ހިތާމަވެރި ދުވަހެއް، ނަމަވެސް ނަޝީދު ވަކިވުމަކީ ކުރިއަށް ދިއުމަށް ފަހިވި މަގެއް: ފައްޔާޒު

އެމްޑީޕީގެ ރައީސް މުޙައްމަދު ނަޝީދު އެ ޕާޓީން ވަކިވެވަޑައިގަތުމަކީ ހިތާމަކުރައްވާ ކަމެއް ކަމަށާއި، އެހެން ނަމަވެސް، އެމަނިކުފާނުގެ އެ ނިންމެވުމުގެ ސަބަބުން ޕާޓީ ހިންގުމަށް މަގުފަހިވެގެން ގޮސްފިކަމަށް އެމްޑީޕީގެ ޗެއާ ޕާސަން ފައްޔާޒު އިސްމާއިލް ވިދާޅުވެއްޖެ އެވެ.

އެމްޑީޕީ އުފެއްދުމުގަޔާއި، އެ ޕާޓީ ހިންގުމުގައި އިސް ދައުރެއް އަދާކުރެއްވި އަދި އެ ޕާޓީގެ ޓިކެޓުގައި އެންމެ ފުރަތަމަ ރައީސްކަން ކުރެއްވި މުހައްމަދު ނަޝީދު ވަނީ ކުއްލިގޮތަކަށް ޕާޓީން ވަކިވެވަޑައިގެންފަ އެވެ. އަދި ނަޝީދު ވަނީ ޕާޓީން ވަކިވެވަޑައިގަތުމަށް އަތުން ސިޓީފުޅެއް ލިޔުއްވާ ހުށައަޅުއްވާފަ އެވެ.

ރައީސް ނަޝީދު އެމްޑީޕީން ވަކިވެވަޑައިގަތުމާއި ގުޅޭގޮތުން ފައްޔާޒު އިސްމާއިލް ކުރެއްވި ޓްވީޓެއްގައި ވިދާޅުވެފައި ވަނީ މިއަދަކީ (ނަޝީދު އިސްތިއުފާ ދެއްވި ދުވަހަކީ) ޚުދު އެމަނިކުފާނާއި އެމްޑީޕީއަށް ވެސް ވަރަށް ފުން ހިތާމައެއް ކުރިމަތިވި ދުވަހެއް ކަމަށެވެ.

އެހެން ނަމަވެސް އެމަނިކުފާނުގެ އެ ނިންމުވުމާއެކު ޕާޓީ ހިންގުމަށް ފަހުފަހިވެގެން ގޮސްފައިވާކަމަށް ފައްޔާޒު ވިދާޅުވި އެވެ.

އެއާއެކު ފައްޔާޒުވަނީ އެމްޑީޕީގެ ކުރިއެރުމަށް ރައީސް ނަޝީދު ކޮށްދެއްވާފައިވާ ބުރަ މަސައްކަތްޕުޅު ފާހަގަކުރައްވާ އެމަނިކުފާނަށް ވަރަށް ބޮޑަށް ޝުކުރުއަދާކުރައްވާފަ އެވެ.

ނަޝީދު ޕާޓީން ވަކިވެވަޑައިގެންފައިވަނީ އެމްޑީޕީގެ ދެ ރައީސުންގެ ދެމެދުގައި އުފެދުނު ވާދަވެރިކަން ބޮޑުވެ، ނަޝީދު ޕާޓީން އެކަހެރިކޮށްފައިވާކަމަށް ބުނެ އޭނާގެ ވަފާތެރިން ޕާޓީ ދޫކުރައްވާ އާ ސިޔާސީ ޕާޓީއެއް އުފެއްދުމަށް ވަރަށް ފޯރީގައި މަސައްކަތް ކުރައްވަމުންދާ ދަނޑިވަޅެއްގަ އެވެ.

މީގެ ދެ ދުވަސްކުރިން ނަޝީދު ވަނީ އޭނާ އެމްޑީޕީން ވަކިވެވަޑައި ނުގަންނަވާނެ ކަމަށާއި، އެ ޕާޓީ އަނބުރާ ހޯއްދަވާނެކަމަށް ވިދާޅުވެފަ އެވެ.

އެހެން ނަމަވެސް ހަމަ ކުއްލި ގޮތަކަށް އެމަނިކުފާނު އިސްތިއުފާދެއްވާފައިވާއިރު، ހަގީގަތުގައި ޕާޓީން ވަކިވެވަޑައިގެތް ސަބަބު އަދި ހާމަކުރައްވާފައެއް ނުވެއެވެ.