ރައީސް ޞާލިހު ކެލާ އަށް ވަޑައިގެންނެވުމުން އިސްތިއުފާއަށް ގޮވައި އިހްތިޖާޖު ކޮށްފި!
އެމްޑީޕީގެ ރިޔާސީ ކެންޑިޑޭޓް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރިޔާސީ ކެންޕެއިނަށް ތިލަދުންމަތީ އުތުރުބުރި އަށް ކުރައްވަމުންދާ ދަތުރުފުޅުގައި އެ އަތޮޅު ކެލާ އަށް ވަޑައިގެންނެވުމުން، އިސްތިއުފާ އަށް ގޮވާލައި އިހްތިޖާޖު ކޮށްފިއެވެ.
ރައީސް ޞާލިހު ކެލާ އަށް ވަޑައިގެންނެވުމުން ކެލާގެ ޕީޕީއެމް ސަޕޯޓަރުންތަކެއް އެއްވެ، "ޗޯރޭ" އޭ ގޮވައި ވެރިކަމުން އިސްތިއުފާ ދެއްވުމަށް ވަނީ ގޮވާލާފައެވެ. އަދި އިދިކޮޅު ރިޔާސީ ކެންޑިޑޭޓް ރައީސް ޔާމީން އަބްދުލްގައްޔޫމް މިނިވަން ކުރުމަށް ވެސް އެ އިހްތިޖާޖު ގެ ބައިވެރިން ވަނީ ގޮވާލާފައެވެ.
ކެލާގެ އިހްތިޖާޖު ގެ ބައިވެރިން ރައީސް ޞާލިހު ހުންނެވި ސަރަހައްދާއި ދުރު ކުރުމަށް މަގު ބަންދު ޓޭޕް އަޅައި، ފުލުހުން އެ ސަރަހައްދު ބަންދު ކޮށްފައިވާއިރު, ފުލުހުން ވަނީ އިހްތިޖާޖު ގެ ބައިވެރިންނަށް ހުރަސް އެޅުމުގެ މަސައްކަތް ވެސް ކޮށްފައި ކަމަށް މައުލޫމާތު ލިބެއެވެ.
އަދި ރައީސް ޞާލިހުގެ ބައްދަލުމުގެ ތެރެއަށް ކެލާ ކައުންސިލްގެ މުވައްޒަފުންނަށް ވަދެވުނު އިރު, އެއްވެސް ކައުންސިލަރަކަށް އެ ފުރުސަތު ނުދޭ ކަމަށްވެސް އިހްތިޖާޖު ގެ ބައިވެރިއެއް ވަނީ ބުނެފައެވެ. ކެލާ ކައުންސިލަކީ އިދިކޮޅު ޕީޕީއެމްގެ އަގުލަބިއްޔަތު އޮންނަ ކައުންސިލެކެވެ.
ރައީސް ޞާލިހު ހއ އަތޮޅަށް ކުރައްވާ މި ދަތުރުފުޅުގައި އެ އަތޮޅު ހޯރަފުއްޓަށާ އިހަވަންދޫ އަށް ވަޑައިގަތުމުން ވެސް ރައީސް ޔާމިނުގެ ސަޕޯޓަރުން ވަނީ އެމަނިކުފާނު މިނިވަންކުރުމަށް ގޮވާލާ މުޒާހަރާކޮށްފަ އެވެ. ހަމަ އެއާއެކު ރައީސް ޞާލިހުގެ އިސްތިއުފާއަށް ވެސް އިހްތިޖާޖު ތަކުގެ ބައިވެރިން ވަނީ ގޮވާލާފައި ވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
