ރީކޯ މޫސާ ފައްޔާޒްއަށް: ޗެއާޕާސަން އަކަށް ހުންނަންވާނީ ޒާތީނުވެ ޕާޓީގެ މެމްބަރުންނާއެކު އުޅެވޭ މީހެއް

އެމްޑީޕީގެ މިހާރުގެ ޗެއާޕާސަން އަދި އިކޮނޮމިކް މިނިސްޓަރ ފައްޔާޒް އިސްމާއިލް، ރައީސުލްޖުމްހޫރިއްޔާގެ ރަނިން މޭޓްއަށް ޝައުގުވެރިވާ ކަމުގެ ވާހަކަދައްކަވަނީ އެމްޑީޕީގެ ކުރީގެ ޗެއާޕާސަން ރީކޯ މޫސާ މަނިކު ކަމަށް ވިދާޅުވުމުން އެކަމަށް ރީކޯމޫސަ ރައްދު ދެއްވާއިފިއެވެ.

ފައްޔާޒް މިއަދު މިފަދައިން ވިދާޅުވީ ރަނިން މޭޓަށް ފައްޔާޒް އާއި ފޮރިން މިނިސްޓަރ އަބްދުالله ޝާހިދުއާއި މިހާރު ނައިބު ރައީސްގެ މަޤާމްގައި ހުންނެވި ފައިސަލް ނަސީމް ވާދަކުރައްވާ ކަމަށް ދެކެވެމުން އަންނަ ވާހަކަތަކާއި ގުޅިގެންނެވެ.

އެގޮތުން ފައްޔާޒް ކުރައްވި ޓްވީޓުގައި ވިދާޅުވީ އޭނާގެ އެއްވެސް ޝައުގެއް (އިންޓެރެސްޓްއެއް) ރަނިން މޭޓް ކަމަށް ނެތް ކަމަށެވެ.

އެހެންނަމަވެސް ކޮންމެސް ސަބަބަކާ ހުރެ މި ވާހަކަދައްކަވަނީ ރީކޯ މޫސާ މަނިކު ކަމަށް ފައްޔާޒް ވިދާޅުވިއެވެ. އަދި މިއީ ވަރަށް ދެރަކަމެއް ކަމަށް ފައްޔާޒް ވަނީ ފާހަގަކުރައްވާފައެވެ.

މިކަމަށް ރައްދު ދެއްވާ ރީކޯ ކުރެއްވި ޓްވީޓުުގައި ވިދާޅުވީ އެމްޑީޕީގެ ޗެއާޕާސަން އަކަށް ހުންނަން ވާނީ އާންމު މެމްބަރުންނާއި ޒާތީނުވެ ޕާޓީގެ މެމްބަރުންނާއިއެކު އުޅެވޭނެ މީހެއް ކަމަށެވެ.

މިއާއިއެކު ނޫސްވެރިންގެ އާޓިކަލްތަކުގެ ސަބަބުން އާންމު ތަންތަނުގައި ރީކޯ މޫސައާއި ދިމާ ކުރުމަކީ ފައްޔާޒް ވެސް ކޮށްގެން ވާނެ ކަމެއް ނޫން ކަމަށް ރީކޯ ވިދާޅުވިއެވެ. އަދި ކަނޑައެޅިގެން ދޮގު ވާހަކަ ނުފެތުރުމަށް ރީކޯ ވަނީ އެދިފައެވެ.

އިއްޔެ ރައީސް ޞާލިހުގެ ކެމްޕެއިން ދަތުރު ނިންމަވާލެއްވުމަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ރަނިންމޭޓް ކަމަށް ކަނޑައަޅާނެ ބޭފުޅަކާއި ގުޅޭގޮތުން ކޮންމެ ރެއަކުހެން އެކި ބޭފުޅުންނާއި މަޝްވަރާތައް ކުރައްވާ ކަމަށާ، އަދި އެ ބޭފުޅުން އެކި ނަންތައް ހުށަހަޅުއްވަމުން ގެންދަވާ ކަމަށެވެ.

މީގެ އިތުރުން ކޯލިޝަންގައި ހިމެނޭ ޕާޓީއެއްގެ ތެރެއިން ރަނިންމޭޓަކު ކަނޑައަޅުއްވާފާނެތޯ ނޫސްވެރިއަކު ކުރި ސުވާލަށް ޖަވާބު ދެއްވަމުން އެމަނިކުފާނު ވިދާލުވީ، އެފަދައިން ކަން ކުރުމުގެ ފުރުސަތު ވެސް އޮތް ކަމަށެވެ. އަދި ރަނިންމޭޓަކީ ކޮން ބޭފުޅެއްކަން މިހާރު އިއުލާން ނުކުރި ނަމަވެސް، އެމަނިކުފާނުގެ ކެންޑިޑެސީ ފޯމުގައި އެ ބޭފުޅެއްގެ ނަން އޮންނާނެ ކަމަށް ރައީސް ޞާލިހު ވިދާޅުވި އެވެ.