ރަސްމީ ދަތުރުފުޅެއްގައި ޔޫއޭއީގެ އެންވަޔަރަންމެންޓް މިނިސްޓަރ ރާއްޖެ ވަޑައިގެންފި

ރަސްމީ ދަތުރުފުޅެއްގައި ޔުނައިޓެޑް އަރަބް އެމިރޭޓްސް (ޔޫއޭއީ) ގެ މިނިސްޓަރ އޮފް ކްލައިމެޓް ޗޭންޖް އެންޑް އެންވަޔަރަންމަންޓް ހަރ އެކްސެލެންސީ މަރްޔަމް ބިންތު މުޙައްމަދު އަލް މުހެއިރީ ރާއްޖެ ވަޑައިގެންފިއެވެ.

މަރްޔަމްގެ މި ދަތުރުފުޅަކީ ދެ ދުވަހުގެ މުއްދަތަށް ކުރެއްވި ދަތުރުފުޅެކެވެ.

މި ދަތުރުފުޅުގައި ޔޫއޭއީގެ އެންވަޔަރަންމަންޓް މިނިސްޓަރ ވަނީ މިއަދު ހެނދުނު މިނިސްޓަރ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީ އާމިނަތު ޝައުނާއާ ބައްދަލުކުރައްވާފައެވެ.

މި ބައްދަލުވުމުގައި، ތިމާވެއްޓާއި ކްލައިމެޓް ޗޭންޖުގެ ދާއިރާއިން ގުޅިގެން ކުރެވިދާނެ މަސައްކަތްތަކާ ގުޅޭގޮތުން ފުޅާދާއިރާއެއްގައި ދެ ވަޒީރުން ވަނީ މަޝްވަރާކުރައްވާފައެވެ.

އޭގެ ތެރޭގައި، ތިމާވެށީގެ ގޮތުން ޚާއްސަ ސިފަތައް ލިބިފައިވާ ސަރަހައްދުތައް ހިމާޔަތްކޮށް ބެލެހެއްޓުމާއި، މުރަކަ ދިރުވާ އާލާކުރުމާއި، ދެ ގައުމުގެ ގުޅުން ހުރި މުއައްސަސާތަކުގެ މެދުގައި ގުޅުންބަދަހިކުރަން މަސައްކަތް ކުރުން ހިމެނެއެވެ.

މި ދަތުރުފުޅުގައި، މިއަދު މިނިސްޓަރ އޮފް ފިޝަރީޒް، މެރިން ރިސޯސް އެންޑް އެގްރިކަލްޗަރ ޑރ. ހުސައިން ރަޝީދު ހަސަންއާއި ވެސް ވަނީ ބައްދަލުކުރައްވާފައެވެ.

އަދި ޔޫއޭއީ އާއި ދިވެހި ދެމެދު ދަނޑުވެރިކަމާއި ފުޑް ސެކިއުރިޓީގެ ދާއިރާއިން ގުޅުން ބަދަހިކުރުމުގެ ގޮތުން "މެމޮރަންޑަމް އޮފް އަންޑަސްޓޭންޑިންގ ބިޓްވީން ދަ ގަވަރމަންޓް އޮފް މޯލްޑިވްސް އެންޑް ދަ ގަވަރމަންޓް އޮފް ދަ ޔުނައިޓެޑް އަރަބް އެމިރޭޓްސް އޮން އެންހޭންސިންގ ފުޑް ސެކިއުރިޓީ" ގައި ސޮއިކުރުމަށް ވަނީ ހަމަޖެހިފައެވެ.

އެ ކަމަނާގެ މިދަތުރުފުޅުގައި މިއަދު ރާއްޖޭގެ ރައީސުލްހުމްހޫރިއްޔާ އިބްރާހީމް މުޙައްމަދު ޞާލިޙް ގެ އަރިހަށް އިހްތިރާމްގެ ޒިޔާރަތެއްވެސް ވަނީ ކުރައްވާފައެވެ.