ރައްކާތެރިކަން ކަށަވަރު ކުރުމަށް ހައްޖާޖީންގެ އަތުގައި ސްމާޓް ޓެގް ބޭނުން ކުރަނީ!

މޯލްޑިވްސް ޙައްޖު ކޯޕަރޭޝަން ލިމިޓެޑް މެދުވެރިކޮށް ހައްޖަށްދާ ހައްޖާޖީންގެ ރައްކާތެރިކަން އިތުރަށް ކަށަވަރު ކުރުމަށް، ހައްޖާޖީންގެ އަތުގައި ސްމާޓް ޓެގް ބާއްވަން ނިންމައި އެ ތަކެތި ގަންނަން އެ ކޯޕަރޭޝަނުން އިއުލާން ކޮށްފިއެވެ.

ހައްޖު ކޯޕަރޭޝަނުން ބުނީ، އެ ކޯޕަރޭޝަނުން މިހާރު ތައްޔާރު ވަމުންދަނީ، ހައްޖާޖީން ސައުދީ ޢަރަބިއްޔާގައި ތިބި ލޮކޭޝަން ނުވަތަ ތަން ވަގުތުން ބަލާލެވޭނެ ގޮތް މަގު ފަހި ކުރުމަށްޓަކައި ސްމާޓް ޓެގް ގެ ބޭނުން ކުރަން ތައްޔާރު ވަމުންދާ ކަމަށެވެ.

ސްމާޓް ޓެގް އަކީ އަތުގައި، ބޭގަށް ލާފައި ބޭއްވޭ ގޮތަށް ހައްޖާޖީންގެ އަތަށް ހަވާލުކުރެވޭ އެއްޗެއް. ހައްޖާޖީންގެ ސަލާމަތާއި ރައްކާތެރިކަން އެއީ އަޅުގަނޑުމެން އެންމެ ސަމާލުކަންދޭ ކަންތައް. މިގޮތަށް ސްމާޓް ޓެގް އޮތުމުން މާލޭގައި ތިބޭ އާއިލާގެ ބޭފުޅުންނަށްވެސް ހިތްހަމަޖެހުން އޮންނާނެ، ހައްޖާޖީން ގެއްލިގެން ހޯދަން ޖެހިއްޖެ ހާލަތެއްގައި، ސްމާޓް ޓެގްގެ އެހީގައި ހައްޖާޖީންގެ ލޮކޭޝަން އަޅުގަނޑުމެންނަށް ބަލާލެވޭނެ. އަދި އެހީތެރިކަން ބޭނުންވެއްޖެ ހާލަތެއްގައި އެހީތެރިކަން ދޭން ފަސޭހަވެގެންދާނެ.

ހައްޖު ކޯޕަރޭޝަންގެ އެމްޑީ މުޙައްމަދު ޝަކީލު

އެގޮތުން، އެކަމަށްޓަކައި ބޭނުންވާ ތަކެތި ފޯރުކޮށްދޭނެ ފަރާތެއް ހޯދުމަށް ހައްޖު ކޯޕަރޭޝަނުން ކޮށްފައިވާ އިއުލާނެއްގައިވާގޮތުން، އެ ކޯޕަރޭޝަނަށް ބޭނުންވަނީ، ސްމާރޓް ޓެގް 2 ، ގެ 800 ޓެގާއި ސެމްސަންގް ގެލެކްސީ އެސް 23 އަލްޓްރާ 7 މޮބައިލް ފޯނު އަދި އެއާ ގުޅޭ ބައެއް ސާމާނެވެ.

ހައްޖު ކޯޕަރޭޝަނުން ބުނީ، ބީލަން ކަރުދާސް ހުޅުވުން އޮންނާނީ 03 ޖަނަވަރީ 2024 ވާ ބުދަ ދުވަހުގެ 13:00 ގައި މޯލްޑިވްސް ޙައްޖު ކޯޕަރޭޝަން ލިމިޓެޑް (މ.ފުރަންކަރަ، 03 ވަނަ ފަންގިފިލާ، ބޮޑުތަކުރުފާނު މަގު) ގެ އޮފީހުގައި ބީލަމުގައި ބައިވެރިވެލައްވާ ބޭފުޅުންގެ ޙާޟިރުގައި ކަމަށެވެ.

އަދި އެކަމާއި ގުޅޭގޮތުން އިތުރު މަޢުލޫމާތު ސާފުކުރަން ބޭނުންނަމަ، 27 ޑިސެމްބަރު 2023 ވާ ބުދަ ދުވަހުގެ އެއް ގަޑި ސުންމިނެޓު (13:00) ގެ ކުރިން [email protected]  އަށް މެއިލް ކުރުމަށްވެސް އެދިފައިވެއެވެ.