ޓެކުހާ ގުޅޭ މުއާމަލާތްތަކުގައި އެސްއެމްއީ ވިޔަފާރިތަކަށް ވަރަށް އަވަހަށް ލުއިތަކެއް ލިބިގެންދާނެ: ރައީސް ޑރ. މުއިއްޒު

ޓެކުހާ ގުޅޭ ބައެއް މުއާމަލާތްތަކުގައްޔާއި، ވިޔަފާރި ހިންގުމުގައި ކުރިމަތިވާ މާލީ ގޮންޖެހުންތަކުން އަރައިގަތުމަށްޓަކައި ކުދި އަދި މެދުފަންތީގެ ވިޔަފާރިތަކަށް ބޮޑެތި ލުއިތަކެއް ދެއްވާނެކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ އިޢުލާން ކުރައްވައިފިއެވެ.

ރައީސުލްޖުމްހޫރިއްޔާ މިކަން ހާމަކުރެއްވީ މިރޭ ބޭއްވި "ޤައުމީ އުފެއްދުންތެރިކަމުގެ މައުރަޒު"ގެ ވަނަތަކަށް އައި ފަރާތްތަކަށް އިނާމު ދިނުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އެމަނިކުފާނު ވިދާޅުވީ، ރާއްޖޭގެ ކުދި އަދި މެދުފަންތީގެ ވިޔަފާރިތަކުގެ ކުރިއެރުމަށްޓަކައި ސަރުކާރުން ވަރަށް މުހިންމު ފިޔަވަޅުތަކެއް އެޅުމަށް ނިންމާފައިވާ ކަމަށެވެ.

މިގޮތުން އެންމެ މުހިންމު ކަމެއްގެ ގޮތުގައި ރައީސް ފާހަގަކުރެއްވީ، ސަރުކާރުގެ މަސައްކަތްތައް ނަގައިގެން ކުރިއަށްގެންދާ ކުދި އަދި މެދުފަންތީގެ ވިޔަފާރިތަކަށް ސަރުކާރުން ދޭންޖެހޭ ފައިސާ ނުދެވި ލަސްވުމުގެ ސަބަބުން ޓެކްސް ދެއްކުމުގައި ދިމާވާ ދަތިތަކަށް ހައްލެއް ހޯދައިދިނުމެވެ. މިސާލެއްގެ ގޮތުން ރައީސް ވިދާޅުވީ، ކުންފުންޏަކުން ސަރުކާރަށް ދައްކަންޖެހޭ ޓެކުހުގެ އަދަދަށްވުރެ އެ ކުންފުންޏަކަށް ސަރުކާރުން ދޭންޖެހޭ ފައިސާ އިތުރުވެފައި، އެ ފައިސާ ނުދެވިއްޖެ ހާލަތެއްގައި އެފަހަރު ޓެކްސް ދައްކަން ނުޖެހޭނޭހެން އޮފްސެޓް ކުރެވޭނެ އިންތިޒާމެއް ހަމަޖައްސަވާނެ ކަމަށެވެ. އަދި އެގޮތަށް ހަމަޖައްސާއިރު، ބާކީ އޮންނަ ބައި ސަރުކާރުން ވިޔަފާރިތަކަށް ދައްކާނެ ކަމަށްވެސް އެމަނިކުފާނު ވިދާޅުވިއެވެ.

މީގެއިތުރުން، ޖީއެސްޓީ ރަޖިސްޓްރީ ކުރަންޖެހޭ އަހަރީ ތްރެޝްހޯލްޑް މިހާރު އޮންނަ 1 މިލިއަން ރުފިޔާއިން، އަންނަ ޖެނުއަރީ 1 އިން ފެށިގެން 1.5 މިލިއަން ރުފިޔާއަށް މަތިކުރުމަށް ނިންމާފައިވާކަން ރައީސް އިޢުލާން ކުރެއްވިއެވެ. މިކަމަށްޓަކައި ޤާނޫނުތަކާއި ޤަވާއިދުތަކަށް ގެންނަންޖެހޭ ބަދަލުތައް ކުރިއަށް އޮތް ކުޑަ ދުވަސްކޮޅުގެ ތެރޭގައި ގެންނަވާނެ ކަމަށް ރައީސް ވިދާޅުވިއެވެ.

އެމްއެސްއެމްއީ ސެކްޓަރަށް ލިބިގެންދާނެ އިތުރު ލުއިތައް ހާމަކުރައްވަމުން ރައީސް ވިދާޅުވީ، ރާއްޖޭގައި އުފައްދާ މުދަލަށް ބޭނުންވާ ރޯ މެޓީރިއަލްގެ ފުރިހަމަ ލިސްޓެއް އެކުލަވާލައި، އެ ލިސްޓުގައިވާ ބާވަތްތަކުން ޑިއުޓީ ކަނޑާލައި ސުމެއް އިންސައްތައިގައި އިމްޕޯޓް ޑިއުޓީ ނަގާގޮތަށް 1 ޖެނުއަރީ 2027 އިން ފެށިގެން 5 އަހަރު ދުވަހުގެ މުއްދަތަކަށް ކަނޑައަޅަން ނިންމާފައިވާ ކަމަށެވެ.

ދިވެހި ކުދި ވިޔަފާރިތަކަށް ރާއްޖެއިން ބޭރުން ފައިސާ ލިބިގަތުމުގައި ހުރި ދަތިތަކަށް އަލިއަޅުއްވާލައްވަމުން ރައީސް ވިދާޅުވީ، އިކޮނޮމިކް މިނިސްޓްރީއާއި ބީސީސީ އަދި ބޭންކް އޮފް މޯލްޑިވްސް ގުޅިގެން މި އަހަރުގެ ނޮވެމްބަރު 1 އިން ފެށިގެން ބީއެމްއެލް ގޭޓްވޭ މެދުވެރިކޮށް ދުނިޔޭގެ ކޮންމެ ތަނަކުންވެސް ޔޫއެސް ޑޮލަރުން ފައިސާ ބަލައިގަނެވޭނެ އިންތިޒާމު ހަމަޖައްސަވާނެ ކަމަށެވެ. އަދި މިގޮތަށް ލިބޭ ޑޮލަރު، ކާޑު މެދުވެރިކޮށް އަދި ރެމިޓެންސްގެ ޒަރީއާއިން ރާއްޖެއިން ބޭރުން މުދަލާއި ޚިދުމަތް ހޯދުމަށާއި، ވިޔަފާރިތަކަށް ބޭނުންވާ ސަބްސްކްރިޕްޝަން ފަދަ ޕޭމެންޓްތައް ދެއްކުމަށް އެއްވެސް ދަތިކަމެއް ނެތި ބޭނުންކުރެވޭނެ އިންތިޒާމުވެސް ހަމަޖެހިގެންދާނެ ކަމަށް ރައީސް ވިދާޅުވިއެވެ.

ރައީސް ޑރ. މުއިއްޒު ވިދާޅުވީ، ސަރުކާރުން ނިންމި މި މުހިންމު ނިންމުންތަކުގެ ސަބަބުން ކުދި އަދި މެދުފަންތީގެ ވިޔަފާރިތައް ކުރިއަރައި، އެ ދާއިރާއަށް އަލަށް ވަންނަން ބޭނުންވާ ފަރާތްތަކަށް ވެސް ވަރަށް ބޮޑެތި ލުއިފަސޭހަތަކެއް ލިބިގެންދާނެ ކަމަށެވެ.