ފުއްގިރި މައްސަލަ: އިންތިޒާމުތައް ގޯސްވެ ބޭރުގައި ތިބި ދެހެކިންގެ ހެކިބަސް ނުނެގުނު!

ރ. ފުއްގިރި ކުއްޔަށް ދޫކުރުމުގެ މުއާމަލާތާއި ގުޅުވާ ރައީސް އަބްދުالله ޔާމީން އަބްދުލްގައްޔޫމުގެ މައްޗަށް އުފުލާފައިވާ ދައުވާތަކާއި ގުޅޭގޮތުން ބުރާސްފަތި ދުވަހުގައި ކުރިއަށް ގެންދިޔަ އަޑުއެހުމުގައި ރާއްޖެއިން ބޭރުގައި ތިބި ދައުލަތުގެ ހެކިންގެ ހެކިބަސް ނެގުމަށް އިންތިޒާމުތައް ގޯސްވެ، ހެކިބަސް ނުނަގާ އަޑުއެހުން ނިންމާލައިފި އެވެ.

ބުރާސްފަތު ދުވަހުގެ އަޑުއެހުމުގައި އެންމެ ފުރަތަަމަ ނެގުމަށް މަސައްކަތް ކޮށްފައިވަނީ ސަން ކުންފުނީގެ ޑިރެކްޓާ އޮފް ފައިނޭންސްގެ މަގާމުގައި ފުރުއްވަމުން ދިޔަ ސިރިތާ ކުމާރުގެ ހެކިބަހެވެ. އޭނާގެ ހެކިބަސް ނެގުމަށް މަސައްކަތް ކޮށްފައިވަނީ ލަންކާގައި ހުންނަ ހައިކޮމިޝަނަށް އޭނާ ހާޒިރުކޮށްގެން ނެވެ.

މި އަޑުއެހުން ކުރިއަށް ގެންދިއުމަށް މަސައްކަތްކޮށްފައިވަނީ އޮންލައިން ކޮށެވެ. އެހެން ނަމަވެސް އިންޓަނެޓު ކަނެކްޝަންގެ މައްސަލަތަކެއް ޖެހި، ހެކިވެރިޔާ ދައްކާ ވާހަކަ ސާފުނުވާތީ ދިމާވި ދަތިތަކާއި ގުޅިގެން އަޑުއެހުން މެދުކަނޑާލަން ޖެހުނެވެ. އެފަހުން، އިންޓަނެޓުގެ މައްސަލަ ޙައްލުކޮށްގެން ހެކިބަސް ނެގުމަށް ވެސް މަސައްކަތްކުރި އެވެ.

އެހެން ނަމަވެސް، ހެކިވެރިޔާގެ ވާހަކަ ސާފުުނުވާތީ، ދިފާއުން ވަނީ އިއުތިރާޒުކޮށްފަ އެވެ. އަދި ހެކިވެރިޔާގެ ތަރުޖަމާނު، ދެފަރާތުގެ ވާހަކަތައް ތަރުޖަމާ ކުރުމުގައި، އެންމެ ފުރިހަމައަށް އެކަން ކުރަމުން ނުދާތީ ދަތިތައް ފާހަގަކޮށް ތަރުޖަމާނާއި ގުޅިގެން ވެސް ދިފާއުން އިއުތިރާޒު ކުރިއެވެ.

އެއާއެކު ހެކިބަސް ނަގަން ކުރިމަތިވި ދަތިތަކާއެކު ޝަރީއަތުން ވަނީ ހެކިވެރިޔާ ކޯޓަށް ހާޒިރުކޮށްގެން ހެކިބަސް ނެގުމުގެ ކަންކަން ކުރެވޭނެ އެންމެ އަވަސް މުއްދަތަކީ ކޮބައިތޯ ސާފުކޯށްދިނުމަށް އެދިފައެވެ.

އެކަމާއި ގުޅިގެން ދައުލަތުން ބުނީ އަންނަ އާދިއްތަ ދުވަހަކަށް އެ ހެކިވެރިޔާ ކޯޓަށް ހާޒިރުކުރުމުގެ އިންތިޒާމުތައް ހަމަޖައްސައިދިނުމަށް އެދޭކަމަށެވެ.

ދެން މިއަދު ހެކިބަސް ނެގުމަށް މަސައްކަތް ކޮށްފައިވަނީ ދައުލަތުގެ ފަރާތުން ހުށައަޅާ މުޙައްމަދު ޝިފާއުގެ ހެކިބަހެވެ.

އޭނާގެ ހެކިބަސް ނެގުމަށް ކުރިން އޮތީ ސައޫދީގައި ހުންނަ ރާއްޖޭގެ އެމްބަސީއަށް ހާޒިރުކޮށްގެން ނެވެ.

އެހެން ނަމަވެސް ސައުދީގައި ރާއްޖޭގެ އެމްބަސީއެއް ހުއްޓާ ހެކިބަސް ނެގުމަށް އޭނާ ހާޒިރުކުރީ ސައޫދީ އަރަބިއްޔާގެ ޖިއްދާގައި ހުންނަ ކޮންސިއުލޭޓް އަށެވެ.

