ގިނަ ދައުލަތް ހިމެނޭ ޤައުމަކަށް ބަދަލުކުރުމުން ޤައުމު ރޫޅިދާނެ; ޝަރީފް

ގިނަ ދައުލަތް ހިމެނޭ ޤައުމަކަށް ބަދަލުކުރުމުން ޤައުމު ރޫޅިދާނެ ކަމަށް މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވެއްޖެއެވެ.

ޝަރީފް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

ޝަރީފް ވިދާޅުވީ ރާއްޖެ ފަދަ މީސްކޮޅު މަދު ރިސޯސަސް އެކި ސަރަހައްދުގައި ތަފާތު ތަރައްޤީ ވަމުން އަންނަ ކުޑަ ޤައުމެެއް އެތައް ދައުލަތެއް އެކުލެވޭ ޤައުމަކަށް ބަދަލުކުރަން އުޅެގެންފިނަމަ ސިޔާސީ އަރާރުން ބޮޑުވެ ޤައުމު ރޫޅިދާނެ ކަމަށެވެ.

މީގެ އިތުރުން ޝަރީފް ވިދާޅުވީ ދުނިޔޭގަ ހުރީ ޚާއްސަ ހާލަތު ހުރި ވަރަށް މަދު ފެޑަރަލް ނިޒާމް އޮންނަ ޤައުމުތަކެއް ކަމަށެވެ. އަދި ރާއްޖޭގައި އެފަދަ ހާކަތެއް ނެތް ކަމަށް  ޝަރީފް ވިދާޅުވިއެވެ.

"ޤައުމު އެކުވެރިކޮށް ބަދަހި ކުރުމަށް މަސައްކަތް ކުރުމުގެ ބަދަލުގައި ޤައުމު ރޫޅާލައި ކުދި ކުދި ކުރަން ބައެއް ސިޔާސީ މީހުން މަސައްކަތަ ކުރުމަކީ ވަރަށް ނުރައްކާތެރި ކަމެއް" ޝަރީފް ވިދާޅުވިއެވެ.

ޝަރީފް މިހެން ވިދާޅުވެފައި މިވަނީ ކުރީގެ ރައީސް މުޙައްމަދު ނަޝީދު ދިވެހިރާއްޖޭގައި މިހާރު ވެރިކަން ކުރަމުން އަންނަ ރިޔާސީ ނިޒާމް ބަދަލު ކުރަން ގިނަ ދިވެހިން ބޭނުންވާ ކަމަށާ، ރާއްޖޭގައި އޮންނާން ފެންނަ ވެރިކަމުގެ ނިޒާމަކާ ގުޅޭގޮތުން، ރައްޔިތުންގެ ހިޔާލު ހޯދުމުގެ ވޯޓެއް ނެގުމަކީ، ވާޖިބެއް ކަމުގައި ދެކެވަޑައިގަންނަވާ ކަމަށް ވިދާޅުވެފައި ވަނިކޮށެވެ.

ރައީސް ނަޝީދު ހއ.ދިއްދޫގައި ބޭއްވި ތިލައުތުރު އެވޯޑު ދިނުމުގެ ހަފްލާގައި ވާހަކަފުޅު ދައްކަވަމުން ވިދާޅުވީ ރާއްޖޭގެ ޑިމޮކްރެޓިކް ހަޔާތުގެ އެންމެ މުހިންމު އެއް ވާހަކައަކީ ލާމަރުކަޒީ ވާހަކަ ކަމަށެވެ.

އަދި ފެޑަރަލް ދިވެހިރާއްޖެއަކަށް ދިވެހިރާއްޖެ އަލިވިލެން ވެއްޖެކަން އެމަނިކުފާނުގެ ހިތުގެ އަޑިން ގަބޫލު ކުރައްވާ ކަން ފާހަގަ ކުރައްވައި ނަޝީދު ވިދާޅުވީ އެމަނިކުފާނު ވެރިކަމުގައި ހުންނެވި އިރުވެސް މުޅި ރާއްޖެ ރައީސުލްޖުމްހޫރިއްޔާ އަތުގައި އޮތުމުން އެ ލިބޭ ބާރު ދޫކޮށްލަން އުނދަގޫވެވަޑައިގެންނެވިކަމަށެވެ.

މިފަދައެތައް ސަބަބުތަކަށްޓަކައި ދިވެހި ރައްޔިތުން މިއަދު ފެޑެރަލް ނިޒާމަކަށް ބަދަލުވާާންޖެހޭ ކަމަށާ އެގޮތަށް ނުވިސްނައިފިނަމަ، ވަރަށް ހިތާމަވެރި މަންޒަރެއް ފެނިގެން ހިނގައިދާނެ ކަމަށް ނަޝީދު ވިދާޅުވެފައިވެއެވެ.