ރައީސް ޞާލިޙްގެ ފަސްއަހަރަކީ ޒުވާނުން މަގުމަތިވި ފަސް އަހަރު: ޖަމީލް

ރައީސް އިބްރާހިމް މުޙައްމަދު ޞާލިޙްގެ ވެރިކަމުގެ ފަސް އަހަރަކީ ޒުވާނުން މަގުމަތިވި ފަސް އަހަރު ކަމަށް ކުރީގެ ނައިބު ރައީސް ޑރ މުޙައްމަދު ޖަމީލް އަޙްމަދު ވިދާޅުވެއްޖެއެވެ.

ޑރ ޖަމީލް މިހެން ވިދާޅުވެފައިވަނި އޭނަ ކުރެއްވެވި ޓްވީޓެއްގައެވެ.

ޓުވިޓާގައި މީހަކު، ރައީސް ޞާލިހު ވަނީ ޒުވާނުންގެ ޖީލެއް ފުނޑުފުނޑުކޮށް ކުނި ކޮތަޅުން ކައިބޮއެ އުޅޭ ދަރަޖައަށް ވައްޓާލާފަވާ ކަމަށް ބުނެފައިވާ ޓުވީޓެއް ރިޓުވީޓް ކުރައްވަމުން ޖަމީލް ވިދާޅުވީ އެއީ ހަޤީޤަތް ކަމަށާއި، ރައީސް ޞާލިޙްގެ ފަސްއަހަރަކީ ޒުވާނުން މަގުމަތިވި ފަސްއަހަރު ކަމަށެވެ.

" ޒުވާނުން ނިކަމެތިވެ މުޖްތަމަޢުން އެކަހެރިވެއްޖެ، އިބޫގެ ވެރިކަމަކީ ޒުވާނުންނަށް ދިމާވި ކާރިސާއެއް،. ޖޫރިމާނާއިންނާ މަސްތުވާތަކެތިން ޒުވާނުން މަގުމަތިކޮށްފި، ހަމައެކަނި އުއްމީދަކީ ރައީސް ޔާމިން" ޖަމީލް ވިދާޅުވެފައިވެއެވެ.

ރައީސް ޞާލިޙް ފާއިތުވި ހަފްތާގައި މީމަށާއި ވާވަށް ކުރެއްވި ކެމްޕޭނު ދަތުރުފުޅުގެ ތެރޭގައި މ މަޑުއްވަރި އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ވިދާޅުވީ، ކުރިއަށް އޮތް ދައުރަށް އިންތިހާބުވެ ވަޑައިގެންފި ނަމަ، އެ ފަސް އަހަރުގެ ތެރޭގައި، ޒުވާން އައު ޖީލަށް ފުރުސަތުތައް ހުޅުވާލައްވާނެކަމަށެވެ.

އަދި ސަރުކާރުން ހުޅުވާލާފައިވާ ހިލޭ ޑިގްރީގެ އެހީގައި، 17,858 ދަރިވަރުން ތައުލީމް ހާސިލް ކުރަމުންދާ ކަމަށް އެމަނިކުފާނު ވިދާޅުވިއެވެ. މީގެއިތުރުން ކުރިއަށް އޮތް ތިނެއް ނުވަތަ ހަތަރު އަހަރުގެ ތެރޭގައި އެކުދިން ކިޔަވައި ނިމިގެން މަސައްކަތުގެ މާހައުލަށް ނުކުނާނެ ކަމަށްވެސް ރައީސް ވަނީ ވިދާޅުވެފައެވެ.