ދިފާއުން ވަނީ ސައޫދީގައި އެމްބަސީ ހުއްޓައި ކޮންސިއުލޭޓް މެދުވެރިކޮށް ހެކިބަސް ނަގާތީ، ޖިނާއީ އިޖުރާއަތުގެ ގާނޫނާ ހަވާލާދީ އެކަމަށް އިއުތިރާޒު ކޮށްފައެވެ.

އެގޮތުން ޖިނާއީ އިޖުރާއަތުގެ ގާނޫނުގައި ބުނެފައިވަނީ ރާއްޖެއިން ބޭރުގައި ހެކިބަސް ނަގާނަމަ ހެކި ހާޒިރުކުރަންވާނީ އެމްބަސީއެއް ނުވަތަ ހައިކޮމިޝަނަކަށް ކަމަށާއި، ގާނޫނުގައި ކޮންސިއުލޭޓުގެ ވާހަކަ ބަޔާންކޮށްފައި ނޯންނަކަމަށް ދިފާއުން ވަނީ ބުނެފަ އެވެ.

ޖިނާއީ އިޖުރާއަތުގެ ގާނޫނުގެ 148 ވަނަ މާއްދާގައި ބަޔާންކޮށްފައިވަނީ، ހެކިބަސް ދޭ މީހަކު ހުރީ ދިވެހިރާއްޖޭގެ އެމްބަސީއެއް ނުވަތަ ހައިކޮމިޝަނެއް ގާއިމުވެފައިވާ ގައުމެއްގައިނަމަ، ހެކިބަސް ނަގާނީ އެ މީހަކު އެތަނަކަށް ހާޒިރުކޮށް، އެމްބަސީ ނުވަތަ ހައިކޮމިޝަންގެ ފަސްޓް ސެކްރެޓަރީގެ މަގާމަށްވުރެ މަތީ މަގާމެއްގައި ހުރި މީހެއްގެ ކުރިމަތީގައި ހުވައިކުރުމަށްފަހު ކަމަށެވެ.

އެކަމާއި ގުޅޭގޮތުން ދައުލަތުގެ ވަކީލު ވިދާޅުވީ، ކޮންސިއުލޭޓަކީވެސް ހައިކޮމިޝަނެއް ނުވަތަ އެމްބަސީއެއްގޮތަށް، ރާއްޖޭގެ ގާނޫނު ހިނގާ ތަނެއްކަމަށެވެ. އެހެންކަމުން ކޮންސިއުލޭޓަށް ހާޒިރުކޮށްގެން ވެސް ހެކިބަސް ނެގޭނެކަމަށް ދައުލަތުން ބުނެފައިވެއެވެ.

އެހެން ނަމަވެސް ދެ ފަރާތުގެ ވާހަކަތަކށް ފަހު ޝަރީއަތުން ބުނީ ކޮންސިއުލޭޓަކަށް ހާޒިރުކޮށްގެން ހެކިބަސް ނުނެގޭނެ ކަމަށެވެ. އެހެންކަމުން ސައުދީގައި ހުންނަ ރާއްޖޭގެ އެމްބަސީއަށް ހެކި ހާޒިރުކޮށްގެން ހެކިބަސް ނެގުމަށް، ޝިފާއުގެ ހެކިބަސް ނެގުން ވެސް ވަނީ ފަސްކޮށްފަ އެވެ.

މިއަދުގެ އަޑުއެހުމުގައި ދައުލަތުން ވަނީ ޝިފާއު ސައުދީ އެމްބަސީއަށް ދިއުމަށް ދަތުރުކުރާ ކަމަށާއި، މިއަދު އޭނާގެ ހެކިބަސް ނެގޭނެ އިންތިޒާމުތައް ހަމަޖެއްސުމަށް އެދިފައެވެ.

އެހެން ނަމަވެސް މިއަދު ހެކިބަސް ނެގުމަށް ހަމަޖެއްސި އަޑުއެހުމުގެ އިންތިޒާމުތައް ގޯސްވެގެން ހެކިބަސް ނުނެގި އަޑުއެހުންތައް ދިގުލައިގެން ދިއުމާއި ގުޅިގެން ދިފާއުން ވަނީ އަޑުއެހުން އެހެން ދުވަހަކަށް ހަމަޖައްސާދިނުމަށް އެދިފަ އެވެ.

އެއާއެކު މައްސަލަ ބައްލަވާ ގާޒީ ވަނީ މިއަދުގެ އަޑުއެހުން ނިންމާލާފަ އެވެ. އަދި ލަންކާގައި ހުރި ހެކި ކޯޓަށް ހާޒިރުކޮށްގެން ހެކިބަސް ނެގުމާއި، ސައުދީ އަރަބިޔާގާއި ހުރި ހެކި ދިވެހިރާއްޖޭގެ އެމްބަސީއަށް ހާޒިރުކޮށްގެން ހެކިބަސް ނެގުމަށް، އިތުރު އަޑުއެހުމެއް ބާއްވާނެކަމަށް ގާޒީ ނަދީމު ވިދާޅުވި އެވެ. އަދި އެ އަޑުއެހުން އޮންނާނެ ދުވަހެއް އަންގާނެކަމަށް ވެސް ގާޒީ ނަދީމު ވަނީ ވިދާޅުވެފަ އެވެ.