ރަސޫލާއަށް ނިސްބަތްކޮށް ދޮގު ހެދުމުން ޢިމްރާން ކޮންމެފަދަ ކަމެއްކޮށްފާނެކަން ސާބިތުވޭ: ޖަމީލް

ރަސޫލާ ޞައްލައްالله ޢަލައިހި ވަސައްލަމް އަށް ނިސްބަތްކޮށް ދޮގުހެދުމުން ޢިމްރާން ކޮންމެފަދަ ކަމެއްކޮށްފާނެ ކަން ސާބިތުވާ ކަމަށް ކުރީގެ ނައިބު ރައީސް މުޙައްމަދު ޖަމީލް އަޙްމަދު ވިދާޅުވެއްޖެއެވެ.

ޖަމީލް މިހެން ވިދާޅުވެފައިވަނީ އޭނާ ކުރެއްވެވި ޓްވީޓެއްގައެވެ.

"ޢަދާލަތުގެ ރައީސް ޢިމްރާނު ކީރިތި ރަސޫލާއަށް ނިސްބަތްކޮށް ޙަދީޘެއް އުފެއްދުމަށްފަހު އެއީ އޮޅުމެއްކަމަށްވެސް ނުބުނުމުން އެނގެނީ ކޮންމެފަދަ ކަމެއްކޮށް، ފިތުނަ އުފައްދަން ފޫގަޅާފައިވާކަން" ޖަމީލް ވިދާޅުވެފައިވެއެވެ.

މީގެ އިތުރުން ޖަމީލް ވަނީ މިފަދަ ދޮގުވެރިންގެ ފަސާދައަށް ސަމާލުވުމަށް އިލްތިމާސްކުރާ ކަމަށް ވިދާޅުވެފައެވެ.

ޖަމީލް މިހެން ވިދާޅުވެފައިމިވަނީ ށ. ފޯކައިދޫގައި ބޭއްވި ކެމްޕޭނު ޖަލްސާގައި، ކެމްޕެއިންގައި ނުނިދައި ހޭލައި މަސައްކަތްކުރުމަށް ހިތްވަރުދިނުމަށް ޢިމްރާން ކީރިތި ރަސޫލާ ޞައްލަالله ޢަލައިހި ވަސައްލަމަގެ ހަދީޘް ބަސްފުޅެއްކަމަށް ވިދާޅުވި ބަސްފުޅަކީ ޙަދީޘެއް ނޫން ކަމަށް ރާއްޖޭގެ ދީނީ ޢިލްމުވެރިޔާ އައްޝައިޚް އާދަމް ނިޝާން ވިދާޅުވެފައި ވަނިކޮށެވެ.

އަދި މިކަމާއި ގުޅިގެން ދާޚިލީ ވަޒީރު ޢިމްރާން ޢަބްދުالله މަޢާފަށް އެދިފައެއްވެސް ނުވެއެވެ. އަދި އެބަސްފުޅަކީ ޙަދީޘެއް ނޫން ކަމަށް އެއްބަސްވެވަޑައިގެންފައެއްވެސް ނުވެއެވެ.

މިކަމާއި ގުޅިގެން ޢަދާލަތު ޕާޓީގެ ދީނީ ޢިލްމު ވެރިޔާ ޑރ މުޙައްމަދު ޢިޔާޡް ޢަބްދުއްލަޠީފް ވިދާޅުވެފައިވަނީ ބުޅި ކެނޑޭނީ ކެޔޮޅުން އަތުން ކަމަށާއި ކުށްޖެހޭނީ މުޤައްރިރުންނަށް ކަމަށެވެ. މިހެންކަމުން، ކިތަންމެ މޮޅު ޢިލްމުވެރިޔަކަށްވެސް ކުށެއްކީދާނެ ކަމަށާއި ނަމަވެސް، އެހިސާބުން އެމީހަކީ ދޮގުވެރިޔެއްކަމަށް ކަނޑައެޅުމަކީ ވަރަށް ބޮޑު ޚިޔާނާތެއް ކަމަށެވެ.