ލަލީގާ: ރެއާލް އިން އެތުލެޓިކޯ ބަލިކޮށް ލީގުގައި ކުޅުނު 6 ވަނަ މެޗުވެސް ކާމިޔާބުކޮށްފި

ސްޕެނިޝް ލަލީގާގައި އެންމެ ފަހުގެ ޗެމްޕިއަން ރެއާލް މެޑްރިޑުން އިން ވާދަވެރި އެތުލެޓިކޯ މެ ބަލިކޮށް މިހާތަނަށް ލީގުގައި ކުޅުނު 6 ވަނަ މެޗުވެސް ކާމިޔާބުކޮށްފިއެވެ.

އެތުލެޓިކޯގެ ދަނޑުގައި ކުޅުނު މި މެޗު 1-2 ގެ ނަތީޖާއަކުން ރެއާލް އިން ކާމިޔާބުކުރި އިރު މި މެޗު ވެގެން ގޮސްފައިވަނީ މި ސީޒަނުގައި ކުޅެވިގެން ގޮސްފައިވާ އެންމެ ވާދަވެރި އެއް މެޗަށެވެ.

ފާހަގަ ކޮށްލެވޭ ގޮތުގައި މެޗުގެ ކުރިން މިދިޔަ ހަފްތާގެ ތެރޭގައި އެތުލެޓިކޯގެ ކެޕްޓަން ކޮކޭ ވަނީ ރެއާލްގެ ބްރެޒިލް އަށް ނިސްބަތްވާ ތަރި ވިނިސަސް ޖޫނިއާ ގޯލު ޖެހުމަށްފަހު އުފާފާޅުކުރާ ގޮތާއިމެދު ފާޑުކިޔާފައެވެ. އެގޮތުން އެތުލެޓިކޯގެ ދަނޑުގައި ގޯލުގެ އުފާފާޅުކުރުމަށް ނަށައިފި ނަމަ އޭގެ ނަތީޖާ ނުބައި ވާނެ ކަމަށް ކޮކޭ ވަނީ ބުނެފައެވެ.

ނެށުމުން ގޯލު ފާހަގަކުރުމަކީ ބްރެޒިލް ކުޅުންތެރިން އާންމުކޮށް ކުރާ ކަމެއް ކަމުން ކޮކޭގެ ވާހަކަ ތަކަކީ ނަސްލީގޮތުން ވިނިސަސް އާއި ދެކޮޅަށް ދެކެވުނު ވާހަކަތަކެއް ކަމަށް ގިނަ ބަޔަކު ވަނީ ބުނެފައެވެ. އެގޮތުން ބްރެޒިލް ގިނަ ފުޓްބޯޅަ ތަރިންނާއި ޔޫރަޕުގެ ބޮޑެތި ޓީމު ތަކުން ވަނީ ވިނީސަސް އަށް އެއްބާރުލުންދޭކަން ފާޅުކޮށްފައެވެ. ރޭގެ މެޗުގައި ރެއާލްއިން ޖެހި ފުރަތަމަ ގޯލާއި އެކު ވިނިސަސް ވަނީ ރޮޑްރިގޯއާއި އެކު ގޯލު ފާހަގަ ކުރުމުގެ ގޮތުން އެތުލެޓިކޯގެ ސަޕޯޓަރުން ކުރިމަތީ ނަށާފައެވެ.

ރޭގެ މެޗުގައި ފުރަތަމަ ރެއާލްއަށް ލީޑު ނަގައިދިން ގޯލު މެޗުގެ 18 ވަނަ މިނަޓުގައި ރޮޑްރިގޯ ޖަހައިދިން އިރު މެޗުގެ ފުރަތަމ ހާފު ނިމުމުގެ ކުރިން ރެއާލްގެ ވަލްވާޑޭ ވަނީ އެ ޓީމަށް ލީޑު ފުޅާ ކޮށްދީފައެވެ. މެޗުގައި އެތުލެޓިކޯއިން ޖެހި ގޯލު ފެނިގެން ގޮސްފައިވަނީ މެޗު ނިމެން 8 މިނެޓަށް ވެފައި ވަނިކޮށެވެ. އެ ޓީމަށް މި ގޯލު ކާމިޔާބު ކޮށްދީފައިވަނީ މާރިއޯ ހަމޯސޯ އެވެ. ދެވަނަ ހާފުގެ އިތުރު ވަގުތުގައި ހަމޯސޯ ބޯޅަ ނެތި ކުރި ފައުލަކާއި ގުޅިގެން އޭނާއަށް ވަނީ ދެވަނަ ރީނދޫ ކާޑާއި އެކު ރަތް ކާޑު ދައްކާފައެވެ.