އިންޑިޔާގެ މަނިޕޫރްގައި ފުލުހުން އަންހެނަކު ރޭޕްކޮށްލަން ދޫކޮށްލި މައްސަލައެއް ފެންމަތިވެއްޖެ

އިންޑިޔާ ފުލުހުން އިންޑިޔާގެ މަނިޕޫރްގެ އަންހެނަކު ރޭޕް ކުރަން ދޫކޮށްލައިފި ކަމަށް އެއަންހެންމީހާ ބުނެފިއެވެ.

އިންޑިޔާގެ މަނިޕޫރްގައި ހިނގި މިހާދިސާގައި ޝާމިލްވި އަންހެނަކު އިންޑިޔާގެ މީޑިއާ އަކަށް މައުލޫމާތު ދީފައިވާ ގޮތުގައި ފުލުހުން އެމީހުން ގެންދިޔައީ އެމީހުންގެ ގޭ ކައިރީގައި ތިއްބައެވެ.

މަނިޕޫރްގައި ދިރިއުޅޭ ކުކީ ޒުމީ ސަރަހައްދަށް ނިސްބަތްވާ މި ދެއަންހެނުން އެމީހުންގެ ގޭކައިރިން ހިފަހައްޓައިގެން ގެންގޮސް ދޫކޮށްލީ އެމީހުންގެ އަވަށާއި ތަންކޮޅެއް ދުރަށް ކަމަށާއި، ފުލުހުން ތިބީ އެމީހުންގެ ގެދޮރަށް ގެއްލުން ދެމުންދިޔަ ހައްދުފަހަނައެޅި ހިންދޫންނާއި އެކުގައި ކަމަށެވެ. އަވަށާއި ތަންކޮޅެއް ދުރަށް ގެންގޮސް ފުލުހުން އެދެއަންހެނުން ހިންދޫންގެ އަތްމައްޗަށް ދޫކޮށްލި ކަމަށް އެއަންހެނުން ބުނެފައިވެއެވެ.

މި ހާދިސާގައި ހިންދޫންގެ ޝިކާރައަކަށްވި ދެމީހުންގެ ތެރެއިން އެކަކީ 20 އަހަރުގެ މީހެކެވެ. އަނެއް މީހާއަކީ 40 އަހަރުގެ މީހެކެވެ.

ހައްދުފަހަނައެޅި ހިންދޫންއިން އެދެމީހުން ގެންގޮސް 20 އަހަރުގެ އަންހެން މީހާ ރޭޕް ކޮށްފައިވާ ކަމަށް އޭނާ ވަނީ ބުނެފައެވެ. އަދި ހިންދޫން ވަނީ އެދެމީހުންގެ ހެދުން ބާލުވައިގެން މަގުމަތީގައި ހިންގައިފައެވެ. ހިންދޫން އެދެމީހުން މަގުމަތީގައި ހެދުންބާލުވައިގެން ހިންގި ވީޑިއޯ އެއް ޢާންމުވެފައިވެއެވެ.

މިއީ މެއި މަހުގެ 18 ވަނަ ދުވަހު ހިނގި ހާދިސާއެކެވެ.

އިންޑިޔާގެ ހައްދުފަހަނައެޅި ހިންދޫން މަނިޕޫރްގައި ދިރިއުޅޭ ކްރިސްޓިއަން އާއިލާތަކުގެ މީހުންނަށާއި އެމީހުންގެ ގޯތި ގެދޮރަށް ގެއްލުންދީ އަނިޔާދޭތާ ކިތަންމެ ދުވަހެއް މިހާރުވަނީ ފާއިތުވެފައެވެ.

މިއަހަރުގެ މެއިމަހުގެ ތިންވަނަ ދުވަހުން ފެށިގެން ހައްދުފަހަނައެޅި ހިންދޫން ދަނީ މަނިޕޫރްގައި ދިރިއުޅޭ  ކްރިސްޓިއަނުންނަށް ދަނީ މިއަނިޔާތައް ދެމުންނެވެ. މިކަންތައްތަކަށް މިހާދުވަސް ވެފައިވާއިރު އިންޑިޔާގެ ބޮޑުވަޒީރު ނަރެންދްރަ މޯދީ މިކަން ކުށްވެރިކޮށް އެއްޗެއް ވިދާޅުވެފައިވަނީ މިދިޔަ ހަފްތާގެ ބުރާސްފަތި ދުވަހުއެވެ.

މޯދީ މިކަމާއި ގުޅިގެން ވިދާޅުވެފައިވަނީ މަނިޕޫރްގެ އަންހެނުންނަށް ކުރަމުންދާ އަނިޔާތަކަކީ ހަނދާނުން ފޮހެ ނުލެވޭނެ އަދި މަޢާފުނުކުރެވޭނެ ކަންތައްތަކެއް ކަމަށެވެ. އަދި މިކަމުގައި ޝާމިލްވާ އެއްވެސް ކުށްވެރިޔަކު ދޫކޮށްނުލެވޭނެ ކަމަށް ވެސް ވިދާޅުވެފައިވެއެވެ.

މަނިޕޫރްގައި ހިންގި މިޢަމަލުތަކަސް 1800 ގަޑިއިރަށްވުރެ ގިނަ އިރު ވީފަހުން މޯދީގެ 30 ސިކުންތުގެ ބަސްކޮޅެއް އައުމުން އިންޑިޔާގެ އިދިކޮޅު ފަރާތްތަކުން ވަނީ މޯދީ އަށް ފާޑުވިދާޅުވެފައެވެ.

އިދިކޮޅު ފަރާތްތަކުން ވިދާޅުވެފައިވަނީ މޯދީ މަނިޕޫރްގެ ޙާލަތާއި މެދު ވާހަކަ މިދެއްކެވީ މޯދީ އާއި ދެކޮޅަށް އިންޑިޔާގެ ގިނަ އިދިކޮޅު ލީޑަރުންތަކެއް އެއްބަސްކިޔައި ކޯލިޝަން ހެދުމުން އެކަމުން ރައްޔިތުންގެ ސަމާލުކަން ދޫކުރުވަން ދެބޯގެރި ދުއްވުމަށް ކަމަށެވެ.

އިންޑިޔާގެ ބޮޑު ވަޒީރު ނަރެންދުރަ މޯދީ މިކަމާއިގުޅިގެން ބަހެއް ބުނިތާ މާގިނަ އިރެއް ނުވެ މިކަމާއި ގުޅިގެން 4 މީހަކު ވަނީ ހައްޔަރުކޮށްފައެވެ. އަދި އިތުރު 30 މީހަކު ހޯދަމުންދާކަމަށް މިހާރު އިންޑިޔާ ފުލުހުން ވަނީ ބުނެފައެވެ.

މެއި މަހުން ފެށިގެން އިންޑިޔާގެ ހައްދުފަހަނަ އެޅި ހިންދޫއިން މަނިޕޫރްގައި ދިރިއުޅެމުން އަންނަ ކުކީ-ޒޯ ކޮމިޔުނިޓީ ގެ މީހުންނާއި ދެކޮޅަށް ހިންގަމުން އަންނަ އިންސާނިއްޔަތާއި ޚިލާފު ޢަމަލު ތަކުގެ ސަބަބުން މިހާތަނަށް އެކޮމިޔުނިޓީގެ 130 މީހަކު މަރުވެފައި ވާއިރު، 50،000 މީހުން ވަނީ އަވަށްދޫކޮށް ފިލައިފައެވެ.