެއްނު. ސޯމާލިޔާއިން ވެސް ރަނގަޅެއް ނޫން ތޯ އައިސްލަން. ޗާގޯސްއިން ވެސް. އެކަމަކު އެއް ދިމާލަކުން"

އަލީ ވަހީދު

އޭނާ ވިދާޅުވީ އިންޑިއާއިން އަމަލުކުރަނީ، އަދި ކުރަމުން އައިސްފައިވަނީ އެމީހުންނަށް އެންމެ މަސްލަހަތު ބޮޑު ނުވަތަ ފައިދާ ބޮޑު ގޮތަށް ބަލައިގެންކަމަށެވެ. އަދި އެއީ އެމީހުން ކަންކުރާނެ ވެސް ގޮތް ކަމަށެވެ.

"އެބޭފުޅުން އެކަން ކުރަން ޖެހޭ. އެއީ އެބޭފުޅުންގެ ސެކިއުރިޓީ ޒޯނު ހިމަނަނީ ދިވެހިރާއްޖެ ހިމަނައިގެން"

އަލީ ވަހީދު

އެކަން ފާހަގަކުރައްވާ އަލީ ވަހީދު ވިދާޅުވީ މައްސަލައަކަށް ވަނީ ދިވެހިންގެ ތެރެއިން ޚާއިނުން ނިކުމެ މި ގައުމު ދޫކޮށްލަން އެއްބަސްވާތީ ކަމަށެވެ. އަލީ ވަހީދު ވިދާޅުވީ ގައުމަށް ޚިޔާނާތްތެރިވާ މީހުންނަށް އަދަބުދޭން ޖެހޭ ކަމަށެވެ.

އެގޮތުން ޖުމްހޫރީ ޕާޓީގެ ވެރިކަމެއްގައި ގައުމަށް ގައްދާރުވާ މީހުންނަށް ދޭނެ އަބަދު ކަނޑައަޅާ އެ އަދަބު ތަންފީޒު ކުރާނެކަމަށް އަލީ ވަހީދު ވިދާޅުވި އެވެ.

"އަޅުގަނޑުމެންގެ ވެރިކަމެއްގައި އިރާދަކުރެއްވިއްޔާ ޤާނޫނުލްއުގޫބާތުގައި ގައުމަށް ގައްދާރުވާ މީހުންނަށް ދޭ އަދަބުލިޔެ އަޅުގަނޑުމެންގެ މެނިފެސްޓޯގައި އެކަން ތަންފީޒު ކުރާނަން"

އަލީ ވަހީދު

އަލީ ވަހީދު ވިދާޅުވީ ޖުމްހޫރީ ޕާޓީގެ ވެރިކަމެއްގައި ގައުމަށް ގައްދާރުވުމުގެ ފުރުސަތު އެއްވެސް މީހަކަށް ނުލިބޭނެ ކަމަށެވެ.

ޖުމްހޫރީ ޕާޓީން ރިޔާސީ އިންތިޚާބަށް ނިކުންނައިރު، އެންމެ އިސްކަމެއް ދެނީ މިނިވަންކަމާއި އިސްތިގުލާލު ހިމާޔަތްކުރުމަށްކަމަށް އެ ޕާޓީން ވަނީ ވިދާޅުވެފަ އެވެ.

އެބޭފުޅުން އެކަން ފާހަގަކުރައްވަމުން ދިޔަ ނަމަވެސް، ޕާޓީގެ ލީޑަރު ޤާސިމް އިބްރާހިމް މީގެ ކުރިން ވިދާޅުވެފައި ވަނީ އިންޑިއާ ސިފައިން ގަވައިދާއި ޚިލާފަށް ރާއްޖޭގެ އެކި ކަންކޮޅުތަކުގައި ތިއްބަވާކަން އެނގިވަޑައިނުގަންނަވާ ކަމަށެވެ. އަދި ފާޅުގައި އިންޑިއާ ސިފައިން މި ގައުމުން ބޭލުމަށް ޤާސިމް ގޮވާލައްވާފަ އެއް ވެސް ނުވެއެވެ.