ސަލްމާން މިސްކިތާއި އިސްލާމީ މަރުކަޒުގައި ތަރާވީހު ކުރާނެ ހާފިޒުން ހޯދަނީ
ކުރިއަށް އޮތް ރަމަޟާން މަހު މާލޭގެ އެންމެ ބޮޑު ދެ މިސްކިތްކަމުގައިވާ ސަލްމާން މިސްކިތާއި އިސްލާމީ މަރުކަޒުގައި އިމާމުވެ ތަރާވީހު ނަމާދު ކުރުމަށް ހާފިޒުން ހޯދުމަށް އިސްލާމީ ކަންތައްތަކާ ބެހޭ ވުޒާރާއިން އިއުލާނުކޮށްފިއެވެ.
އެ ވުޒާރާއިން މިއަދު ހާފިޒުން ހޯދުމަށް އިއުލާނުކޮށްފައިވަނީ ހަމަ އެކަނި އެ ފުރުސަތު ދިވެހިންނަށް ހުޅުވާލައިގެންނެވެ.
އިސްލާމީ މަރުކަޒުގައާއި ސަލްމާން މިސްކިތުގައި ހިފްޒުކޮށް ތަރާވީހު ނަމާދު ކުރުމަށް އެދި ހުށަހަޅާ ފަރާތްތަކުގެ މެދުގައި ޓެސްޓެއް ބޭއްވުމަށް ވަނީ ހަމަޖެހިފައެވެ.
އެއަށްފަހު ހިފްޒު އެންމެ ރަނގަޅު ހަތަރު ފަރާތެއް ކަނޑައަޅަން ހަމަޖެހިފައިވާ ކަމަށް އިސްލާމީ ކަންތައްތަކާ ބެހޭ ވުޒާރާއިން ބުނެއެވެ.
އެހެންކަމުން މިކަމަށް ޝައުގުވެރިވާ ފަރާތްތަކުން ފޯމު ފުރިހަމަކޮށް ލިޔުންތަކާއެކު ފެބްރުއަރީ މަހުގެ 29 ވަ ބުރާސްފަތި ދުވަހުގެ 14:00ގެ ކުރިން ހުށަހެޅުމަށް އެ ވުޒާރައިން ވަނީ އެދިފައެވެ.
ހާފިޒުންނަށް އެލަވަންސް ފައިސާ ދެވޭނީ އިމާމުވެ ހިފްޒުކޮށް ތަރާވީހު ނަމާދުކުރާ ކޮންމެ ރެޔަކަށް -/700 (ހަތްސަތޭކަ) ރުފިޔާގެ މަގުންނެވެ. އެ ގޮތުން ގިނަވެގެން ފައިސާ ދެވޭނީ މިސްކިތަކަށް 02 ދިވެހި ހާފިޒުންނަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
