އޮގަސްޓް މަހު ބާޒާރުގެ އަގުތައް 1.15 އިންސައްތަ ދަށަށް ގޮސްފި

ކަރަންޓާއި ވައިގެ ދަތުރުފަތުރުގެ ޚަރަދުތައް ދަށަށްދިއުމާ ގުޅިގެން މިދިޔަ އޮގަސްޓް މަހު ރާއްޖޭގެ ކޮންސިއުމާ ޕްރައިސް އިންޑެކްސް (ސީޕީއައި) ޖުލައި މަހާ އަޅާބަލާއިރު 1.15 އިންސައްތަ ދަށަށް ގޮސްފައިވާ ކަމަށް މޯލްޑިވްސް ބިއުރޯ އޮފް އެސްޓެޓިސްޓިކްސް (އެމްބީއެސް) ގެ ތަފާސް ހިސާބުތަކުން ދައްކައިފިއެވެ.

ބާޒާރުގައި މުދަލާއި ހިދުމަތުގެ އަގުތައް ދައްކުވައިދޭ  ތަފާސްހިސާބުތަކަށް ބަލާއިރު އޮގަސްޓް މަހު ކަރަންޓުގެ އަގު %3.21 ދަށްވެފައިވެއެވެ. ހަމައެއާ އެކު, ވައިގެ ދަތުރުފަތުރަށް ދައްކާ އަގުތައް %2.80 ކުޑަވެފައިވާއިރު ދުންފަތުގެ ބާވަތްތަކުގެ އަގު %25.45 ވެއްޓިފައިވެއެވެ. މި ތިން ދާއިރާގެ އަގުތައް ވެއްޓުމުގެ ސަބަބުން ޖުމްލަ އިންޑެކްސް ތިރިއަށް ޖެހިފައިވެއެވެ.

ނަމަވެސް، ބައެއް ކާބޯތަކެއްޗާއި ޚިދުމަތްތަކުގެ އަގު ވަނީ މައްޗަށް ގޮސްފައެވެ. ކިރާއި ކިރުގެ ބާވަތްތަކާއި ބިހުގެ އަގު %1.99 ބޮޑުވެފައިވާއިރު، މޭވާއާއި ތަރުކާރީން %1.19 އަދި މަހުގެ ބާވަތްތަކުން %0.83 ގެ އުފުލުމެއް ފެނިފައިވެއެވެ. ޚިދުމަތްތަކަށް ބެލި ނަމަވެސް ގެސްޓްހައުސްތަކުގެ އަގު %2.72 އަށާއި މުވާސަލާތީ ޚިދުމަތް %2.23 އަށާއި ޞިއްޙީ ޚިދުމަތް %0.99 އަށާއި އަދި ކެއިންބުއިމުގެ ތަންތަނާއި ހޮޓާތަކުގެ އަގު %0.68 މައްޗަށް ގޮސްފައިވެއެވެ.

މާލެއާއި އަތޮޅުތެރެ ވަކިން ބެލި ނަމަވެސް ސީޕީއައި ވަނީ ދެ ސަރަޙައްދުގައި ވެސް ދަށަށް ގޮސްފައެވެ. މާލޭގެ އަގުތައް ޖުލައި މަހާ އަޅާބަލާއިރު %1.57 ދަށަށް ގޮސްފައިވާއިރު، އަތޮޅުތެރޭގެ އަގުތައް ވަނީ %0.54 ދަށްވެފައިވެއެވެ.