ސިޔާމް ސިންގަޕޫރަށް ވަޑައިގަތުމުން ޕާސްޕޯޓް ހިފަހައްޓައިފި

ވިޔަފާރިވެރިޔާ އަދި ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަހްމަދު ސިޔާމް (ސަން ސިޔާމް)ގެ ޕާސްޕޯޓު ސިންގަޕޫރުން ހިފަހައްޓައިފި އެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރިޔާސީ ކެމްޕެއިންގައި އުޅުއްވުމަށް ފަހު، ސިޔާމް ސިންގަޕޫރަށް ވަޑައިގެންފައިވާ އިރު، "ވޮއިސް" ކަށަވަރުވެފައިވާ ގޮތުގައި ސިޔާމްގެ ޕާސްޕޯޓް ހިފަހައްޓާފައިވަނީ މިދިޔަ ހޯމަ ދުވަހުއެވެ. އަދި ޕާސްޕޯޓް ހިފަހައްޓައި ފުރުން މަނާކުރީ ހިލްޓަން މައްސަލައާ ގުޅިގެން ކަމަށްވެސް މައުލޫމާތު ލިބެއެވެ.

ހިލްޓަން އިން އެއްބަސްވުމާ ހިލާފުވެފައިވާ ކަމަށް ބުނެ ސަން ޓްރެވަލްސް އިން ނ. އިރުފުށީގެ އެއްބަސްވުން ބާތިލުކުރީ 30 އޭޕްރިލް 2013ގަ އެވެ. އެއްބަސްވުން ބާތިލުކުރި މައްސަލަ ސިންގަޕޫރުގެ އާބިޓްރޭޝަނަށް ހުށަހެޅުމުން، އާބިޓްރޭޝަނުން 'ފައިނަލް އެވޯޑް' ނެރެ ސަން ޓްރަވަލްސްއަށް އެންގީ 20.9 މިލިއަން ޑޮލަރާއި ޖޫރިމަނާ އާއި އިތުރު ހަރަދުތައް ދެއްކުމަށެވެ.

އެވޯޑުގެ މައްސަލަ ސިންގަޕޫރުގެ ސިވިލް ކޯޓަށް ހުށަހެޅުމުން، އެ ކޯޓުން ސަން ޓްރެވަލްސްގެ ހުރިހާ އެކައުންޓުތަކެއް ހިފަހައްޓަން އަމުރު ކުރި އެވެ.

ނަމަވެސް އެ ފައިސާ ސިޔާމް ކުންފުނިން ނުދައްކާތީ އާބިޓްރޭޝަންގެ ނިންމުން ތަންފީޒު ކުރުމަށް ހިލްޓަން އިން ރާއްޖޭގެ ކޯޓަށް މައްސަލަ ހުށަހެޅީއެވެ.

މިމައްސަލާގައި މިއަހަރުގެ ފެބްރުއަރީމަހު ރާއްޖޭގަ ސިވިލް ކޯޓުން ކުރި ހުކުމުގައިވެސް ބުނެފައިވަނީ ސިންގަޕޫރު އާބިޓްރޭޝަންގެ އެންގުން ބަލައިނުގަވެނޭ ގާނޫނީ އަދި ޝަރުއީ ސަބަބެއް ފާހަގަ ކުރެވިފައި ނެތް ކަމަށެވެ. އެހެންކަމުން ބާކީ ދައްކަން ޖެހޭ ފައިސާ އަދި ޖޫރިމަނާއަށް އަރަމުން އަންނަ ފައިސާ، 14 ދުވަހުގެ ތެރޭގައި ދެއްކުމަށް ވަނީ އަންގާފައެވެ.

މި މައްސަލައިގައި ސިޔާމްގެ ޕާސްޕޯޓް ހިފަހައްޓަން ރާއްޖޭގެ ސިވިލް ކޯޓުން ވެސް މީގެ ކުރިން އަމުރު ކުރިއެވެ. އެފަހަރު އަމުރު ކުރީ އެ މައްސަލާގައި ސަން ޓްރެވަލްސްގެ އެކައުންޓްތައް ފްރީޒްކޮށްގެން ވެސް ފައިސާ ނުލިބުމުންނެވެ.

މައުލޫމާތު ލިބިފައިވާ ގޮތުގައި ސިޔާމް ސިންގަޕޫރުން ފުރުން މަނާކުރުމުން، އެނބުރި ވަޑައިގަތުމަށް ގެންދަވަނީ ގާނޫނީ މަރުހަލާތައް ފުރިހަމަކުރެއްވުމުގެ މަސައްކަތް ކުރައްވަމުންނެވެ.