ފުއްގިރި މައްސަލައިގަ ރައީސް ޔާމީން ޖަލުގަ, ތުހުމަތު ކުރެވޭ ކުންފުނިތަކުގެ އިސްވެރިން ކެމްޕެއިންގަ: އުޝާމް
ފުއްގިރި މައްސަލައިގަ ޕީޕީއެމް ޕީއެންސީ ކޯލިޝަންގެ ރައީސް އަދި ކުރީގެ ރައީސް އަބްދުالله ޔާމީން އަބްދުލްޤައްޔޫމް ޖަލުގައި އޮންނެވިިއިރު, މި މައްސަލާގައި ތުހުމަތު ކުރެވޭ ކުންފުނިތަކުގެ އިސްވެރިން އުޅުއްވަނީ ރައީސުލްޖުމްހޫރިއްޔާ އިބްރާހިމް ޞާލިހުގެ ކެމްޕެއިންގައި ކަމަށް ރައްޔިތުން މަޖިލީހުގެ ވިލިމާލެ ދާއިރާގެ މެމްބަރު އަހްމަދު އުޝާމް ވިދާޅުވެއްޖެއެވެ.
އެގޮތުން މިހެން ވިދާޅުވެ އުޝާމް ކުރެއްވި ޓްވީޓުގައި ވަނީ ރައީސް ޞާލިހު އާއި އެމްޑީއޭގެ ރައީސް އަހްމަދު ސިޔާމް މުހައްމަދުގެ ފޮޓޯއެއް ލާފައެވެ.
އުޝާމް ވިދާޅުވީ ފުއްގިރި މައްސަލާގައި މަނީ ލޯންޑަރިންގެ ދައުވާ ލިބޭ ރައީސް ޔާމީން ޖަލުގައި އޮންނެވިއިރު މިމައްސަލާގައި މަނީ ލޯންޑަރ ކޮށްދިންކަމަށް ތުހުމަތު ކުރެވޭ ކުންފުނިތަކުގެ އިސްވެރިން އުޅުއްވަނީ ރައީސް ޞާލިހުގެ އަރިހުގައި ރިޔާސީ އިންތިޚާބުގެ ކެމްޕެއިންގައި ކަމަށެވެ.
އަދި މިއީވެސް ހަމަހަމަކަމާ އަދުލުވެރިކަމާ އިންސާފުވެރިކަންތޯ އުޝާމް ވަނީ ސުވާލު އުފައްދާފައެވެ.
އުޝާމް މިހެން ވިދާޅުވެފައިވާއިރު މިއަދު ފުއްގިރި މައްސަލާގައި ބޭއްވުނު އަޑުއެހުމުގައި ހެކިންގެ ހެކިބަސް ނެގުމުގެ މަރުހަލާގައި ސިޔާމް އާއި އެމްޑީއޭގެ ނައިބު ރައީސް އަލީ މައުރޫފު ވަނީ ހެކި ދިނުމަށް އިންކާރުކޮށްފައެވެ. އަދި ދައުލަތުން ވަނީ އެމީހުންގެ ހެކިބަސް ނަގަން ބޭނުންނުވާ ކަމަށް ފާހަގަކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
