ރައީސް ޞާލިހާއި ދެކޮޅަށް އިހަވަންދޫ ރައްޔިތުން މުޒާހަރާއަށް!

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ހއ އަތޮޅަށް ކުރައްވާ އެމަނިކުފާނުގެ ރިޔާސީ ކެމްޕޭނު ދަތުރުފުޅުގައި އެ އަތޮޅުގެ އިހަވަންދޫއަށް ވަޑައިގަތުމުން ރައްޔިތުން ނިކުމެ މުޒާހަރާކޮށްފި އެވެ.

ރައީސް ޞާލިހު އިހަވަންދޫއަށް ވަޑައިގަންނަވަން އިއުލާނުކުރުމާއި ގުޅިގެން އިހަވަންދޫގައި ތިބި ރައީސް ޔާމިނުގެ ސަޕޯޓަރުން ވަނީ ނުރުހުން ފާޅުކޮށް އެމީހުންގެ ޝުއޫރުތައް ބެނާތަކުގައި ލިޔެ ހަރުކޮށްފަ އެވެ.

އެހެން ނަމަވެސް އެފަހުން އެސްއޯ ފުލުހުން ވަނީ އިހަވަންދޫގައި ރައްޔިތުން ސަރުކާރަށް ފާޑުކިޔައި ޝުއޫރުލިޔެ ހަރުކޮށްފައިވާ ބެނާތައް ނަގާފަ އެވެ.

ރައީސް ޞާލިހު މިއަދު ހަވީރު އިހަވަންދޫއަށް ވަޑައިގަތުމަށް ހަމަޖެހިފައި ވުމާއެކު، ރައްޔިތުން ނިކުމެ ވަނީ މުޒާހަރާކޮށްފަ އެވެ.

އެގޮތުން ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމު މިނިވަންކުރުމަށް އިހަވަންދޫ ރައްޔިތުން ވަނީ ގޮވާލާފަ އެވެ. އަދި ހަމަ އެއާއެކު ރައީސް ޞާލިހުގެ އިސްތިއުފާއަށް ވެއް ރައްޔިތުން ގޮވާލާފައި ވެއެވެ.

އިހަވަންދޫގައި ކުރިއަށް ގެންދިޔަ އެ މުޒާހަރާގައި ގިނަ އަދަދެއްގެ އާންމު ރައްޔިތުން ބައިވެރިވެފައިވާއިރު، މުޒާހަރާ ރޫޅާލުމަށް ބަލާ ގިނަ އަދަދެއްގެ އެސްއޯ ފުލުހުން ވެސް އެރަށަށް ގެންގޮސްފައިވެ އެވެ.

އިހަވަންދޫއަށް މިއަދު ހަވީރު ރައީސް ޞާލިހު ވަޑައިގަންނަވާގޮތަށް ހަމަޖެހިފައި އޮތް ނަމަވެސް އެ ދަތުރުފުޅު ވަރަށް ބޮޑަށް ލަސްވެގެން ދިޔަކަން ފާހަގަކޮށްލެވެއެވެ. އަދި އެމަނިކުފާނަށް އިހަވަންދޫއަށް ވަޑައިގެންނެވުނީ އިރުއޮއްސެން ކައިރިވެފައި ވަނިކޮށެވެ.

އެހެން ނަމަވެސް އެމަނިކުފާނު ވަޑައިގަންނަވާތީ، މުޒާހަރާގެ ބައިވެރިންނަށް ބަނދަރު ސަރަހައްދަށް ނުދެވޭގޮތަށް ރަށް ވަށައިގެން ޓޭޕުދަމާ ފުލުހުން ވަނީ ގާޑުކޮށްފަ އެވެ.

ރައީސް ޞާލިހު ހއ އަތޮޅަށް ކުރައްވާ މި ދަތުރުފުޅުގައި މިއަދު އެ އަތޮޅު ހޯރަފުއްޓަށް ވަޑައިގަތުމުން ވެސް ރައީސް ޔާމިނުގެ ސަޕޯޓަރުން ވަނީ އެމަނިކުފާނު މިނިވަންކުރުމަށް ގޮވާލާ މުޒާހަރާކޮށްފަ އެވެ.

ހއ އަތޮޅު ރައްޔިތުން ރައީސް ޞާލިހާއި ދެކޮޅަށް މުޒާހަރާކޮށްފައިވަނީ، އެމަނިކުފާނު ރަށްތަކަށް ވަޑައިގަތުމުން މުޒާހަރާ ނުކުރުމަށް ހޯމް މިނިސްޓަރު އިމްރާނު އަބްދުﷲ އިންޒާރުދީފައިވަނިކޮށެވެ.