ގަވާއިދާ އެއްގޮތަށް ރަޖިސްޓްރީކޮށްގެން ހިންގާ އެއްވެސް ނޫހެއް ސަރުކާރުން ބަންދެއް ނުކުރާނެ: ތަރުޖަމާނު
ގާނޫނާއި ގަވައިދުތަކުގެ ދަށުން ރާއްޖޭގައި ރަޖިސްޓްރީކޮށްގެން ހިންގާ އެއްވެސް ނޫސް/މަޖައްލާއެއް ސަރުކާރުން ބަންދެއްވެސް އަދި ބްލޮކެއްވެސް ނުކުރާނެ ކަމަށް، ސަރުކާރުގެ އިސް ތަރުޖަމާނު މުހައްމަދު ޝަހީބު ވިދާޅުވެއްޖެއެވެ.
ސަރުކާރަށް ފާޑުކިޔާ ދެ ނޫހެއް ބްލޮކް ކޮށްލާފައިވާ ކަމަށް ބުނެ، ފެތުރެމުންދާ ވާހަކަތަކާއި ގުޅިގެން ޝަހީބު ކުރެއްވި ޓްވީޓެއްގައި ވަނީ ނޫސްވެރިކަމުގެ މިނިވަންކަން އޭގެ އެންމެ ފުޅާމިނުގައި ދެމެހެއްޓުމަކީ މި ސަރުކާރުން ކަށަވަރުކުރާނެ ކަމެއް ކަމުގެ ޔަގީންކަން އަރުއްވާފައެވެ.
"ގާނޫނާއި ގަވައިދުތަކުގެ ދަށުން ރާއްޖޭގައި ރަޖިސްޓްރީކޮށްގެން ހިންގާ އެއްވެސް ނޫސް/މަޖައްލާއެއް ސަރުކާރުން ބަންދެއްވެސް އަދި ބްލޮކެއްވެސް ނުކުރާނެ."
މުހައްމަދު ޝަހީބު
ޝަހީބް މިފަދައިން ވިދާޅުވެފައި ވާއިރު، ރައީސުލްޖުމުހޫރިއްޔާ ޑރ މުހައްމަދު މުޢިއްޒު ހުވާ ކުރެއްވި ފަހުން އެމަނިކުފާނަށް ފާޑުކިޔައި އެކި ތުހުމަތުތައް އަމާޒުކޮށް ޚަބަރުތައް އާއްމު ކުރަމުންދާ "ދިޔަވަރު.ކޮމް" އަދި "ކުރުސީ.ކޮމް" މިހާރު ވަނީ ބްލޮކް ކޮށްލާފައެވެ.
އެކަމާއި ގުޅިގެން ސަރުކާރަށް ފާޑުކިޔުންތައް އަމާޒުވާއިރު، އެ ދެ ނޫހަކީވެސް، އޮންލައިން ނޫސް މަޖައްލާތައް ހިންގުމުގެ ގަވާއިދާއި ޚިލާފަށް، ރެޖިސްޓްރީވެސް ނުކޮށް ހިންގަމުންދާ ދެ ނޫސްކަން ފާހަގަކޮށްލަންޖެހެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
