"ދި ޑިމޮކްރެޓްސް" ވާނީ ރާއްޖޭގެ އެންމެ ބޮޑު ސިޔާސީ ޕާޓީއަށް: އީވާ
"ދި ޑިމޮކްރެޓްސް" ވާނީ ދިވެހިރާއްޖޭގެ އެންމެ ބޮޑު ސިޔާސީ ޕާޓީއަށް ކަމަށް ރައްޔިތުންގެ މަޖިލީހުގެ ނައިބުރައީސް އަދި ގަލޮޅު އުތުރު ދާއިރާގެ މެމްބަރުު އީވާ އަބްދުﷲ ވިދާޅުވެއްޖެއެވެ.
ދި ޑިމޮކްރެޓްސް އުފައްދަން އީސީން ހުއްދަ ދިނުމަށްޓަކައި މިއަދު އީސީގައި ބޭއްވި ބާއްދަލުވުމުގައި ވާހަކަ ދައްކަވަމުން އީވާ ވިދާޅުވީ، ޕާޓީގެ ނަމާ ދޭތެރޭގައި ފުރުސަތު ހަނި ނުކޮށް ހުއްދަ ދިން ފަދައިން ޕާޓީގެ ކުލައާ ދޭތެރޭގައިވެސް ލުއިގޮތެއް ހައްދަވައި ދެއްވާނެ ކަމަށް އުންމީދު ކުރައްވާ ކަމަށެވެ.
"އަޅުގަނޑުމެން އިރާދަކުއްރެއްވިއްޔާ އަޅުގަނޑުމެންގެ ޖަލްސާ ބާއްވާ، ކުލަޔަކާ ލޯގޯއަކާ ދިދަޔާ އެއްޗެހި ފާސް ކުރާނަން. ދެން ތިބޭފުޅުންވެސް ރަށުތެރޭގަ އުޅުއްވާ ބޭފުޅުން ވީމަ އެނގިވަޑައިގަންނަވާނެ އަޅުގަނޑުމެންގެ ކުލައެއް އެބަ ގާތްގަނޑަކަށް ހަމަ ނެޗުރަލީ އިވޯލްވެއްޖެ" އީވާ ވިދާޅުވިއެވެ.
އީވާ ވިދާޅުވީ އެހެން ޕާޓީއެއްގެ ކުލަޔަކަށް ނުވޭތޯ ވީހާވެސް ބޮޑަކަށް މަސައްކަތް ކުރާނެ ކަމަށާއި ނަމަވެސް ކުލައިގެ ޝޭޑްސް އީސީން އަށް ޖާގަ ދެއްވާނެ ކަމަށް ދެކިލައްވާ ކަމަށެވެ.
އެއް ޝޭޑެއް ނަމަވެސް ސީދާ އެހެން ޕާޓީއެއްގެ ކުލަޔަށް ނުވާނަމަ އެކަމަށް ފުރުސަތު ދެއްވުން އެދޭކަމަށް އީވާ ވިދާޅުވިއެވެ.
"މި ސިޔާސީ ޕާޓީ ވާނީ ދެން ދިވެހިރާއްޖޭގެ އެންމެ ބޮޑު ސިޔާސީ ޕާޓީއަށް. ދެން ބައެއް އެހެން ކުދިކުދި ޕާޓީއަށް އަދި ފަނޑުވަމުންވެސް ދާނެ. ޝޭޑެއް ކަނޑައަޅާއިރު ބަލާނަން އެހެން ޕާޓީއެއްގެ ސީދާ ޝޭޑަށް ނުވޭތޯ. ނަމަވެސް ގާތްކޮށްވެސް ދާނެ" އީވާ ވިދާޅުވިއެވެ.
"ދި ޑިމޮކްރެޓްސް" އުފެއްދުމުގެ ހުއްދަ ދެމުން އީސީން ބުނެފައި ވަނީ، ޕާޓީއަށް 3000 މެމްބަރުން ހަމަކުރުމަށް ތިންމަސް ދުވަހުގެ މުއްދަތެއް ލިބިގެންދާނެ ކަމަށެވެ.
އެއާއެކު މިހާރު އެ ޕާޓީން ދަނީ މެމްބަރުން އިތުރު ކުރުމުގެ މަސައްކަތް ކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
