ސިފައިން ވަފާތެރިވާންވީ މާރިޔާއަކަށް ނޫން، ދިވެހި ޤައުމަށް: އަބްދުއްރަހީމް

ދިވެހި ސިފައިން ވަފާތެރިވާންވީ ފަހަރެއްގައި ވެސް ޑިފެންސް މިނިސްޓަރު މާރިޔާ ދީދީއަށް ނޫން ކަމަށާއި، އެމީހުން ވަފާތެރިކަން އަދާކުރަންވީ މި ޤައުމާއި ރައްޔިތުންނަށް ކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.

އަބްދުއްރަހީމް މިފަދައިން ވިދާޅުވެފައި ވަނީ އަންގާރަ ދުވަހުގެ ރޭ ޕީޕީއެމް އޮފީހުގައި ބޭއްވި ޖަލްސާއެއްގައި ވާހަކަދައްކަވަމުން ނެވެ.

އަބްދުއްރަހީމް ވިދާޅުވީ ގައުމީ ސަލާމަތީ ބާރުތަކުގެ ހަމައެކަނި ޒިންމާއަކީ ބޭރުން އަންނަ ހަމަލާތަކުން ގައުމު ސަލާމަތްކުރުން ނޫންކަމަށެވެ.

ގައުމަށް ދިމާވާ ކޮންމެ ބޮޑުކަމުން ގައުމުގެ ރައްޔިތުން ސަލާމަތް ކުރުމަކީ ސަލާމަތީ ބާރުތަކުގެ ކޮންޑުގައި އެޅިފައިވާ ޒިންމާއަކަށް ވާއިރު، މިހާރު ގައުމަށް ދިމާވެފައިވާ އެންމެ ބޮޑު ނުރައްކަލަކީ ދިވެހިވަންތަކަމުގެ ކަންފުޅެއް ވެސް ނެތް ބަޔަކު ވެރިކަމުގައި ތިބުންކަމަށް އަބްދުއްރަހީމް ވިދާޅުވި އެވެ.

އެކަން ފާހަގަކޮށް އަބްދުއްރަހީމް ވިދާޅުވީ ދިފާއީ ބާރުތަކުން ވަފާތެރިވާންވީ ސިޔާސީ ވެރިންނަށް ނުވަތަ އެމީހުންގެ މައްޗަށް އައްޔަށްކޮށްފައި ތިބި މިނިސްޓަރުންނަށް ނޫން ކަމަށެވެ. އަދި އެފަދައިން އަމަލުކުރާނަމަ ސިފައިން ވެސް ޤާނޫނާއި ޚިލާފުވާނެކަމަށް އަބްދުއްރަހީމް ވިދާޅުވި އެވެ.

"މާރިޔާއަކަށް ނޫން ތެދުވެރިވާން ވީކީ، ޝަމާލަކަށް ނޫން ވަފާތެރިވާންވީ ކީ އެއް، އިބްރާހިމް މުޙައްމަދު ޞާލިހަކަށް ނޫން އިޚްލާސްތެރިވާންވީ ކީ އެއް، ވަފާތެރިވާންވީ ދިވެހި ގައުމަށް. ތެދުވެރިވާންވީ މާތް ވެގެންވާ އިސްލާމްދީނަށް، އެހެން ނޫނީ ތިޔަބޭފުޅުންނަށް ތިޔަ ތިއްބެވެނީ ގާނޫނާއި ޚިލާފުވެފައި"

ޕީއެންސީގެ ރައީސް އަބްދުއްރަހީމް އަބްދުالله

އަބްދުއްރަހީމް އިތުރަށް ވިދާޅުވީ މިއަހަރު ބާއްވާ ރިޔާސީ އިންތިޚާބުގެ ޞައްހަކަން ސަލާމަތީ ބާރުތަކުން ކަށަވަރުކޮށްދޭން ޖެހޭ ކަމަށެވެ.

އަދި އިންތިޚާބަށް މި އޮތް ދުވަސްތަކުގައި ރައީސް ޞާލިހު ހައްޔަރުކޮށް ގައުމުގެ ސަލާމަތާއި ރައްކާތެރިކަން ކަށަވަރުކުރަން ޖެހޭކަމަށް އަބްދުއްރަހީމް ވިދާޅުވި އެވެ.