ޕްރިމިއާ ލީގު: ސަން ގެ ހެޓްރިކާއި އެކު ޓޮޓެންހަމްއަށް ބޮޑު މޮޅެއް

ސަން ގެ ހެޓްރިކާއި އެކު އިނގިރޭސި ޕްރިމިއާ ލީގުގައި ޓޮޓެންހަމްއަށް ބޮޑު މޮޅެއް ލިބިއްޖެއެވެ.

އަމިއްލަ ދަނޑުގައި ލެސްޓާ ސިޓީއާއި ދެކޮޅަށް ކުޅުނު މި މެޗު ޓޮޓެންހަމް އިން ކާމިޔާބު ކޮށްފައިވަނީ 2-6 ގެ ނަތީޖާއަކުންނެވެ. މި މެޗުގައި ޓޮޓެންހަމްގެ ތަރިއަކަށް ވެގެން ދިޔައީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އަރާ ތިން ގޯލު ކާމިޔާބު ކުރި ދެކުނު ކޮރެއާގެ ސަން ހުން މިން އެވެ. ސަން އަށް މި ސީޒަނުގައި ރަނގަޅު ކުޅުމެއް ނުދެއްކި މި މެޗުގައި ފުރަތަމަ 11 އިންވެސް ޖާގަ ނުލިބިފައިވަނިކޮށް ކާމިޔާބުކުރި ހެޓްރިކާއި އެކު އޭނާ ވަނީ ފާޑުކިޔުންތަކަށް ވަރުގަދަ ޖަވާބެއް ދީފައެވެ.

މި މެޗުގައި ލިބުނު ޕެނަލްޓީއަކުން ލީޑު ނެގީ ބަލިވި ލެސްޓާ ސިޓީއިންނެވެ. މެޗުގެ 6 ވަނަ މިނަޓުގައި ޓިއެލެމެންސް މި ގޯލު އެ ޓީމަށް ޖަހައިދިންތާ ދެ މިނެޓުގެ ތެރޭގައި ޓޮޓެންހަމްގެ ހެރީ ކޭން ވަނީ ނަތީޖާ ހަމަހަމަ ކޮށްފައެވެ. އެ ގޯލަށްފަހު ކުޅުން ރަނގަޅުކޮށް ޓޮޓެންހަމްއިން ވަނީ ލީޑު ނަގާފައެވެ. މެޗުގެ 21 ވަނަ މިނަޓުގައި އެރިކް ޑައާ މި ގޯލު ޖަހައިދިން އިރު ފުރަތަމަ ހާފު ނިމުމުގެ ކުރިން ލެސްޓާގެ ޖޭމްސް މެޑިސަން ވަނީ އެ ޓީމަށް ނަތީޖާ ހަމަހަމަ ކޮށްދީފައެވެ.

ދެވަނަ ހާފުގެ ދެވަނަ މިނަޓުގައި ޓޮޓެންހަމްގެ ބެންޓަންކަރ އެ ޓީމަށް ލީޑު ނަގައިދިން ނަމަވެސް ގޯލަށްފަހު ދެ ޓީމުންވެސް ވާދަވެރި ކުޅުމެއް ކުޅެމުންގޮސް ލެސްޓާއިން ވަނީ ނަތީޖާ ހަމަހަމަ ކުރެވޭ ވަރުގެ ފުރުސަތުތައްވެސް އުފައްދާފައެވެ. މިއީ މި ސީޒަނުގައި ލެސްޓާގެ ފަރާތުން ރަނގަޅު ކުޅުމެއް ފެނިގެން ދިޔަ މެޗެއް ނަމަވެސް ސަން ކުޅެން ނުކުތުމާއި އެކު އެ ޓީމަށް ވަނީ މެޗު ގެއްލިފައެވެ. ޓޮޓެންހަމްގެ ފަހު ތިން ގޯލު ސަން ކާމިޔާބު ކޮށްފައިވަނީ 14 މިނަޓުގެ ތެރޭގައެވެ.

މި ނަތީޖާ އާއި އެކު ޓޮޓެންހަމް އެއްވަނައިގައި އޮތް މެންޗެސްޓާ ސިޓީއާއި ޕޮއިންޓުގެ އެއްވަރު ކުރިއިރު މެޗަކުން މޮޅު ނުވެ ލެސްޓާ އޮތީ ތާވަލުގެ ފުލުގައެވެ. 2016 ވަނަ އަހަރުގެ ޕްރިމިއާ ލީގު ކާމިޔާބު ކުރި ލެސްޓާ ރެލިގޭޓް ވުމުގެ ބިރު ބޮޑުވެފައި އޮތް އިރު އެ ޓީމުގެ ކޯޗު ބްރޭންޑަން ރޮޖާސް މަގާމުން ވަކިކޮށްފާނެ ކަމަށް ބުނެ ދެކެވޭ ވާހަކަތައް މިވަގުތު ވަނީ އިތުރު ވެފައެވެ.