ހަމަލާތައް ހުއްޓާލަން އިސްރާއިލާ އީރާނުން އެއްބަސްވެއްޖެ: ޓްރަމްޕް

އިސްރާއީލާއި އިރާނާ ދެމެދު ބަދަލުކުރެވެމުންދާ ހަމަލާތައް މުޅިން ހުއްޓާލަން އެއްބަސްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް، އިއުލާންކޮށްފިއެވެ.

އިރާނުން ނިއުކްލިއަރ ހަތިޔާރުތައް ހަދަމުންދާ ކަމަށާ އެކަމުގެ ނުރައްކާ އިސްރާއިލަށް އޮތް ކަމަށް ބުނެ، އިސްރާއީލުން ވަނީ މިމަހުގެ 13 ވަނަ ދުވަހު އިރާނުގެ ނިއުކްލިއަރ ސައިޓް ތަކަށް ހަމަލާ ދީފައެވެ.

އެފަހުން އީރާނުންވެސް އިސްރާއިލަށް ހަމަލާތައް ދެމުން ގޮސްފައިވާއިރު، އެމެރިކާއިންވެސް އީރާނަށް ވަނީ ހަމަލާަދީފައެވެ. އެ ހަމަލާއަށް ރައްދު ދިނުމުގެ ގޮތުން އިރާނުން ވަނީ އިއްޔެގެ ވަގުތެއްގައި ގަތަރުގައި ހުންނަ އެމެރިކާގެ އަސްކަރީ މަރުކަޒަކަށް މިސައިލް ހަމަލާތަކެއް ދީފައެވެ.

އެ ހަމަލާއަށް މާ ގިނަ ވަގުތު ނުވަނީސް، ޓްރަމްޕްގެ މީސްމީޑިއާ އެޕްލިކޭޝަން ކަމަށްވާ 'ޓްރޫތު ސޯޝަލް'ގައި ކުރި ޕޯސްޓެއްގައި ވަނީ، އީރާން-އިސްރާއިލް ހަނގުރާމަ ހުއްޓާލަން އެއްބަސްވެފައިވާ ކަމަށް އިއުލާން ކޮށްފައެވެ.

"'12 ދުވަހުގެ ހަނގުރާމަ' އެއްކޮށް ނިމުމަކަށް ގެންނަން އިސްރާއިލާއި އިރާނުން ވަނީ އެއްބަސްވެފައި. ކުރިއަށް އޮތް 24 ގަޑިއިރު ތެރޭގައި އެކަން ތަންފީޒުވާނެ." ޓްރަމްޕް ބުނެފައިވެއެވެ.

މިކަމާ ގުޅިގެން އިސްރާއީލުން ބަހެއް ބުނެފައެއް ނުވެއެވެ. ނަމަވެސް އިރާނުން ވަނީ ހަނގުރާމަ ހުއްޓާލުމަށް އެއްބަސްވެފައިވާކަން ކުރިން ކަށަވަރުކޮށްދީފައެވެ. އެހެންނަމަވެސް، އިރާނުގެ ފޮރިން މިނިސްޓަރ ވިދާޅުވެފައިވަނީ އިސްރާއީލުން ހަމަލާ ދިނުން ހުއްޓާނެ ކަމަށް ޔަގީންނުކުރެވޭނަމަ، ހަނގުރާމަ ހުއްޓުމެއް ނާންނާނެ ކަމަށެވެ.

އިރާނުގެ ޚާރިޖީ ވަޒީރު އައްބާސް އަރާޤްޗީ މިއަދު ފަތިހު ވިދާޅުވީ އިސްރާއީލުން އިރާނުގެ ރައްޔިތުންނާ ދެކޮޅަށް ހިންގާ "ޤާނޫނާ ޚިލާފު ޢުދުވާން" މިއަދު 4:00 އަށް ހުއްޓާލައިފިނަމަ އިރާނުން ހަމަލާތައް ހުއްޓާލާނެއެވެ.

އިރާނުން ބުނާ ގޮތުގައި، ޖޫން 13 ގައި އިސްރާއީލުން ހަމަލާ ދޭން ފެށިފަހުން 13 ކުޑަކުދިންނާ އެކު 400 އަށް ވުރެ ގިނަ މީހުން ވަނީ ޝަހީދުވެފައެވެ. އަދި، 3,056 އަށް ވުރެ ގިނަ މީހުންނަށް ޒަޚަމްވެފައިވެއެވެ. އިސްރާއީލަށް ދިން ހަމަލާތަކުގައި 24 މީހުން ވަނީ މަރުވެފައެވެ.