ވަރިވާން ހުށަހެޅި މީހަކަށް ގުޅައި މެސެޖުކުރި އިސްމެޖިސްޓްރޭޓްގެ ސަސްޕެންޝަން އިތުރުކޮށްފި

ހދ. ކުޅުދުއްފުށީގެ ޖުޑީޝަލް ދާއިރާގެ އިސްމެޖިސްޓްރޭޓް ޢަލީ އާދަމް އެކޯޓަށް ވަރިވުމަށް ހުށަހެޅި މީހަކަށް ގުޅައި މެސެޖުކޮށް ހެދުމުން ޖުޑީޝަލް ސަރވިސް ކޮމިޝަން (ޖޭއެސްސީ) އިން ކުރި ސަސްޕެންޝަންގެ މުއްދަތު އިތުރުކުރުމަށް ނިންމައިފިއެވެ.

މިފަދަ މައްސަލައެއްގައި އަލީ އާދަމް ސަސްޕެންޑް ކުރި ކަމަށް ޖޭއެސްސީ އިން އިއުލާން ކޮށް އެންމެ ފުރަތަމަ ބަޔާނެއް ނެރެފައިވަނީ މެއި މަހުގެ 25 ވަނަ ދުވަހުއެވެ.

އެގޮތުން އެ ބަޔާނުގައި ބުނެފައިވަނީ ކުޅުދުއްފުށީ މެޖިސްޓްރޭޓް ކޯޓަށް ވަރިވުމަށް އެދި ހުށަހެޅި މައްސަލައެއްގައި ހިމެނޭ ޚަސްމަކަށް ގުޅައި މެސެޖުކޮށް ހެދިކަމަށް އަލީ އާދަމް އަށް ތުހުމަތުކުރާ ކަމަށެވެ.

އަދި މިކަމާއި ގުޅޭގޮތުން ޖޭއެސްސީއިން ތަޙްޤީޤަށް ހޯދިފައިވާ މަޢުލޫމާތަށް ރިޢާޔަތްކޮށް، ޝަރުޢީ ދާއިރާގެ އިތުބާރު ނެގެހެއްޓުމުގެ އަސާސްގެ މައްޗަށް ބިނާކޮށް، ކޮމިޝަނުން ވަކިގޮތެއް ކަނޑައަޅަންދެން، ޢަލީ އާދަމް ވަޒީފާއަށް ނުނިކުމެ މަޑުކުރުމަށް އެންގުމަށް މޭ 25 ވަނަ ދުވަހުގެ ރޭ ބޭއްވުނު ކޮމިޝަންގެ ކުއްލި ޖަލްސާގައި ނިންމާފައިވާ ކަމަށް ޖޭއެސްސީއިން ވަނީ ބުނެފައެވެ.

މިއާއިއެކު ސަސްޕެންޑް ކުރި މުއްދަތު އިތުރުކުރި ކަމަށް އިއުލާން ކޮށް މިއަދު ނެރުން ބަޔާނުގައި ބުނެފައިވަނީ ކޯޓަށް ވަރިވުމަށް އެދި ހުށަހެޅި މައްސަލައެއްގައި ހިމެނޭ ޚަސްމަކަށް ގުޅައި މެސެޖުކޮށް ހެދިކަމަށް ތުހުމަތުކޮށް މިދިޔަ މަހުގެ 21 ވަނަ ދުވަހު ފަނޑިޔާރުގެ ބަޔާނެއް ނަގާފައިވާ ކަމަށެވެ.

އަދި މިއަށް ރިޢާޔަތްކުރުމަށްފަހު، މި މައްސަލައިގެ ބާވަތަށާއި، ތަޙުޤީޤަށް ހޯދިފައިވާ މަޢުލޫމާތަށް ބަލައި، ޝަރުޢީ ދާއިރާގެ އިތުބާރު ނެގެހެއްޓުމުގެ އަސާސްގެ މައްޗަށް ބިނާކޮށް، މާދަމާއިން ފެށިގެން ކޮމިޝަނުން ވަކިގޮތެއް ކަނޑައަޅަންދެން، ޢަލީ އާދަމް ވަޒީފާއަށް ނުނިކުމެ މަޑުކުރުމަށް، އެންގުމަށް ޖުލައި 12 ވަނަ ދުވަހު ބޭއްވުނު ކޮމިޝަންގެ 46 ވަނަ ޖަލްސާގައި ޖޭއެސްސީއިން ނިންމާފައިވާ ކަމަށެވެ.

މީގެ އިތުރުން ޖޭއެސްސީއިން ވަނީ ޢަލީ އާދަމް މިހާރުވެސް ހުންނެވީ އެ ކޮމިޝަނުން ބަލަމުންދާ މިބާވަތުގެ އެހެން މައްސަލައަކާ ގުޅިގެން މޭ 25 ދުވަހުން ފެށިގެން ވަޒީފާއަށް ނުނިކުމެ މަޑުކުރުމަށް އަންގާ ސަސްޕެންޑްކޮށްފައި ކަމަށް ފާހަގަކޮށްފައެވެ.

މީގެ ކުރިން ޖޭއެސްސީއިން ވަނީ އަލީ އާދަމްގެ ސުލޫކީ މައްސަލައެއްވެސް ބަލާފައެވެ.

އެގޮތުން ޖެނުއަރީ 31 ގައި ޖޭއެސްސީއިން ނެރުން ބަޔާނެއްގައި ބުނެފައިވަނީ ކުޅުދުއްފުށީ މެޖިސްޓްރޭޓް ކޯޓަށް ހުށަހެޅުނު ރައްކާތެރިކަމުގެ އަމުރު ނެރެދިނުމާގުޅޭ މައްސަލައެއްގައި، ގެވެށި އަނިޔާ ހުއްޓުވުމުގެ ޤާނޫނާ ޚިލާފަށް، ޢަލީ އާދަމް ޢަމަލުކޮށްފައިވާ ތުހުމަތުކުރާކަމަށެވެ.

ސުލޫކީ މައްސަލައެއްގެ ގޮތުގައި މި މައްސަލަ ބެލުމަށް ޖަނަވަރީ 18 ގައި ބޭއްވި އެ ކޮމިޝަންގެ 5 ވަނަ ޖަލްސާގައި ނިންމާ މި މައްސަލައިގެ ތަޙްޤީޤު ކޮމިޓީއެއް ވެސް އެކުލަވާލިއެވެ.