މިހެން ދާނަމަ ނޮވެމްބަރު މެދަކާ ހަމައަށް ވަރަށް ގިނަ ސިއްހީ ޚިދުމަތް ހުއްޓުމަކީ އެކަށީގެންވާކަމެއް: ފިރުޒުލް

ޞިއްޙީ ދާއިރާގެ ކަންކަން މިހާރު ދާ ގޮތަށް ކުރިއަށްދާ ނަމަ، މި ނޮވެމްބަރު މަހުގެ މެދާއި ހަމައަށް އަންނަ އިރު، ބައެއް ހެލްތު ސެންޓަރު ތަކާއި ހޮސްޕިޓާ ތަކުންދޭ ޚިދުމަތްތައް ހުއްޓުމަކަށް އައިސްދާނެ ކަމަށް އިންތިޚާބީ ރައީސުލްޖުމްހޫރިއްޔާ ގެ އޮފީހުގެ ތަރުޖަމާނު މުހައްމަދު ފިރުޒުލް ވިދާޅުވެއްޖެއެވެ.

އިންތިޚާބީ ރައީސްގެ އޮފީހުގެ ފަރާތުން ސިލްސިލާކޮށް ބާއްވާ ނޫސްވެރިންގެ ބައްދަލުވުމުގެ ތެރެއިން މިއަދު ބޭއްވި ބައްދަލުވުމުގައި ވާހަކަ ދައްކަވަމުން ފިރުޒުލް ވަނީ، އިންތިގާލީ ކޮމިޓީތަކުން މިހާރު ކުރަމުންދާ މަސައްކަތްތަކުން، ބައެއް ދާއިރާ ތަކާއި މުވައްސަސާ ތަކުގައި އެބޭފުޅުން ކަންބޮޑުވާ ކަންތައްތައް ހުރިކަން ފާހަގަކުރައްވާފައެވެ.

އެގޮތުން ފިރުޒުލް ވިދާޅުވީ، ސިއްހީ މަރުކަޒުތަކާއި ހޮސްޕިޓަލްތަކަށް ބޭނުންވާ ކޮންޒިއުމަބަލްސްއަކީ، ގަވާއިދުން ވަކި އުސުލުން އޯޑަރުކޮށް ސްޓޮކް މެއިންޓެއިން ކުރަންޖެހޭ ތަކެތި ކަމަށާ، ސިއްހީ ދާއިރާގައި މިހާރު އަމަލު ކުރަމުންދާ އުސޫލުގެ މަތިން ކޮންމެ އަހަރަކު ދެފަހަރު އެ ތަކެއްޗަށް ޕްރީ-އޯޑަރ ކޮށްގެން ރާއްޖެ ގެންނަންޖެހޭ ކަމަށެވެ.

ނަމަވެސް މިއަހަރުގެ މިހާތަނަށް އައި އިރުވެވެސް 2 ވަނަ ހަމަސްދުވަހަށް ބޭނުންވާ ތަނެތި އޯޑަރުކޯށްފައިނުވާކަން ފާހަގަކުރައްވައި ފިރުޒުލް ވަނީ ކޮންޒިއުމަބަލްސް ނެތީގެން ބައެއް ސިއްޙީ މަރުކަޒުތަކާއި، ހޮސްޕިޓަލްތަކުން ޚިދުމަތް ނުދެވި ޚިދުމަތް ދިނުން ހުއްޓުމަކަށް އަންނަމުންދާ ކަމަށް ވިދާޅުވެފައެވެ.

