ވަރިވާން އެދުނު އަންހެންމީހާއަށް ގުޅައި މެސެޖްކުރި އިސްމެޖިސްޓްރޭޓް މަގާމުން ވަކިކުރުމަށް ނިންމައިފި!

ހދ. ކުޅުދުއްފުށީގެ ޖުޑީޝަލް ދާއިރާގެ އިސްމެޖިސްޓްރޭޓް ޢަލީ އާދަމް އެކޯޓަށް ވަރިވުމަށް ހުށަހެޅި މީހަކަށް ގުޅައި މެސެޖުކޮށް ނާޖާއިޒު ފައިދާ ނަގަން މަސައްކަތްކުރުމުން ޖުޑީޝަލް ސަރވިސް ކޮމިޝަން (ޖޭއެސްސީ) އިން އޭނާ ފަނޑިޔާރު ކަމުން ވަކިކުރުމަށް ނިންމައިފިއެެވެ.

މިކަމާއި ގުޅިގެން ޖޭއެސްސީއިން ނެރުން ނޫސް ބަޔާނެއްގައި ބުނެފައިވަނީ ޢަލީ އާދަމްއާއި ގުޅޭގޮތުން ތަޙުޤީޤު ކުރި މައްސަލައިގައި، އެ ކޯޓަށް ވަރިވުމަށް އެދި ހުށަހެޅި މައްސަލަ އެކޯޓުގައި ހިނގަމުންދަނިކޮށް، އެ ޤަޟިއްޔާ ބަލަމުންދިޔަ އިސްމެޖިސްޓްރޭޓް ޢަލީ އާދަމް، ދަޢުވާގައި ހިމެނޭ ޚަސްމަކަށް ގުޅައި މެސެޖުކޮށްފައިިވާ ކަމަށެވެ.

އަދި ހުށަހަޅާފައިވާ މައްސަލައާ ގުޅޭގޮތުން ޝަރީޢަތުގެ ބޭރުން އެކި ވާހަކަތައް ދައްކައި، ރަޙްމަތްތެރިކަން ބާއްވަން ހުށަހަޅައި، ދެމަފިރިކަމުގެ ގުޅުމުގެ ޒާތީ މައުލޫމާތު އަހައި، މި ނޫން ވެސް ޒާތީ އެކި މެސެޖުތައްކޮށް، ކުރާ މެސެޖުތައް ޑިލީޓްކޮށްފައި ބެހެއްޓުމަށް އެދި ޢަލީ އާދަމް މުވާސަލާތު ކޮށްފައިވާ ކަމަށް ޖޭއެސްސީއިން ވަނީ ބުނެފައެވެ.

މިކަން ތަޙުޤީޤަށް ލިބިފައިވާ ސްކްރީންޝޮޓްތަކުންނާއި، ބަޔާންތަކުން އަދި ޢަލީ އާދަމްގެ އިޢުތިރާފުން ސާބިތު ވާ ކަމަށް ޖޭއެސްސީއިން ވަނީ ފާހަގަކޮށްފައެވެ.

މިއާއިއެކު އޭނާ ކޮށްފައިވާ މެސެޖުތައް ހުރި ގޮތަށް ބަލާއިރު، ޢަލީ އާދަމް މަސައްކަތްކޮށްފައި ވަނީ ނުނިޔަތެއްގައި ނުރަނގަޅު މަޤުސަދެއް އޮވެގެން، އެ ޚަސްމު އެ ވަގުތު ހުރި ނާޒުކު ޙާލަތުގެ ނާޖާއިޒު ފައިދާ ނެގުމުގެ ގޮތުންކަން ސާބިތުވާ ކަމަށްވެސް ޖޭއެސްސީއިން ވަނީ ބުނެފައެވެ.

އެހެންކަމުން އިސްމެޖިސްޓްރޭޓް ޢަލީ އާދަމްގެ މި ޢަމަލު ތަކަކީ ދިވެހިރާއްޖޭގެ ފަނޑިޔާރުންގެ ޤާނޫނާއި، ފަނޑިޔާރުންގެ ސުލޫކީ މިންގަނޑުގެ މާއްދާތަަކާއި ޚިލާފު ޢަމަލުތަކެއްކަން ސާބިތުވާތީ، ޖޭއެސްސީއިން ވަނީ ޤާނޫނުގެ 1-32 ވަނަ މާއްދާގެ (ހ)ގެ ދަށުން، އޭނާ ފަނޑިޔާރު ކަމުން ވަކިކުރުމަށް ރައްޔިތުންގެ މަޖިލިހަށް ހުށަހެޅުމަށް މިއަދު ބޭއްވުނު އެ ކޮމިޝަންގެ 48 ވަނަ ޖަލްސާގައި ވަނީ ނިންމަވާފައެވެ.

އަލީ އާދަމްގެ މި މައްސަލައިގެ އިތުރުން މި އަހަރުގެ ޖަނަވަރީ މަހުގެ ތެރޭގައު ޖޭއެސްސީއިން ވަނީ އޭނާގެ ސުލޫކީ މައްސަލައެއްވެސް ބަލާފައެވެ.

އެގޮތުން ޖެނުއަރީ 31 ގައި ޖޭއެސްސީއިން ނެރުން ބަޔާނެއްގައި ބުނެފައިވަނީ ކުޅުދުއްފުށީ މެޖިސްޓްރޭޓް ކޯޓަށް ހުށަހެޅުނު ރައްކާތެރިކަމުގެ އަމުރު ނެރެދިނުމާގުޅޭ މައްސަލައެއްގައި، ގެވެށި އަނިޔާ ހުއްޓުވުމުގެ ޤާނޫނާ ޚިލާފަށް، ޢަލީ އާދަމް ޢަމަލުކޮށްފައިވާ ތުހުމަތުކުރާކަމަށެވެ.

އެހެންކަމުން ސުލޫކީ މައްސަލައެއްގެ ގޮތުގައި މި މައްސަލަ ބެލުމަށް ޖަނަވަރީ 18 ގައި ބޭއްވި އެ ކޮމިޝަންގެ 5 ވަނަ ޖަލްސާގައި ނިންމާ މި މައްސަލައިގެ ތަޙްޤީޤު ކޮމިޓީއެއް ވެސް އޭރު އެކުލަވާލެވުނެވެ.