އިނގިރޭސިވިލާތާ ދެކޮޅަށް އަސްކަރީ ފިޔަވަޅު އަޅާނެ ކަމުގެ އިންޒާރު އީރާނުން ދީފި
ލިޔުންތެރިޔާ
އަޙްމަދު އާހިލް ސަޢީދު
ދުނިޔޭގެ ތެލުގެ ވިޔަފާރީގައި މުހިއްމު ދައުރެއް އަދާކުރާ ހޯރްމޫޒް ކަނޑުއޮޅިއަށް އިނގިރޭސިވިލާތުން ހަނގުރާމަމަތީ މަނަވަރުތައް ފޮނުވައިފިނަމަ، އެ ޤައުމާ ދެކޮޅަށް އަސްކަރީ ފިޔަވަޅު އަޅާނެކަމުގެ އިންޒާރު އީރާނުން ދީފިއެވެ.
އީރާނުން މި އިންޒާރު ދީފައިވަނީ، އެ ސަރަހައްދުގެ ސަލާމަތީ ކަންކަން ބެލެހެއްޓުމަށް އިނގިރޭސިވިލާތް ހިމެނޭހެން ޤައުމުތަކުން ހޯރްމޫޒް ކަނޑުއޮޅިއަށް މަނަވަރުތައް ފޮނުވުމަށް އެމެރިކާގެ ރައީސް ޑޮނަލްޑް ޓްރަމްޕް ގޮވާލައްވާފައިވާ ދަނޑިވަޅެއްގައެވެ.
އީރާނުން ބުނެފައިވަނީ ހޯރްމޫޒް ކަނޑުއޮޅިއަކީ އެ ޤައުމުގެ ފުރިހަމަ ބާރު ހިނގާ ސަރަހައްދެއް ކަމަށާއި، ބޭރުގެ އެއްވެސް ބާރަކުން އެ ސަރަހައްދައް ވަނުމަކީ ޤަބޫލުކުރެވޭނެ ކަމެއް ނޫން ކަމަށެވެ. އަދި އިނގިރޭސި ރޯޔަލް ނޭވީގެ މަނަވަރުތައް އެ ސަރަހައްދައް ވަދެފިނަމަ އިނގިރޭސިވިލާތް އީރާނުގެ ޓާގެޓަކަށް ވެގެންދާނެކަމަށް އީރާނުން ބުނެއެވެ.
މިކަމާ ގުޅިގެން އިނގިރޭސި ބޮޑުވަޒީރު ކިއަރ ސްޓާމަރ ވިދާޅުވެފައިވަނީ، އިނގިރޭސިވިލާތުން މަސައްކަތް ކުރަމުންދަނީ މަސްލަހަތު ހަމައަކަށް އެލުވުމަށް ކަމަށާއި، ނަމަވެސް އެ ސަރަހައްދުގެ ކަނޑުދަތުރުފަތުގެ މިނިވަންކަން ކަށަވަރުކުރުމަށް ބައިނަލްއަޤްވާމީ ބާރުތަކާއެކު މަޝްވަރާ ކުރަމުންދާ ކަމަށެވެ. މީގެ އިތުރުން، އިނގިރޭސިވިލާތުން މިހާރުވެސް އެ ސަރަހައްދުގައި މައިންތައް ނައްތާލާ ބޯޓުތައް ފޮނުވައިފައިވާ ކަމަށް އޭނާ ފާހަގަކުރެއްވިއެވެ.
28 ފެބްރުއަރީގައި އެމެރިކާއާއި އިޒްރޭލުން އީރާނަށް ހަމަލާދޭން ފެށިފަހުން އީރާނުން ވަނީ ހޯރްމޫޒް ކަނޑުއޮޅި ބަންދު ކޮށްފައެވެ. މީގެ ސަބަބުން ދުނިޔޭގެ އެކި ކަންކޮޅުތަކުގައި ތެޔޮގެ އަގުތައް ވަނީ އުފުލިފައެވެ. އަދި ވައިގެ މަގުން ދޭ ހަމަލާތަކުގެ ސަބަބުން ދަތުރުފަތުރައް ވެސް ވަނީ ބުރު އަރާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