"އަޅުގަނޑުމެންނަށް ފާހަގަކުރެވޭ މިހާރުވެސް ހެލްތު މިނިސްޓްރީގެ ދަށުން ހިންގަމުންދާ ހޮސްޕިޓާތަކާއި ޞިއްޙީ މަރުކަޒުތަކުގެ ޚިދުމަތްތައް ހުއްޓުމަކަށް އަންނަމުންދާކަން. އަދި ވަރަށް ބޮޑަށް ފާހަގަކުރެވޭ ކަމަކީ މިހާލަތު މިގޮތަށް ދެމިގެން ގޮސްފިނަމަ ނޮވެންބަރު މަހާ ހަމައަށް އަންނަންވާއިރަށް ނުވަތަ ނޮވެންބަރު މަހުގެ މެދަކާ ހަމައަށް ދާއިރަށް މި ހޮސްޕިޓާތަކާއި ހެލްތު ސެންޓަރުތަކުގެ ދެމުންދާ ވަރަށް ގިނަ ޚިދުމަތްތައް އެކީ އެކައްޗަކަށް ހުއްޓުމަކީ އެކަށީގެންވާ ކަމެއް،"

އިންތީޚާބީ ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުހައްމަދު ފިރުޒުލް

ފިރުޒުލް ވިދާޅުވީ، ކޮންޒިއުމަބަލްގެ އިތުރުން ލެބޯޓްރީއަށް ބޭނުންވާ ވަސީލަތްތައްވެސް ބައެއް ސިއްޙީ މަރުކޒުތަކާއި ހޮސްޕިޓަލްތަކުން ހުސްވަމުންދާއިރު މިހާރު އެތަން ތަނުން ފަރުވާދެމުން އަންނަނީ އެމަޖެންސީ ސްޓޮކް ބޭނުންކޮށްގެންކަމަށެވެ.

އަދި މިހާތަނަށް އައި އިރުވެސް ޕްރީ އޯޑަރ ކުރެވިފައި ނުވަނީ، ބަޖެޓްގެ ތެރެއިން ހަމަޖެހެންޖެހޭ ފައިސާ ހަމަޖެހިފައިވާ ނުވާތީކަންވެސް ފިރުޒުލް ފާހަގަކުރެއްވިއެވެ.

މީގެ އިތުރުން، ފިރުޒުލް ވިދާޅުވީ، އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގައި ޚާއްޞަ ބަލިތަކަށް ފަރުވާ ދިނުމަށް ޤާއިމުކޮށްފައިވާ މަރުކަޒުތަކުގެ ތެރެއިން، ބައެއް މަރުކަޒުތަކަކީ ބޭރުގެ ހޮސްޕިޓާތަކާ ގުޅިގެން ހިންގާ މަރުކަޒުތައް ކަމަށެވެ. އެގޮތުން ހިތުގެ ބަލީގެ މަރުކަޒާއި ނާރުގެ ބަލީގެ މަރުކަޒު ހިންގާ ބޭރުގެ ކުންފުންޏަށް ދައްކަންޖެހިފައި ހުރި ބިލުތަކުގެ ތެރެއިން ނުދައްކައި 5.3 މިލިއަން ޑޮލަރު ނުވަތަ 81.7 މިލިއަން ރުފިޔާ ހުރިކަން ފާހަގަވެފައިވާކަމަށް ފިރުޒުލް ވިދާޅުވިއެވެ.

މި ބިލުތަކުގެ ތެރެއިންވެސް އެންމެ ގިނައީ އެ ސެންޓަރުތަކުން ފޯރުކޮށްދޭ ޚިދުމަތްތަކަށް ބޭނުންވާ ކޮންޒިއުމަބަލްސްއާ ގުޅުންހުރި ބިލުތައް ކަމަށާއި، އޭގެ ތެރޭގައި ހިތުގެ ބަލިތަކަށް ފަރުވާ ކުރުމަށް ބޭނުންވާ މުހިންމު ކޮންޒިއުމަބަލްސް ހުރިކަން ފިރުޒުލް ފާހަގަކުރެއްވި އެވެ. އަދި އެ ފައިސާ ނުދައްކައި ހުރުމުގެ ސަބަބުން އެ ޚިދުމަތްތައް ހުއްޓިދާނެތީ ކަންބޮޑުވެވަޑައިގަންނަވާކަމަށް އޭނާ ވިދާޅުވިއެވެ.