ނަރުހުން ތަމްރީނުކުރުމަށް ވިލާއިން ދިން ސްކޮލަޝިޕަށް ހުށަހެޅުން ހޮނިހިރު ދުވަހުގެ ނިޔަލަށް
ނަރުހުން ތަމްރީނުކުރުމަށް ވިލާ ފައުންޑޭޝަނުން ދިން ސްކޮލަޝިޕަށް އެދެން، ހޮނިހިރު ދުވަހުގެ ނިޔަލަށް ފުރުސަތު ހުޅުވާލާފައި ވާކަމަށް މޯލްޑިވިއަން ނަރސަސް އެސޯސިއޭޝަނުން ބުނެފިއެވެ.
ވިލާ ފައުންޑޭޝަނުން ނަރސަސް އެސޯސިއޭޝަނަށް ސްކޮލަޝިޕް ދޭން ފެށުން ލޯންޗް ކުރުމަށް މި މަހު ކުރީކޮޅު ބޭއްވި ރަސްމިއްޔާތުގައި ނަރސަސް އެސޯސިއޭޝަނަށް ތިން ސްކޮލަޝިޕް ވަނީ ހަވާލުކޮށްފައެވެ. އަދި ކޮންމެ އަހަރަކުވެސް ތިން ސްކޮލަޝިޕް ދިނުމަށް ވަނީ ނިންމާފައެވެ.
މި ސްކޮލަޝިޕަށް ނަގާނީ ދެ އަންހެން ދަރިވަރުންނާއި އެއް ފިރިހެން ދަރިވަރެކެވެ.
މި ސްކޮލަޝިޕަށް އެދި ހުށަހަޅާނީ އީމެއިލް މެދުވެރިކޮށް، [email protected] އަށް ކަމަށް ނަރސަސް އެސޯސިއޭޝަނުން މައުލޫމާތު ދިނެވެ.
މި ސްކޮލަޝިޕްގެ ދަށުން، ވިލާ ކޮލެޖްގައި ޑިޕްލޮމާ އިން ނަރސިންގް ކިޔެވުމަށް ޓިއުޝަންފީ ދައްކައިދޭނީ ވިލާ ފައުންޑޭޝަނުންނެވެ. އަދި ސްކޮލަޝިޕްގެ ލިޔެކިޔުންތަކުގެ ބައި ހަމަޖައްސާނީ ނަރސަސް އެސޯސިއޭޝަނުންނެވެ.
މި އަހަރުގެ މޭ އިންޓޭކަށް ވިލާ ކޮލެޖުން މިހާރު ވަނީ ފުރުސަތު ހުޅުވާލާފައެވެ. ކޯހަށް ފުރުސަތު ލިބުމާއެކު ކޯހުގެ އޮފަރ ލެޓަރ އާއެކު ނަރސަސް އެސޯސިއޭޝަނަށް ހުށަހެޅުމުން ކުދިން ނެގުމުގެ މަސައްކަތް ކުރިއަށް ގެންދާނެ ކަމަށް އެ އެސޯސިއޭޝަނުން މައުލޫމާތު ދެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
