ރައީސް ނަޝީދު މިއަދު ދިއްދޫއަށް ވަޑައިގަންނަވަނީ

ރައްޔިތުން މަޖިލީހުގެ ރައީސް މުހައްމަދު ނަޝީދު ހއ. ދިއްދޫއަށް ވަޑައިގަތުމަށް ހަމަޖެހިފައިވާ ކަމަށް ރައްޔިތުން މަޖިލީހުން ބުނެފި އެވެ.

ނަޝީދު ސިންގަޕޫރަށް ވަޑައިގެންފައިވާ ކަމަށް ބައެއް މީޑިއާތަކުގައި ރިޕޯޓް ކުރުމާއި ގުޅިގެން މަޖިލީހުގެ އިދާރާއިން މީޑިއާ ތަކަށް ފޮނުއްވި މެސެޖެއްގައި ވަނީ، އެމަނިކުފާނު މިވަގުތު ހުންނެވީ މާލޭގައި ކަމަށް ވިދާޅުވެފައެވެ.

އަދި ސިންގަޕޫރަށް ފުރީ މަޖިލީހުގެ ހަ ސީނިއާ މުވައްޒަފުން ކަމަށްވެސް ބުނެފައިވެއެވެ.

މިއާއެކު މަޖިލީހުން ބުނީ، ތިލައުތުރު އެވޯޑް ދިނުމުގެ ރަސްމީ ޖަލްސާގައި ބައިވެރިވެވަޑައިގަތުމަށް ރައީސް ނަޝީދު މިއަދު މެންދުރު ހއ‫. ދިއްދޫއަށް ވަޑައިގަންނަވާނެ ކަމަށެވެ.

ހއ. އަތޮޅު ކައުންސިލުން އިންތިޒާމުކޮށްގެން ބާއްވާ "ތިލައުތުރު އެވޯޑްސް" އަކީ އެކިދާއިރާތަކުން ފާހަގަކުރެވޭފަދަ އަގުހުރި ޚިދްމަތްތަކެއް ހއ.އަތޮޅަށް ކޮށްދެއްވާފައިވާ ފަރާތްތަކާއި، އަދި މި ނޫނަސް ތަފާތު ފަންނުތަކުން ފާހަގަކޮށްލެވޭފަދަ އަގުހުރި ޚިދްމަތްތަކެއް ހއ.އަތޮޅަށް ކޮށްދެއްވާފައިވާ ފަރާތްތަކާއި، ހއ.އަތޮޅުގެ ސްކޫލް، މަދަރުސާތަކުން ފަޚުރުވެރި ވަނަތައް ހޯދާފައިވާ ދަރިވަރުންނާއި، އަތޮޅަށް އެންމެ ޚިދްމަތްތެރި ރިޒޯޓަކާއި، އަދި އަތޮޅުގެ އެންމެ ހިންގުންތެރި ރަށު ކައުންސިލްތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއަކާއި، ކްލަބު ޖަމްޢިއްޔާއެއް ފާހަގަކޮށް، އެފަރާތްތަކުގެ އަގު ވަޒަންކުރުމަށް ހއ. އަތޮޅު ކައުންސިލުން ބާއްވާ ޙަފްލާއެކެވެ.

މި ޖަލްސާ އޮންނާނީ މި ރޭ 09:00 ގައި ހއ.އަތޮޅު ކައުންސިލްގެ އިދާރާގައި ކަމަށް އެކައުންސިލުން ބުނެއެވެ.