ވެހެމުންދާ ބޯ ވާރޭއާއި އެކު ޙާލުގައި ޖެހުނު މީހުންގެ ޙާލަތު ގޯހުން ގޯހަށް!
ޣައްޒާއަށް ވެހެމުންދާ ބޯ ވާރޭއާއި އެކު ޣައްޒާ ހަނގުރާމައިގައި ޙާލުގައި ޖެހުނު މީހުންގެ ޙާލަތު ގޯހުން ގޯހަށް ހިނގައްޖެއެވެ.
އަލްޖަޒީރާގައި ބުނެފައިވަނީ ޖަބަލިއްޔާ ކޭމްޕްގައި ދިރިއުޅެމުން ދިޔަ މީހުން އިޒްރާއިލްގެ ހުއްޓުމެއްނެތް ނުރައްކާތެރި ހަމަލާތަކުން ސަލާމަތް ވުމަށް ޖަބަލިއްޔާ ދޫކޮށް ދިއުމަށް ދަތުރު ފަށައިފައިވަނީ ވެހެމުންދިޔަ ބޯ ވާރޭގެ ތެރެއިން ކަމަށެވެ.
ޣައްޒާގައި ހަރަކާތްތެރިވާ އަލްޖަޒީރާގެ ނޫސްވެރިޔަކު ނަގައިފައިވާ ވީޑިއޯ އަކުން ދައްކަނީ އުމުރުން ދުވަސްވީ މީހުންނާއި އަންހެނުންނާއި ކުޑަކުދިން އެމީހުންނަށް ބޭނުންވާ ސާމާނުތައް ހިފައިގެން ވާރޭ އިން ރައްކާތެރިވާނެ ގޮތެއް ނެތި ފައިމަގުގައި ދަތުރުކުރަމުންދާ މަންޒަރެވެ.
ފާއިތުވި ދެދުވަހުވެސް ޣައްޒާއަށް ދަނީ ބޯކޮށް ވާރޭ ވެހެމުންނެވެ.
އަލްޖަޒީރާގައި ރިޕޯޓް ކޮށްފައިވާ ގޮތުން ޖަބަލިއްޔާ ދޫކޮށް ފައިމަގުގައި ރައްކާތެރިކަން ހޯދުމަށް ދަތުރު ފަށައިފައިވާ މީހުންނަކީ އަބޫ ހުސެއިން ސްކޫލްގައި ވަގުތީ ހިޔާވަހިކަން ހޯދަމުންދިޔަ މީހުންނެވެ. އަދި އެމީހުން އެތަން ދޫކޮށް ނުކުމެފައިވަނީ އިޒްރާއިލްގެ ހަމަލާތައް އެސްކޫލަށް އަމާޒުވާން ފެށުމުންނެވެ.
ވިއްސާރަމޫސުމުގެ ދުވަސް ވަރާއި ދިމާވުމުން ޣައްޒާގެ ޙާލަތާއި މެދު ކަންބޮޑުވުން މިވަނީ އިތުރުވެފައެވެ. ޙާލުގައި ޖެހިފައިވާ މީހުން ބޯހިޔާ ވާނެ ގޮތެއް ނެތި ބަނޑުހައިކަން މަތީ ތިބި މީހުން ގެ ޙާލަތު ވަނީ ވަރަށް ބޮޑަށް ގޯސްވެފައެވެ. ވިއްސާރަ އާއި އެކު ފެންބޮޑުވުން ކުރިމަތިވެ ބަލިމަޑުކަން ފެތުރިދާނެ ކަމުގެ ބިރު މިހާރު ވަނީ ބޮޑުވެފައެވެ.
ޣައްޒާ ހަނގުރާމަގައި މިހާތަނަށް 1.9 މިލިއަން މީހުން ވަނީ ގެދޮރު ގެއްލިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
