ތިން އަހަރުން 25 ބިލިއަން ރުފިޔާ، ބިލުތަކަށް ދައްކައިފިން: ރައީސް
އަމިއްލަ ކުންފުނިތަކާއި އެކި ފަރާތްތަކަށް ފާއިތުވި ތިން އަހަރު ތެރޭ 25 ބިލިއަނަށްވުރެ ގިނަ ރުފިޔާ ދައްކާފައިވާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ސަރުކާރަށް ތިން އަހަރު ފުރުމާއި ގުޅިގެން މިރޭ ސެންޓްރަލް ޕާކުގައި އޮތް ޖަލްސާގައި ވާހަކަފުޅު ދައްކަވަމުންނެވެ. ވަރަށް ގިނަ އަދަދެއްގެ ބަޔަކު ބައިވެރިވި މި ޖަލްސާގައި ރައީސް ވަނީ މިދިޔަ ތިން އަހަރު ސަރުކާރުން ހާސިލުކޮށްފައިވާ މުހިންމު ކަންކަން ހިމެނޭހެން ޕްރެޒެންޓޭޝަނެއްގެ ގޮތުގައި އެކަންކަން ހިއްސާކުރައްވާފަ އެވެ.
އެއް ކަމަކަށް އެމަނިކުފާނު ފާހަގަ ކުރެއްވީ ކުރީ ސަރުކާރުން ދައުލަތުގެ އެކި މަސައްކަތްތައް ކުރުވުމަށް ފަހު އަމިއްލަ ކުންފުނިތަކަށް ނުދީ ހުރި ފައިސާގެ މައްސަލަ ހައްލުކުރެއްވުމަށް ކުރެއްވި މަސައްކަތްތަކެވެ. އެމަނިކުފާނު ވިދާޅުވީ ކުރީ ސަރުކާރުން ނުދައްކާ ހުރި ބިލްތައް ހިމެނޭހެން އަމިއްލަ ކުންފުނިތަކާއި އެކި ފަރާތްތަކަށް ފާއިތުވި ތިން އަހަރު ތެރޭ 25 ބިލިއަނަށްވުރެ ގިނަ ރުފިޔާ ދައްކާފައިވާ ކަމަށެވެ.

ރައީސް ވިދާޅުވީ އެ ފައިސާ ކުންފުނިތަކަށް ދެއްކީ ބޭރުގެ ދަރަނިވެސް ދައްކަމުން އިގްތިސާދު މެނޭޖްކުރައްވަމުން ކަމަށެވެ. އަދި ހަރަދުތައް ބޮޑުވި ނަމަވެސް ބަޖެޓު ޑެފިސިޓްވެސް ހިފަހައްޓަމުން ކަމަށެވެ. މިއީ ވަރަށް ބޮޑު ކާމިޔާބީއެއް ކަމުގައި އެމަނިކުފާނު ފާހަގަ ކުރެއްވި އެވެ.
އަދި މިއީ އަމިއްލަ ކުންފުނިތައް އަލުން ކޮޅަށް ތެދުވެ ކުރިއަށްދާން ލިބުނު ވަރަށް ފަހި ފުރުސަތެއް ކަމުގައި ވިދާޅުވި އެވެ.
ރައީސްގެ ވާހަކަފުޅުގައި 2023 ވަނަ އަހަރު އެމަނިކުފާނު ސަރުކާރާ ހަވާލުވެވަޑައިގެންނެވިއިރު ގައުމީ އުފެއްދުންތެރިކަމުގެ ނިސްބަތުން ދަރަނި ހުރީ 124 އިންސައްތާގައިކަން ފާހަގަކުރެއްވި އެވެ. އެހެން ކަމުން ސަރުކާރުން އެންމެ ބޮޑު އިސްކަންދިނީ ކުރީ ސަރުކާރުން ވާރުތަވީ ނުދައްކައި ހުރި ބިލުތަކަށް ފައިސާ ދައްކަވައި ހަލާސްކުރެއްވުމަށް ކަމަށް ވިދާޅުވި އެވެ.

ތިން އަހަރުވީއިރު އެކަމުގައި ވަރަށް ރަނގަޅު ނަތީޖާތަކެއް ނެރެވިފައިވާ ކަމުގައި އެމަނިކުފާނު ވިދާޅުވި އެވެ.
"މިދިޔަ އަހަރާއި އޭގެ ކުރީ އަހަތުގައި ނުދައްކާހުރި ބިލްތަކުގެ ތެރެއިން 1.55 ބިލިއަން ރުފިޔާގެ ބިލް ދައްކައިފިން. އަދި މިދިޔަ ތިން އަހަރުގެތެރޭގައި އެކިއެކި ކުންފުނިތަކުގެ ބިލްތަކަށް އެކަނިވެސް 25 ބިލިއަން ރުފިޔާގެ ޕޭމަންޓް ހަދައިފިން،" ރައީސް ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް