ބޮސްނިޔާ ކޮޅަށް ރޮނާލްޑޯ ކާމިޔާބުކުރި ދެލަނޑާއެކު، ޕޯޗުގަލްއަށް ތަފާތުބޮޑު މޮޅެއް

ޔުއެފާ ޔޫރޯ 2024 ކޮލިފައިންގ ގްރޫޕް ޖޭގައި ހޯމަ ދުވަހުގެ ރޭ ރަށުން ބޭރުގައި ބޮސްނިއާ އާއި ދެކޮޅަށް ކުޅުނު މެޗު 5-0 ގެ ނަތީޖާއަކުން ޕޯޗުގަލް އިން ކާމިޔާބުކޮށްފިއެވެ.

މިމެޗަށް ނުކުތްއިރު ވެސް އަންނަ އަހަރުގެ ޖަރުމަނުގައި ބޭއްވުމަށް ހަމަޖެހިފައިވާ ޔޫރޯއަށް ކޮލިފައިވެފައިވާ ޕޯޗުގަލް އިން މިމެޗުގެ ފުރަތަަމަ ހާފުގައި ވަނީ ތަފާތު މޮޅު ކުޅުމެއް ދައްކައިދީފައެވެ. އެގޮތުން މެޗުގެ ވަރަށް ކުރީކޮޅު އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ.

މިލަނޑު މެޗު ފެށިގެން ފަސްވަނަ މިނެޓްގައި ކާމިޔާބުކޮށްދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ ބޮސްނިއާގެ ޕެނަލްޓީ އޭރިއާ ތެެރެއިން އެޓީމުގެ ކުޅުންތެރިއެއްގެ އަތުގައި ބޯޅަ ޖެހުމުން ރެފްރީ ޕޯޗުގަލްއަށް ދިން ޕެނަލްޓީގައި އޭނާ ކާމިޔާބުކޮށްދިން ލަނޑެކެވެ.

މިމެޗުގައި ޕޯޗުގަލް ޓީމުން ކާމިޔާބުކުރި ދެވަނަ ލަނޑު ފުރަތަމަ ހާފުގެ 20 ވަނަ މިނެޓުގައި ކާމިޔާބުކޮށްދިނީ ވެސް ރޮނާލްޑޯ އެވެ. މިއީ މިހަފްތާގެ ތެރޭގައި ގައުމީ ޓީމަށް ކުޅުން ދެ މެޗުގައި ރޮނާލްޑޯ ކާމިޔާބުކުރި ހަތަރުވަނަ ލަނޑެވެ.

ފުރަތަަމަ ހާފު ނިމުމުގެ ކުރިން ޕޯޗުގަލް އިން އިތުރު ތިން ލަނޑު ކާމިޔާބުކުރިއިރު އެޓީމުގެ ތިންވަނަ ލަނޑު ފުރަތަމަ ހާފުގެ 25 ވަނަ މިނެޓުގައި ކާމިޔާބުކޮށްދިނީ ބުރޫނޯ ފެނާންޑޭޒް އެވެ. އަދި އެޓީމުގެ ހަތަރުވަނަ ލަނޑު ފެނާންޑޭޒް ތަނަވަސްކޮށްދިން ފުރުސަތެއްގައި ޖޮއާއު ކަންސެލޯ ކާމިޔާބުކުރި އިރު އެޓީމުގެ ފަސްވަނަ ލަނޑު ފުރަތަމަ ހާފުގެ 41 ވަނަ މިނެޓުގައި ކާމިޔާބުކޮށްދިނީ ބާސެލޯނާގެ ފޯވާޑް ޖޮއާއު ފެލިކްސް އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 5-0 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.

މެޗުގެ ދެވަަނަ ހާފުގައި ޕޯޗުގަލް ޓީމުން ގިނަވަގުތު ބޯޅަ ހިފަހައްޓައިގެން މެޗު ޑޮމިނޭޓުކުރި ނަމަވެސް މިހާފުގައި އެޓީމަށް މާރަގަޅު ހުސް ފުރުސަތުތަކެއް ތަނަވަސްކުރެވިފައެއް ނުވެއެވެ. އަދި މިހާފުގެ ކުރީކޮޅު ރޮނާލްޑޯ ބަދަލުކުރިއިރު، މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 5-0 ގެ ނަތީޖާއަކުން ޕޯޗުގަލް ކުރީގައި އޮވެގެންނެވެ.

މިމެޗުން ލިބުނު ތިން ޕޮއިންޓާއެކު ކުޅުނު 8 މެޗުން ވެސް މޮޅުވެ 24 ޕޮއިންޓާއެކު ގުރޫޕްގެ އެއްވަނައިގައި މިވަގުތު އޮތީ ޕޯޗުގަލް އެވެ. އަދި މިމެޗުން ބަލިވި ބޮސްނިޔާއަށް 8 މެޗުން 9 ޕޮއިންޓް ލިބިފައިވާއިރު، ކޮލިފައިންގައި ބާކީ ދެ މެޗު އޮއްވައި އެޓީމު މުބާރާތަށް ކޮލިފައިވުމުގެ ފުރުސަތު ވަނީ ގެއްލިފައެވެ.