އިނގުރައިދޫ ޒުވާނެއްގެ ސްޕޮންސާޝިޕްގައި އެ ރަށު 4 ކުދިން އޮޕަން ވޯޓާ ޑައިވާ ކޯސް ފުރިހަމަ ކޮށްފި

ރ. އިނގުރައިދޫ ޕެޑި އިންސްޓްރަކްޓަރ އެއް ކަމުގައިވާ އަހުމަދު ސާމިރުގެ ސްޕޮންސާޝިޕް ގެ އެހީގައި އެ ރަށު 4 ދަރިވަރުން އޯޕަން ވޯޓާ ޑައިވާ ކޯސް ފުރިހަމަ ކޮށްފި އެވެ.

ޕެޑި އިސްޓްރަކްޓާރ އެއްގެ ގޮތުގައި 20 އަހަރު ދުވަހު މަސައްކަތް ކޮށްފައިވާ ސާމިރު ބުނެފައިވާ ގޮތުގައި އޭނާގެ ރަށް، އިނގުރައިދޫ ގެ އަރަމުން އަންނަ ޒުވާނުން ކުރިއަރުވައި، އެ ޒުވާނުންނަށްޓަކައި ކަމެއް ކޮށްދިނުމަށް އެނާގެ ހިތުގައި އަބަދުވެސް އެދުމެއް އޮވެއެވެ. އަދި، އެކަން ހާސިލު ކުރުމަށްޓަކައި އޭނާއަށް އެންމެ ރަނގަޅަށް ކޮށްދެވޭނެ ކަމަކީ އެކުދިންނަށް ޕެޑި އޯޕަން ވޯޓާ ޑައިވާ ކޯހެއް ފުރިހަމަ ކުރުމުގެ ފުރުސަތު ދިނުން ކަމުގައި ވެސް އޭނާ ދެކުނެވެ.

އެހެންނަމަވެސް، އެކަމަށް ބޭނުންވާ ތަކެތި އުނގޫފާރުން ލިބެން ނެތުމުން، އެ ރަށާއި ކައިރީ އޮންނަ ބްރެނިއާ ކޮށްޓެފަރު ރިސޯޓުގަ އެހީއަށް އެދުނު ކަމަށާ، އެކަމަށް އެ ރިސޯޓުގެ ފުރިހަމަ އެއްބާރުލުން ދިން ކަމަށްވެސް ސާމިރު ބުންޏެވެ.

އެ ރިސޯޓުގެ އެހީގައި މިމަހު 15 ވަނަ ދުވަހުން 19 ވަނަ ދުވަހަށް ކުރިއަށް ގެންދެވުނު މި ކޯހުގައި ބައިވެރިވެފައި ވަނީ އިނގުރައިދޫ ސުކޫލުގެ ގްރޭޑް 9 އެއްގައި ތައުލީމް ހާސިލް ކުރަމުންދާ، ހަތަރު ދަރިވަރުން ކަމުގައިވާ ހަސަން، ލޫތު، މުހައްމަދު ޝަޒުވާން އަދި މުހައްމަދު ރައްޔާން އެވެ.

ކޯހުގައި ކިޔަވައިދިން މި ހަތަރު ދަރިވަރުންގެ ތިޔަރީބައި އޮންލައިންކޮށް ކުރިއަށް ގެންދެވުނުއިރު، އެކުދިން އެންމެ ފުރަތަަމަ ޑައިވް ކޮށްފައިވަނީ ބްރެނިއާ ކޮށްޓެފަރު ގެ މޫދުގައި ކަމަށް ސާމިރު ބުނެފައިވެއެވެ. އެއަށްފަހު، ދޯންޏެއްގައި އެ ރިސޯޓުގެ ފަރުގައި ވެސް އެކުދިން ފީނާފައިވާ ކަމަށާ، އެއީ އެކުދިންނަށް ވެސް ތަފާތު ތަޖުރިބާއެއް ކަމަށް ކުދިން ސިފަ ކުރާ ކަން ސާމިރު ފާހަގަކޮށްފައިވެއެވެ.

މި ކަމާއި ގުޅިވައި ބްރެނިއާ ކޮށްޓެފަރު އިން ވަނީ ސާމިރުގެ މަސައްކަތައް ތައުރީފް ކޮށް، އޯޕަން ވޯޓާ އެމްބެސެޑަރުން ތަކެއް އުފެއްދި ކަމަށްޓަކައި އޭނާއަށް ޝުކުރު އަދާކޮށްފައެވެ..