ރަސްމާލެ މަޝްރޫޢުގެ ސަބަބުން އާބަންކޯގެ ކޭޝްފްލޯއަށް އަސަރެއް ނުކުރާނެ: ފަޒުލް

ރަސްމާލެ މަޝްރޫއަކީ އާބަންކޯގެ އަތުން ފައިސާ ޚަރަދުކޮށްގެން ހިންގާ މަޝްރޫޢުއެއް ނޫން ކަމަށާއި، އެ މަޝްރޫއުގެ ސަބަބުން އެ ކުންފުނީގެ ކޭޝްފްލޯ އަށް އެއްވެސް އަސަރެއް ނުކުރާނެ ކަމަށް، އާބަންކޯގެ މެނޭޖިންގ ޑިރެކްޓަރު އިބްރާހީމް ފަޒުލް ރަޝީދު ވިދާޅުވެއްޖެއެވެ.

ފުށިދިއްގަރުފަޅު ހިއްކައިގެން ތަރައްގީކުރާ ރަސްމާލެ މަޝްރޫޢުއާ ގުޅޭގޮތުން ނޫސްވެރިންނަށް މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ފަޒުލް ވިދާޅުވީ، އެ މަޝްރޫއު އަކީ ސަރުކާރުގެ އެއްވެސް ބައިވެރިވުމެއްނެތި އާބަންކޯއިން ޒިންމާވާގޮތަށް، ކޯޕަރޭޓް ގެރެންޓީ އަކާ އެކު ފަށާ މަޝްރޫއެއް ކަމަށެވެ.

އަޅުގަނޑުމެންގެ ކޭޝްފްލޯ އަކަށް މީގެން ކުރާނެ އަސަރެއް އިރާދަކުރެއްވިއްޔަކާ ނެތް. ކުރިއަށް އޮތް ތަނުގައި، މިޕްރޮޖެކްޓްގެ ސަބަބުން، އަޅުގަނޑުމެންގެ ކޭޝްފްލޯ އަށް އިތުރު ތިޔާގި ކަމެއް، އިތުރު ލޯނު ނެގުމުގެ ފުރުސަތުތަކެއް، ދިވެހިރާއްޖެ އާއި، ދިވެހިރާއްޖެއިން ބޭރުގެ ކުންފުނިތަކަށް އަޅުގަނޑުމެންގެ އެޝުއަރެންސް އިތުރުވެގެން މިދިޔައީ.

އިބްރާހީމް ފަޒުލް ރަޝީދު

ފަޒުލް އިތުރަށް ވިދާޅުވީ، އާބަންކޯ އަކީ ބޭރު ގައުމުތަކުގައި ވެސް ނަން މަޝްހޫރު ކުންފުންޏެއް ކަމަށެވެ. އަދި އާބަންކޯއާއި ގުޅިގެން ޕްރޮޖެކްޓްތައް ކުރިއަށް ގެންދިޔުމުގެ ޝައުގުވެރިކަން ވަރަށް ގިނަ ކުންފުނިތަކުން ފާޅުކުރާ ކަމަށް ވެސް އޭނާ ވިދާޅުވި އެވެ.

އަޅުގަނޑުމެން ކުންފުނިން ވެސް މީގައި ފައިސާއެއް ޚަރަދެއް ނުކުރަން. ދައުލަތަކުން ވެސް ފައިސާއެއް ޚަރަދެއް ނުކުރަން. ބިން ހިއްކައިގެން ލިބޭ ލޭންޑް ވިއްކައިގެން މީގެން އަގު އަދާ ކުރަނީ.... މިއީ އެއްވެސް ވަރަކަށް، ކުންފުނިން (އާބަންކޯއިން) ލާރި ދައްކާ ގޮތަށް ކުރާ މަސައްކަތެއް ނޫން. އަޅުގަނޑުމެންނަށް، ހުޅުމާލެއިން ދޫކުރާ 10 ހެކްޓަރާއި، ރަސްމާލެއިން ދޫކުރާ 60 ހެކްޓަރުގެ ބަދަލުގައި މި ލިބެނީ 1093 ހެކްޓަރު ބިން. އެޗްޑީސީ (އާބަންކޯ)ގެ އެސެޓަށް.

އިބްރާހީމް ފަޒުލް ރަޝީދު

ރަސްމާލެ މަޝްރޫއަށް ފުށިދިއްގަރު ފަޅުން ޖުމުލަ 1153 ހެކްޓަރުގެ ބިން ހިއްކުމަށް ހަމަޖެހިފައިވާ ކަމަށް މީގެ ކުރިން އާބަންކޯއިން ބުނެފައިވެއެވެ.

2 ފިޔަވައްސަކަށް ބަހާލައިގެން ކުރިއަށްގެންދާ މި މަޝްރޫއުގެ ބިން ހިއްކުމުގެ މަސައްކަތް ކުރަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާއި ދުނިޔޭގައި ބިންހިއްކުމުގެ މަސައްކަތުގައި އެންމެ ގާބިލު އަދި ރާއްޖޭގައި ވެސް މަޝްރޫއުތައް ހިންގަމުންދާ ކުންފުންޏެއް ކަމުގައިވާ ބޮސްކާލިސް ވެސްޓްމިނިސްޓަރ ކޮންޓްރެކްޓިން ކޮމްޕެނީއާ ގުޅިގެންނެވެ.

މޫސުމަށް އަންނަ ބަދަލުތަކާއި ރަށްގިރުމުން ސަލާމަތްކުރުމަށް ފުށިދިއްގަރުފަޅު ހިއްކުމަށް ހަމަޖެހިފައިވަނީ މޫދުގެ ލޮނުގަނޑުން ފެށިގެން 2.5 މީޓަރ އުސްމިނަށެވެ. މިއީ ހުޅުމާލެ އަށްވުރެ އިތުރު 0.5 މީޓަރ އުސްކޮށް ހިއްކޭ ރަށެކެވެ. މި ރަށުގައި އަންދާޒާ ކުރެވޭގޮތުން 240،000 އަށްވުރެ ގިނަ އާބާދީއެއް ގާއިމްކުރެވިގެންދާނެ ކަމަށް އާބަންކޯއިން ބުނެއެވެ.