އިދިކޮޅު ލީޑަރުން ހައިކޯޓުގައި 5 ގަޑިއިރު، ރައީސް ޔާމިނުގެ އިސްތިއުނާފު އޮތް ހިސާބެއް ނުބުނި!

ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ ފަރާތްޕުޅުން ހައިކޯޓުގައި އިސްތިއުނާފުކޮށްފައިވާ ވ އާރަށު ހުކުމުގެ އިސްތިއުނާފު މައްސަލަ އޮތް ހިސާބެއް ބަލަން އިދިކޮޅު ލީޑަރުން ހައިކޯޓަށް ވަޑައިގެން 5 ގަޑިއިރު ހޭދަކުރައްވާފައިވާއިރު، އެ ކޯޓުން ޖަވާބުދީފައި ނުވާކަމަށް އިދިކޮޅުން ބުނެފި އެވެ.

ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު މިވަގުތު ގެންދަވަނީ މިދިޔަ ޑިސެމްބަރު މަހު ކްރިމިނަލް ކޯޓުން އެމަނިކުފާނުގެ މައްޗަށް ކޮށްފައިވާ 11 އަހަރުގެ ޖަލުހުކުމް ތަންފީޒު ކުރައްވަމުންނެވެ.

މި މަހުގެ 23 ގައި ރިޔާސީ އިންތިޚާބަށް ނަން ހުށައެޅުމަށް އިލެކްޝަންސް ކޮމިޝަނުން ހުޅުވާލާއިރު، ޕީޕީއެމްގެ ރިޔާސީ ކެންޑިޑޭޓު ހުރަގޭގައި ހުންނެވުމަކީ އެމަނިކުފާނުގެ އިންތިޚާބީ ހައްޤަށް ހުރަސްއެޅިގެންދާނެ ކަމެއްކަމަށް އިދިކޮޅުން ދަނީ ބުނަމުންނެވެ.

އަދި ހައިކޯޓަށް އެބޭފުޅުން ވަޑައިގަންނަވަނީ އެ މައްސަލަ ނިމުމަކާއި ހަމަޔަށް އައިސްފައި ވަނިކޮށް، މަޑުޖައްސާލި ގޮތަށް ވީ މައްސަލައަށް ވީގޮތެއް ނޭނގޭތީ އެކަންކަން ސާފުކުރުމަށް ކަމަށް އިދިކޮޅު ލީޑަރުން ވަނީ ވިދާޅުވެފަ އެވެ.

މިއަދު ހައިކޯޓަށް ވަޑައިގެން އެތަނުގައި އިދިކޮޅު ލީޑަރުން ވަނީ 5 ގަޑިއިރު ހޭދަކުރައްވާފަ އެވެ. އެހެން ނަމަވެސް އެބޭފުޅުންނަށް އެކޯޓުން ސާފު ޖަވާބެއް ދެއްވާފައި ނުވާކަމަށް އިދިކޮޅުން ވަނީ ބުނެފައެވެ.

އެގޮތުން މީޑިއާއަށް މައުލޫމާތުދެއްވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ ޖޭއެސްސީގެ ރައީސް ހިސާން ހުސެއިން މެދުވެރިކޮށް ރައީސް ޞާލިހު އަންގަވައިގެން ރައީސް ޔާމިނުގެ މައްސަލައަށް ނުފޫޒު ފޯރުވާތީ އިދިކޮޅުން އިންތިހާއަށް ކަންބޮޑުވާ ކަމަށެވެ.

އަދި ރައީސް ޔާމިނުގެ ފަރާތްޕުޅުން ހުށައަޅާފައިވާ އިސްތިއުނާފު ލަސްކުރަނީ ސަރުކާރުގެ އޯޑަރަށް ކަމަށާއި، އެކަމާއި ގުޅިގެން އޮތް ކަންބޮޑުވުންތަކާއެކު ހައިކޯޓުގެ އިސް ފަނޑިޔާރާއި ބައްދަލުކުރުމަށް ސިޓީއަކުން އެދިފައިވާނެކަމަށް އަބްދުއްރަހީމް ވިދާޅުވި އެވެ.

"ރިޔާސީ އިންތިޚާބަށް ކުރިމަތިލާން 5 ދުވަހަށް ވެފައި ވަނިކޮށް ރައީސް އަޅުގަނޑުމެންގެ ރިޔާސީ ކެންޑިޑޭޓު މިއޮތީ ޖަލުގައި. އިސްތިއުނާފުގެ މައްސަލަ އޮތީ ހައިކޯޓުގައި. މިވަގުތު އަޅުގަނޑުމެންނަށް މި އެނގެނީ ހައިކޯޓުގައި މައްސަލަ ބައްލަވާ ފަނޑިޔާރުން ޗުއްޓީ ނަންގަވައިގެން އުޅުއްވާކަން. މީ ޗުއްޓީ ނަންގަވަން ޖެހޭ ވަގުތެއް ނޫން.. އެއަށްވުރެ ބޮޑު ގައުމީ މައްސަލައެއް ކުރިމަތިވެފައި މި އޮތީ"

ޕީއެންސީގެ ރައީސް އަބްދުއްރަހީމް އަބްދުﷲ

މިއަދު އިދިކޮޅު ލީޑަރުން ހައިކޯޓުން ވަޑައިގަތީ އެ ކޯޓުގެ އިސް ފަނޑިޔާރާއި ބައްދަލުކުރުމަށް އިދިކޮޅޔ ކޯލިޝަނުން އެދުނު ސިޓީއަށް އެ ކޯޓުން ޖަވާބުދިނުމުން ނެވެ. އެގޮތުން އެ ކޯޓުން ބުނީ އިދިކޮޅުން އެދިފައިވާ ކަންތައްތަކާއި ގުޅިގެން ކޯޓުން ޖަވާބެއް ދޭނެކަމަށެވެ.

ހައިކޯޓުގެ ފަނޑިޔާރު އެބޭފުޅުންނާއި ބައްދަލުކުރައްވާނެކަމުގެ ޔަގީންކަން ހައިކޯޓުން ދީފައެއް ނުވެއެވެ.

އިދިކޮޅު ލީޑަރުން ބުނީ ރައީސް ޔާމިނުގެ އިސްތިއުނާފު މައްސަލަ ނިންމަންދެން އެ ކޯލިޝަނުން ހައިކޯޓަށް އަންނާނެކަމަށެވެ. އަދި ކަމާއި ގުޅުންހުރި އިދާރާތަކަށް ގޮސް އެ މައްސަލަ އޮތް ހިސާބެއް އޮޅުންފުލުވުމަށް މަސައްކަތް ކުރަމުންދާނެ ކަމަށެވެ.

ރައީސް ޔާމިނުގެ އިސްތިއުނާފު މައްސަލަ ނުނިމި ދިގުލައިގެންދާތީ އޮތް ކަންބޮޑުވުންތަކާއެކު، އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ ވަނީ ރައީސް ޔާމިނަށް އިންސާފު ލިބެންދެން މިއަހަރުގެ ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިޚާބު ފަސްކުރުމަށް ގޮވާލައްވާފަ އެވެ.