މުވައްޒަފުންނަށް ފްލެޓެއް ނުބަހަން، ދައުރުވަނީ ސައްހަ ނޫން ލިސްޓެއް: އާބަންކޯ

މުވައްޒަފުންނަށް ފްލެޓް ނުބަހާ ކަމަށާއި ދައުރުވަނީ ސައްހަ ނޫން ލިސްޓެއް ކަމަށް އާބަންކޯއިން ބުނެފިއެވެ.

ހުޅުމާލޭގައި އަމިއްލަ ފަރާތްތަކުން އިމާރާތް ކުރަމުންދާ މިކްސްޑް ރެޒިޑެންޝަލް ޕްރޮޖެކްޓްތަކުން އާބަންކޯގެ މުވައްޒަފުންނަށް ޔުނިޓް ވިއްކަން ހުޅުވާލުމާ ގުޅޭގޮތުން ބުރާސްފަތި ދުވަހު ނެރިފައިވާ މެމޯއާ ގުޅޭގޮތުން އާބަންކޯއިން ބުނީ، މުވައްޒަފުންނަށް ވިއްކުމަށް ހުޅުވާލެވިފައިވާ ޔުނިޓްތަކަކީ ހުޅުމާލޭގައި އަމިއްލަ ފަރާތްތަކުން ތަރައްގީ ކުރަމުންދާ ހަތަރު މަޝްރޫއަކުން އެ ކޯޕަރޭޝަނަށް މަޝްރޫ ހިންގުމަށް ދެވިފައިވާ ބިމުގެ އަގުގެ ބަދަލުގައި އެއްބަސްވުމާ އެއްގޮތަށް ލިބިފައިވާ ޔުނިޓުތަކެއް ކަމަށެވެ.

މިދިޔަ އަހަރު ކުރިއަށް ގެންދެވުނު ސްޓާފް ހައުސިން ސްކީމްގެ ދަށުން 'އެންޑް ޔޫސަރ ފައިނޭންސް މޮޑެލް'ގެ ދަށުން އެ ޔުނިޓްތައް ވިއްކުމަށް ހުޅުވާލެވިފައިވާ ކަމަށާއި ނަމަވެސް ޔުނިޓްތަކަށް އެދި ކުރިމަތިލި ފަރާތްތަކަށް ފުރުސަތުދީ ނިމުނު އިރު ބައެއް ޔުނިޓްތައް ނުވިކި ހުރި ކަމަށް އާބަންކީއިން ބުންޏެވެ.

އެގޮތުން ބައެއް މުވައްޒަފުން ޔުނިޓްތައް ދޫކޮށްލާފައިވާތީ އާއި ބައެއް މުވައްޒަފުންގެ ޝަރުތު ހަމަ ނުވާތީ، 34 ޔުނިޓެއް ބާކީވި ކަމަށް އާބަންކޯއިން ބުންޏެވެ.

މިދިޔަ އަހަރު ހިންގުނު ސްޓާފް ހައުސިންގް ސްކީމަށް ހުޅުވާލިފަހުން އަހަރެއް ވުމާއެކު އެ ސްކީމުގެ ދަށުން ފުރުސަތު ނުލިބޭ މުވައްޒަފުން ތިބިކަން ފާހަގަވެ، މުވައްޒަފުންނަށް އާ ފުރުސަތެއް ދިނުމާއެކު އެ ކޯޕަރޭޝަނުން ހިންގަން ރާވާފައިވާ މަޝްރޫތަކަށާއި ވިޔަފާރި އުސޫލުން ދޫކޮށްފައިވާ ބިންތަކުގެ އަގު ހަމަކުރުމަށް ބޭނުންވާތީ، އެ 34 ޔުނިޓް ވިއްކަން އަލުން ހުޅުވާލީ ކަމަށް އެ ކޯޕަރޭޝަނުން ބުންޏެވެ.

އެ 34 ޔުނިޓް ގަތުމަށް ޝަރުތުތަމަވާ 800 އަށްވުރެ ގިނަ މުވައްޒަފުން ތިބި ކަމަށާއި ވަކި އުސޫލެއްގެ ދަށުން އެ ޔުނިޓްތައް ވިއްކުމަށް ކަނޑައަޅައި، ޕޯޓަލްއެއް މެދުވެރިކޮށް އެ މަސައްކަތް ކުރުމަށް ހަމަޖެހިފައި ވާކަމަށް އާބަންކޯއިން މައުލޫމާތު ދިނެވެ.

މިކަމާ ގުޅިގެން އާއްމުންނަށް އޮޅުން އަރާފަދަ ގޮތަކަށް ސޯޝަލް މީޑިޔާގައި ހަބަރު ފެތުރެމުންދާތީ އެކަމާ ގުޅިގެން އާބަންކޯއިން ނެރުނު ނޫސްބަޔާނެއްގައި ބުނީ އެ ކޯޕަރޭޝަނުން ނެރުނު މެމޯއާއި ޔުނިޓްތަކުގެ އަގާއެކު، އެ ކޯޕަރޭޝަނުގެ އިސްވެރިންގެ ލިސްޓެއް ކަމަށް ބުނެ ކާކުކަން ނޭނގޭ އެކައުުންޓަކުން އަމިއްލައަށް ތައްޔާރު ކޮށް ދައުރު ކުރަމުންދާ ލިސްޓުތަކަކީ ސައްހަ ނޫން ލިސްޓެއް ކަމަށެވެ.