މަސްކަނޑު ގެއްލިގެން އިދިކޮޅު މެމްބަރުން ދައްކަނީ ސިޔާސީ ވާހަކަ: ޝަރީފު
ދިވެހިރާއްޖޭގެ މަސްކަނޑުން ބައެއް ގެއްލިއްޖެކަމަށް ބުނެ ސަރުކާރާއި އިދިކޮޅު ފަރާތްތަކުން ދައްކަމުންދަނީ ސިޔާސީ ވާހަކަތަކެއް ކަމަށް އެމްޑީޕީގެ ޕާލަމެންޓްރީ ގުރޫޕުގައި ހިމެނިވަޑައިގަންނަވާ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވެއްޖެ އެވެ.
ޝަރީފު މިފަދައިން ވިދާޅުވެފައިވަނީ ފޯޅަވަހި މައްސަލައިގައި ސަރުކާރުގެ އިހުމާލުން ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ގޮސްފައިވާކަމަށް ބުނެ ކަންބޮޑުވުން ފާޅުކުރާ ފަރާތްތަކުން ގުޅިގެން މަސައްކަތް ކުރަން ފެށުމާއި ގުޅިގެން ފާޑުކިޔުން އަމާޒުކުރައްވާ ކުރެއްވި ޓްވީޓެއްގަ އެވެ.
ޝަރީފު ވިދާޅުވީ ރާއްޖޭގެ ސަރަހައްދުން ބައެއް ގެއްލިގެން ދިޔަކަމަށް ބުނެ އިދިކޮޅު ފަރާތްތަކުން ދައްކަވަމުންދަނީ ސިޔާސީ ވާހަކައެއް ކަމަށެވެ.
ޝަރީފު ވިދާޅުވީ ކަނޑުގެ ސަރަހައްދު ގެއްލުނު ވާހަކަ ދައްކާނަމަ އެންމެ ރަނގަޅީ ރާއްޖޭގެ އުތުރުން އިންޑިއާ އާއި ސްރީލަންކާ އާއި ވީ ފަޅިން ގެއްލިގެން ދިޔަ ސަރަހައްދުގެ ވާހަކަ ދެއްކުން ކަމަށެވެ.
އެ ވާހަކަ ނުދައްކާ ހަމައެކަނި ފޯޅަވައްސާއި ދިމާލުން ގެއްލުނު ބައިގެ ވާހަކަ ދެއްކުމަކީ އިދިކޮޅު ފަރާތްތައް ކަނޑުގެ ސަރަހައްދު ސިޔާސީކުރުން ކަމަށް އޭނާ ވިދާޅުވި އެވެ.
"އިދިކޮޅު ފަރާތްތަކުން ރާއްޖޭގެ މަސް ކަނޑުން ބައެއް ގެއްލިއްޖެއޭ ކިޔައިގެން ދައްކާ ވާހަކައަކީ ސިޔާސީ ވާހަކައެއް. އެހެން ނޫން ރާއްޖޭގެ އުތުރުން ވެސް (އިންޑިއާއާއި ސްރީލަންކާ އާއި ވީ ފަޅިން) މަސްކަނޑު ގެއްލިފައިވާ ވާހަކަ ދައްކަން ވާނެ"
މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފު
ޝަރީފު މިފަދައިން ވިދާޅުވެފައިވާއިރު ގިނަ ސިޔާސީ ޕާޓީތަކެއް އެކުލެވޭގޮތަށް އުފައްދާފައިވާ "ކަނޑު ވިއްކާލުމާއި ދެކޮޅު" ކޯލިޝަނުން ގެންދަނީ ކަނޑު ވިއްކާލިކަމަށް ތުހުމަތުކުރެވޭ މައްސަލައިގައި ސަރުކާރާއި ދެކޮޅަށް ގިނަ މަސައްކަތްތަކެއް ކުރަމުން ނެވެ.
އެ މައްސަލައާއި ގުޅިގެން ބަންޑާރަ ނައިބު އިބްރާހިމް ރިއްފަތުގެ އިތުބާރު ނެތްކަމުގެ މައްސަލަ މަޖިލީހަށް ހުށައަޅާފައިވާއިރު، ފޮރިން މިނިސްޓަރު އަބްދުالله ޝާހިދުގެ މައްސަލަވެސް ވަނީ ހުށައަޅާފަ އެވެ.
އޭގެ އިތުރުން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ އިތުބާރު ނެތްކަމުގެ މައްސަލަ ވެސް ވައްދާނެކަމަށް "ކަނޑު ވިއްކާލުމާއި ދެކޮޅަށް" މަސައްކަތް ކުރާ ކޯލިޝަނުން ވަނީ ބުނެފަ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
