މައްސަލަ ބަލަނިކޮށް ގާޒީ އިޙްސާން އިސްތިޢުފާ ދެއްވައިފި
ސިވިލް ކޯޓުގެ ޤާޟީ ޢަބްދުﷲ އިޙްސާންއާ ގުޅޭގޮތުން ހުށަހެޅިފައިވާ ޖިންސީ ފުރައްސާރައިގެ މައްސަލައެއް ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަމުން ދަނިކޮށް، އޭނާ މިއަދު ފަނޑިޔާރުކަމުގެ މަޤާމުން އިސްތިޢުފާ ދެއްވައިފިއެވެ.
ޤާޟީ އިޙްސާން ފަނޑިޔާރުކަމުން އިސްތިޢުފާ ދެއްވިކަން ޖޭއެސްސީން ވަނީ ކަށަވަރުކޮށްދީފައެވެ. އެ ކޮމިޝަނުން ބުނީ، އިސްތިޢުފާގެ ސިޓީ ކޮމިޝަނަށް ލިބިފައިވަނީ މިއަދު ކަމަށާއި، އެހެންކަމުން މިއަދުން ފެށިގެން އޭނާ ފަނޑިޔާރުކަމުގެ މަޤާމުން ވަކިވެފައިވާ ކަމަށެވެ.
އިޙްސާންގެ މައްޗަށް ތުހުމަތުކުރެވުނު ޖިންސީ ފުރައްސާރައިގެ މައްސަލައާ ގުޅިގެން، މިދިޔަ އޮގަސްޓް މަހުގެ 19 ވަނަ ދުވަހު ޖޭއެސްސީން ވަނީ 60 ދުވަހުގެ މުއްދަތަކަށް އޭނާ ސަސްޕެންޑްކޮށްފައެވެ. އޭނާ މަޤާމުން އިސްތިޢުފާ މި ދެއްވީ، އެ ސަސްޕެންޝަންގެ މުއްދަތު ހަމަނުވަނީސް، އަދި އެ މައްސަލައިގެ ތަޙްޤީޤު އެ ކޮމިޝަނުން ކުރިއަށް ގެންދަނިކޮށެވެ.
ޤާޟީ އިޙްސާން މިއަދު އިސްތިޢުފާ ދެއްވި ނަމަވެސް، އޭނާ ފަނޑިޔާރުކަމުގެ މަޤާމުން ވަކިކުރުމަށް ރައްޔިތުންގެ މަޖިލީހަށް ހުށަހެޅުމަށް ޖޭއެސްސީން ނިންމާފައިވާ ކަމުގެ މަޢުލޫމާތު ވަނީ ލިބިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
