ޖޭސީއައިއެމް އާއި ކޮމަންވެލްތް ސެކްރެޓޭރިއެޓްގެ ޕްރީ އިލެކްޝަން ޓީމް ބައްދަލުކޮށްފި

ކޮމަންވެލްތް ސެކްރެޓޭރިއެޓްގެ ޕްރީ އިލެކްޝަންސް އެސެސްމެންޓް ޓީމް (ޕީއީއޭއެމް) އާއި ޖޫނިއާ ޗެމްބާ އިންޓަނޭޝަނަލް މޯލްޑިވްސް (ޖޭސީއައިއެމް) ގެ ރައީސް އަހްމަދު ފާރިހު މުހައްމަދާއި އެ ޖަމިއްޔާގެ ސެނެޓަރ ހަސަން ފަޔާޒް ބައްދަލުކުރައްވާފިއެވެ.

އެގޮތުން މިމަހު 18 ގައި ހޮޓެލް ޖެންގައި ބޭއްވުނު މި ބައްދަލުވުމުގައި ޖޭސީއައިއެމްގެ ރައީސް ފާރިހު ވަނީ ސިޔާސީ ކަންކަމުގައި ޒުވާނުންނާއި މަދަނީ ޖަމިއްޔާގެ މެންބަރުން ބައިވެރިވުމުގެ މުހިންމުކަމާއި ގުޅޭ ގޮތުން މަޝްވަރާ ކުރައްވާފައެވެ.

އަދި މިހާރަށްވުރެ ހަރުދަނާ އަދި ހުރިހާ ފަރާތްތައް ހިމެނޭ ފަދަ އިންތިޚާބީ ނިޒާމެއް އުފެއްދުމަށްޓަކައި ނިންމުންތައް ނިންމާއިރު ޒުވާނުން ބައިވެރިކުރުމުގެ މުހިންމު ކަން ފާހަގަކުރައްވާފައެވެ.

މިއާއިއެކު ސަރުކާރާއި އާންމުންނާއި ދެމެދު އޮންނަ އިތުބާރު ވަރުގަދަ ކުރުމަށްޓަކައި ސަރުކާރު ޖަވާބުދާރީކުރުވުމާއި، ހާމަކަން ބޮޑު ގޮތެއްގައި ކަންކަން ކުރުމާއި ވެރިކަން ކުރުމުގައި ރަނގަޅު އުސޫލުތައް ގެންގުޅުމަކީ ވަރަށް ބޮޑަށްވެސް ބޭނުންވެފައިވާ ކަމެއްގެ ގޮތުގައި ފާރިހު ވަނީ އަލިއަޅުއްވާފައެވެ.

ޕެނަލްގެ މަޝްވަރާގައި ސެނެޓަރ ފަަޔާޒް ވަނީ ފާރިހުގެ ޝުއޫރުތައް ތަކުރާރުކުރައްވާފައެވެ. އެގޮތުން ފަޔާޒް ވަނީ ތަރައްޤީއަށް ހުރަސްއެޅޭ ސިޔާސީ ފިއްތުންތައް ކުޑަކުރުމުގެ މުހިންމެ ކަމަށް އަލިއަޅުއްވާފައެވެ.

އަދި ސިޔާސީ ގޮތުން ހުރި ގުޅުމަށް ބެލުމެއްނެތި ކޮންމެ ފަރުދެއްވެސް ސިޔާސީ މަރުހަލާތަކުގައި އިންސާފުވެރި އަދި ހަމަހަމަ ގޮތެއްގައި ބައިވެރިވެވޭނެ ހާލަތްތަކެއް ޤާއިމްކުރުމުގެ މުހިންމުކަން ވެސް ފަޔާޒް ވަނީ ފާހަގަކުރައްވާފައެވެ.

މިއާއިއެކު މިއަށްވުރެ ތަފާތުކުރުން ކުޑަ، ތަނަވަސް މުޖުތަމައެއް ބިނާކުރުމަށްޓަކައި ރަނގަޅު ވެރިކަމެއްގެ ބޭނުންތެރިކަމަށް ވެސް ފަޔާޒް ވަނީ އަލިއަޅުވާލައިފައެވެ.

މީގެ އިތުރުން ފާރިހާއި ފަޔާޒު ވަނީ ޑިމޮކްރެޓިކް އިޖުރާއަތްތައް ކުރިއެރުވުމާއި މިނިވަން އިންސާފުވެރި އިންތިހާބުތައް ކަށަވަރުކުރުމުގައި ކޮމަންވެލްތްގެ ޕީއީއޭއެމް އިން ކުރާ މަސައްކަތަށް ޝުކުރު އަދާކުރައްވާފައެވެ.

އެގޮތުން ޕީއީއޭއެމް އިން އަޙްލާޤާއި ހަމަތައް ދަމަހައްޓައި ކުރިއެރުވުމަށް ކުރަމުންދާ މަސައްކަތަށް ފާރިހާއި ފަޔާޒު ވަނީ ޝުކުރު އަދާކުރައްވާފައެވެ.

މި ކަންކަމުން ދައްކުވައިދެނީ ޖޭސީއައިއެމް އާއި އެކުންފުނީގެ މަންދޫބުން ރާއްޖޭގެ ސިޔާސީ ކަންކަމުގައި ޒުވާނުންގެ ބައިވެރިވުމަށާއި، ޖަވާބުދާރީކުރުވުމަށާއި، ރަނގަޅު ވެރިކަމެއް ކުރިއެރުވުމަށް ކުރާ މަސައްކަތެވެ.