މިނިސްޓަރު އާދަމް ޝަރީފަށް ފައްޔާޒްގެ ނުރުހުން

މި ސަރުކަާރުގެ ސިޓީސް، ލޯކަލް ގަވަމެންޓް އަދި ޕަބްލިކް ވޯކްސް މިނިސްޓަރު އާދަމް ޝަރީފަށް ރުހުންދޭންޖެހޭޭ އެއްވެސް ސަބަބެއް ނުފެންނަ ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއީލް ވިދާޅުވެއްޖެއެވެ.

ފައްޔާޒް މިހެން ވިދާޅުވީ އެކްސްގައި ކުރެއްވި ޕޯސްޓެއްގައެވެ.

ފައްޔާޒް މިފަދައިން ވިދާޅުވެފައިމިވަނީ ރަޖިސްޓްރީ ނުކޮށް ހިންގަމުންދިޔަ ދެ ވެބްސައިޓަކަށް ނުވަދޭވޭހެން ބަންދުކުރުމާ ގުޅިގެންނެވެ.

އެ ދެވެބްސައިޓް ބަންދުކުރުމާއި ގުޅިގެން އިދިކޮޅު ފަރާތްތަކުން ދަނީ ސޯޝަލް މީޑީއާގައި ވަރަށް ބޮޑަށް ސަރުކާރަށް ފާޑުކިޔަމުންނެވެ.

އިދިކޮޅު އެމްޑީޕީ އިން ވަނީ މިކަމާއި ގުޅޭ ގޮތުން ނޫސެބަޔާނެއް ވެސް ނެރެފައެވެ.

ފައްޔާޒު ކުރައްވައިފައިވާ ޕޯސްޓުގައި ވިދާޅުވެފައިވަނީ މިނިސްޓަރު އާދަމް ޝަރީފް ޢުމަރު ރައީސް ޔާމީން ސަރުކާރުގެ ޑިފެންސް މިނިސްޓަރަކަށް ހުންނެވިއިރު ރައްޔިތުންގެ މަޖިލީހުގެ ތާރީޚުގައި ވެސް ތަޅުމަށް ސިފައިން ވައްދާ މެންބަރުންނަށް އަނިޔާކުރެއްވި ކަމަށެވެ.

“މިހާރު ކޭމް މެދުވެރިކޮށް ހިޔާލުފާޅުކުރުމުގެ މިނިވަންކަން ނައްތާލުމަށް މަސައްކަތް ފެއްޓެވީ ލާމަރުކަޒީ ނިޒާމްވެސް ފުށިދިއްގަރަށް، ރުހުން ދޭންޖެހޭ އެއްވެސް ސަބަބެއް ނުފެނޭ” ފައްޔާޒް ވިދާޅުވެފައިވެއެވެ.

މިކަމާއި ގުޅިގެން ސަރުކާރުގެ ފަރާތުން ރައީސް އޮފީހުގެ އިސް ތަރުޖަމާނު ވިދާޅުވެފައިވަނީ ޤާނޫނާއި ޤަވާއިދުތަކުގެ ދަށުން ރާއްޖޭގައި ރަޖިސްޓްރީކޮށްގެން ހިންގާ އެއްވެސް ނޫހެއް އަދި މަޖައްލާއެއް ސަރުކާރުން ބަންދެއްވެސް އަދި ބްލޮކެއްވެސް ނުކުރާނެ ކަމަށެވެ.

އަދި ނޫސްވެރިކަމުގެ މިނިވަންކަން އޭގެ އެންމެ ފުޅާމިނުގައި ދެމެހެއްޓުން މި ސަރުކާރުން ކަށަވަރުކުރާނެ ކަމުގެ ޔަޤީންކަން ސަރުކާރުން ވަނީ ދީފައެވެ.