ރައީސް ޞާލިހު ހުންނެވީ ކުރެއްވި ހުވައާ ޚިލާފުވެވަޑައިގެން: ވަހީދު

ރައީސުލްޖުމުހުރިއްޔާ އިބްރާހިމް މުހައްމަދު ޞާލިހް ހުންނެވީ އެމަނިކުފާނު ކުރެއްވި ހުވަޔާ ޚިލާފުވެވަޑައިގެންކަމަށް ރައްޔިތުން މަޖިލީހުގެ އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.

ވައްޑެ މިފަދައިން ވިދާޅުވީ، ރައީސް ޞާލިހު ކުރެއްވި ރައީސުލްޖުމްހޫރިއްޔާ ކަމުގެ ހުވައިން ބައެއްގެ ވީޑިއޯ ޓުވިޓާގައި ހިއްސާކުރައްވަމުންނެވެ.

އެ ވީޑިއޯ ގައި ރައީސް ޞާލިހު ވަނީ ދިވެހިރާއްޖޭގެ ޖުމްހުރިއްޔާގެ ގާނޫނު އަސާސީ އާއި ރައްޔިތުންގެ ހައްގުތައް ރައްކާތެރިކުރުމަށާއި ދިވެހި ގައުމަށް އިހްލާސްތެރިވުމަށާއި ދިވެހިރާއްޖޭގެ ޖުމުހުރިއްޔާގެ ގާނޫނު އަސާސީ އާއި ގާނޫނާ އެއްގޮތްވާ ގޮތުގެ މަތިން ރައީސުލްޖުމްހުރިއްޔާގެ މަސްއޫލިއްޔަތުތަކާއި ވާޖިބުތައް ތެދުވެރިކަމާ އަމާނާތްތެރިކަމާއެކު އަދާކުރުން މަތީ ދެމިހުރުމަށް މާތް الله ގަންދީ ހުވާ ކުރައްވާފައެވެ.

އެކަމާއި ގުޅިގެން ވައްޑެ ވިދާޅުވީ ރާއްޖޭގެ ސަރަހައްދުން ބައެއް ގެއްލިގެން ދިޔައިރު ދިވެހިރާއްޖޭގެ މަސްލަހަތާ، ޤާނޫނުއަސާސީއާއި ޤާނޫނުގައި ކަނޑައަޅާފައިވާ ސަރަހައްދުގެ ދިފާޢުގައި އެއްވެސް ކަމެއް ރައީސް ޞާލިހް ކުރައްވާފައި ނުވާކަމަށެވެ.

އެހެންކަމުން އެމަނިކުފާނު އެހުންނެވީ ކުރެއްވި ހުވަޔާ ޚިލާފުވެވަޑައިގެންކަމަށް ވައްޑެ ވިދާޅުވިއެވެ.

ވައްޑެ މިފަދައިން ވިދާޅުވެފައިވާއިރު، ޗާގޯސްއާއި ދިވެހިރާއްޖެއާއި ދެމެދު ފުށުއަރާ ސަރަހައްދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައާއި ގުޅިގެން އިޓްލޮސްއިން އޭޕްރިލް 28 ވަނަ ދުވަހު ނިންމި ނިންމުމުގެ ސަބަބުން ރާއްޖޭގެ ކަނޑުގެ ސަރަހައްދުން ބައެއް ގެއްލިގެން ގޮސްފައިވާކަމަށް ސަރުކާރާއި އިދިކޮޅު ފަރާތްތަކުން އަންނަނީ ބުނަމުންނެވެ.

އެގޮތުން އެ ނިންމުމުގެ ސަބަބުން ދިވެހިރާއްޖޭގެ ގާނޫނު އަސާސީން ދިވެހިންގެ ސަރަހައްދު ކަމުގައި ކަނޑައަޅާފައިވާ 200 ނޯޓިކަލް މޭލުގެ ހާއްސަ އިގްތިސާދީ ސަރަހައްދުން 45،331 އަކަ މީޓަރ ގެއްލިފައިވާ ކަމަށް އެފަރާތްތަކުން ބުނެއެވެ.