ކޯލިޝަނާއި އެކު ދެމި މިތިބީ އަމިއްލަ ކުރިއެރުން ތަކެއް ދޫކޮށްފައި: ފާރިސް

ކޯލިޝަނާއި އެކު ދެމި މިތިބީ އަމިއްލަ ކުރިއެރުން ތަކެއް  ދޫކޮށްފައި ކަމަށް ފާރިސް މައުމޫން ވިދާޅުވެއްޖެއެވެ.

ފާރިސް މިހެން ވިދާޅުވީ އެމްއާރްއެމް އުވާލުމާއި ގުޅިގެން ބޭއްވި ނޫސްވެރިންގެ ބައްދަލުވުމެއްގައެވެ.

ފާރިސް ވިދާޅުވީ ދައުރުގެ މެދުތެރެއިން ކޯލިޝަން ރޫޅި ސަރުކާރު ރޫޅިގެން ދާން ބޭނުންފުޅު ނުވާކަމަށާއި ރިޔާސީ ނިޒާމުގެ ތެރެއިން ރައީސުލް ޖުމްހޫރިއްޔާ އަށް 5 އަހަރުގެ ދައުރެއް ފުރިހަމަ ކުރެވެވެން ވާނެ ކަމަށް ޤަބޫލު ކުރައްވާ ކަމަށެވެ.

ފާރިސް ވިދާޅުވީ ތާއީދު ނުކުރެވޭ ކަންކަމާއި މެދު އަޑު ނުއުފުލުމަކީ ޕާޓީގެ ތާއީދު ކުޑަވި ސަބަބެއް ކަމަށް ވެދާނެ ކަމަށެވެ. ނަމަވެސް ކޯލިޝަން ސަރުކާރެއްގެ ތެރޭގައި އޮތިއްޔާ ކަންތައްތައް ހިއްސާ ކުރާނީ ސަރުކާރުގެ އެތެރޭން ކަމަށާއި، ސަރުކާރުގެ ކޮންމެ ސިޔާސަތަކާއި ދެމެދު ހިތްހަމަ ނުޖެހޭއިރަށް އެވާހަކަ ފާޅުގައި ދެއްކުމުން ކުޑަ މުއްދަތެއްގެ ތާއިދެއް ލިބިދާނެ ކަމަށް ފާރިސް ވިދާޅުވިއެވެ.

"އަބަދުވެސް މިއޮންނަނީ ކޮންމެވެސް ކަމެއް ކުށްވެރި ކޮށްގެން ތާއީދު ހޯދުން، އެހެންނަމަވެސް އެއީ އެންމެ ރަނގަޅު ގޮތް ކަމަކަށް އަޅުގަނޑު މެންނަކަށް ނުފެނުނު، އެއީ އަޅުގަނޑުމެންގެ އެބެއް އެއްބަސްވުމެއް، އެއީ ސަރުކާރަށް ދަތިނުވާނެ ގޮތަކަށް އަޅުގަނޑުމެން ޢަމަލު ކުރުން، އެހެންނަމަވެސް ރިޔާސީ އިންތިޚާބެއް ގާތްވަމުން ދާއިރު އަޅުގަނޑު މެން އެބަޖެހޭ ތަންކޮޅެއް ފާޅުކަން ބޮޑު ގޮތެއްގައި އުޅެން، އެއީ އަޅުގަނޑުމެންގެވެސް ޒިންމާއެއް އެބަ އޮތް، ރައްޔިތުންނަށް އަޅުގަނޑުމެން ދެކޭގޮތް ހާމަކޮށްދިނުން، އަދި އަޅުގަނޑުމެން ކަމްބޮޑުވި ކަންކަން ސަރުކާރަށް ހުށައަޅައިގެން ހުރީ ގިނަ ކަންކަމުގެ މައުލޫމާތު ނުލިބޭ، ނޫނީ ގިނަ ކަންކަން ހުރީ އިސްލާހު ނުވެ"

ފާރިސް ވިދާޅުވިއެވެ.

އިލެކްޝަންސް ކޮމިޝަނުން އެމްއާރްއެމް އުވާލައިފައިވަނީ މިއަދުއެވެ. އެމްއާރްއެމް އަކީ މިހާރު މިހިނގާ ސަރުކާރު އިންތިޚާބު ކުރެވުނު ކޯލިޝަންގެ ބައިވެރިއެކެވެ. އަދި މިހާތަނަށްވެސް  އޮތީ އެގޮތުގައެވެ. ކުރިއަށް އޮތް އިންތިޚާބުގައި އެމްއާރްއެމް އިން ފާރިސް ކެނޑިޑޭޓެއްގެ ގޮތުގައި ނެރުމަށް ކެމްޕޭނު ދަނީ ކުރަމުންނެވެ.